100667

སྤྱི་མཚན་དངོས་མེད་དུ་སྒྲུབ་པའི་རིགས་པ་ལྔ་པ་ (1)

Part of speech	མིང་ཚིག
Definition	སྤྱི་མཚན་དངོས་མེད་དུ་སྒྲུབ་པའི་རིགས་པ་ལྔ་པ་ནི། སྤྱི་དེ་གསལ་བའི་འབྲས་བུ་ཡིན་མིན་བརྟགས་ནས་དེ་ཡིན་པ་དགག་པའི་རིགས་པ་ཞིག་སྟེ། རིགས་པ་ནི། སྤྱི་དེ་ཆོས་ཅན། གསལ་བའི་འབྲས་བུ་ཡིན་པར་ཐལ། གསལ་བ་དང་འབྲེལ་བ་གང་ཞིག། རྫས་ཐ་དད་ཡིན་པའི་ཕྱིར་རོ། །འདོད་ན་འཇིག་པའི་རང་བཞིན་ཅན་དུ་ཐལ་ལོ། །འདོད་མི་ནུས་ཏེ། ཁ་ཅིག་ཁྱོད་ཀྱི་དེ་རྟག་པ་ཉིད་དང་གཅིག་པུར་འདོད་པའི་ཕྱིར་ཞེས་པ་ལྟ་བུའི་རིགས་པ་སྟེ། དེ་ལྟར་ཡང་རྒྱལ་ཚབ་དར་མ་རིན་ཆེན་གྱིས་མཛད་པའི་རྣམ་འགྲེལ་ཐར་ལམ་གསལ་བྱེད་ལས། གཉིས་པ་ནི། སྤྱི་དེ་གསལ་བའི་འབྲས་བུ་ཡིན་ནམ་མིན། འབྲས་བུའོ་ཞེ་ན། སྐད་ཅིག་སྔ་ཕྱི་དུ་མ་ཅན་དང་འཇིག་པའི་ངོ་བོར་ཐལ་ན། དེ་ཡང་འདོད་པ་མ་ཡིན་ཏེ། རྟག་པ་དང་གཅིག་པུར་འདོད་པའི་ཕྱིར། དེ་ཆོས་ཅན། རྟག་པ་ཉིད་མིན་པར་ཐལ། དངོས་པོ་ཡིན་པོ་ཡིན་པའི་ཕྱིར། ཁྱབ་པར་ཐལ། འཇིག་པ་དངོས་པོ་ཡོད་ཙམ་དང་རང་ཆས་སུ་རྗེས་སུ་འབྲེལ་བའི་ཕྱིར། རིགས་རྣམས་དངོས་པོ་ཡིན་ཡང་གསལ་བའི་འབྲས་བུ་མིན་པའི་ཕྱིར་དུ་མ་སོགས་སུ་མི་འགྱུར་རོ་ཞེ་ན། དེས་ན་གསལ་བ་དང་མ་འབྲེལ་བར་ཐལ། དེ་དང་རྫས་ཐ་དད་རྒྱུ་འབྲས་མིན་པའི་ཕྱིར། དངོས་མེད་དུ་འགྱུར་བར་ཐལ། གསལ་བའི་འབྲས་བུ་མིན་པ་གང་ཞིག རྒྱུ་གཞན་ལས་ཀྱང་མ་སྐྱེས་པའི་ཕྱིར། ཞེས་གསུངས།
Domain	ཚད་མ།