100662

སྤྱི་མཚན་དངོས་མེད་དུ་སྒྲུབ་པའི་རིགས་པ་དང་པོ་ (1)

Part of speech	མིང་ཚིག
Definition	སྤྱི་མཚན་དངོས་མེད་དུ་སྒྲུབ་པའི་རིགས་པ་དང་པོ་ནི། དངོས་པོ་དོན་དམ་པར་བརྗོད་བྱེད་ཀྱི་སྒྲའི་བརྗོད་བྱ་ཡིན་པ་འགོག་པའི་རིགས་པ་ཞིག་སྟེ། དེ་ཡང་ཐལ་ངག་གི་དབང་དུ་བྱས་ན། གཟུགས་སོགས་ཆོས་ཅན། ཕྱི་རོལ་གྱི་དངོས་པོའི་ངོ་བོ་མིན་པར་ཐལ། དོན་དམ་པར་སྒྲའི་བརྗོད་བྱ་ཉིད་དུ་གྲུབ་པའི་ཕྱིར་རོ། །ཐལ་བ་དེས་འཕངས་པའི་རྟགས་སྦྱོར་ནི། ཤེས་བྱ་ཆོས་ཅན། དོན་དམ་པར་སྒྲའི་བརྗོད་བྱ་མེད་དེ། གཟུགས་སོགས་ཕྱི་རོལ་གྱི་དངོས་པོ་མཐོང་བའི་དབང་ཤེས་སྲིད་པའི་ཕྱིར་རོ། །ཞེས་འགོད་པར་བྱའོ། རིགས་པའི་གནད་ནི། གཟུགས་སོགས་དོན་དམ་པར་སྒྲའི་བརྗོད་བྱར་སོང་ན། སྒྲ་བརྗོད་པ་ཙམ་གྱིས་དབང་བོའི་མངོན་སུམ་བཞིན་དུ་གཟུགས་སོགས་གསལ་བར་སྣང་བར་འགྱུར་ལ། དེ་ལྟར་ན་དབང་བློ་སྟེ་དབང་བོའི་མངོན་སུམ་དོན་མེད་པར་འགྱུར་རོ་ཞེས་པ་ལྟ་བུའི་རིགས་པ་སྟེ། དེ་ལྟར་ཡང་རྒྱལ་ཚབ་དར་མ་རིན་ཆེན་གྱིས་མཛད་པའི་རྣམ་འགྲེལ་ཐར་ལམ་གསལ་བྱེད་ལས། གཟུགས་དེ་ཆོས་ཅན། ཕྱི་རོལ་གྱི་དངོས་པོའི་ངོ་བོ་མིན་པར་ཐལ། དོན་དམ་པར་སྒྲའི་བརྗོད་བྱ་ཉིད་ཡིན་པའི་ཕྱིར། ཐལ་བ་དེས་འཕངས་པ་ནི། དོན་དམ་པར་སྒྲའི་བརྗོད་བྱ་མེད་དེ། གཟུགས་སོགས་ཕྱི་རོལ་གྱི་དངོས་པོ་མཐོང་བའི་དབང་བློ་ཡོད་པའི་ཕྱིར། ཅེས་པ་སྟེ་གཟུགས་སོགས་དོན་དམ་པར་སྒྲའི་བརྗོད་བྱ་ཡིན་ན་སྒྲ་བརྗོད་ཙམ་གྱིས་ཕྱི་རོལ་གསལ་བར་སྣང་བར་འགྱུར་ལ། དེ་ལྟ་ན་དབང་ཤེས་དོན་མེད་དུ་ཐལ་བར་འགྱུར་རོ། །ཞེས་གསུངས།
Domain	ཚད་མ།