102291

སྨིན་གྲོལ་གླིང་དགོན་པ་ (1)

Part of speech

མིང་ཚིག

Definition

ཕྱི་ལོ་༡༦༧༦ རབ་བྱུང་བཅུ་གཅིག་པའི་མེ་འབྲུག་ལོར་སྔ་འགྱུར་རྙིང་མའི་བླ་ཆེན་ཆོས་རྒྱལ་གཏེར་བདག་གླིང་པ་འགྱུར་མེད་རྡོ་རྗེས་ཕྱག་བཏབ་པའི་རྙིང་མའི་དགོན་པ་གཙོ་བོ་ཞིག་ཡིན། གཏེར་ཆེན་ཉིད་དང་། ལོ་ཆེན་ཆོས་དཔལ་རྒྱ་མཚོ། གདུང་སྲས་མཆེད་ལྕམ་རིན་བྱོན་གྱིས། སྔ་འགྱུར་བཀའ་མའི་རྒྱུད་དང་སྒྲུབ་ཐབས་བཅས་ཀྱི་བཀའ་སྲོལ་དང་། ལྷོ་གཏེར་དང་གཏེར་གསར་གྱི་ཕྱག་རྒྱུན་བསྐྱངས་ཤིང་། བཀའ་སྡེ་ཟུར་བ་ཡབ་སྲས་ཀྱི་བཤད་སྲོལ་མདོ་སྒྱུ་སེམས་གསུམ། ཀུན་མཁྱེན་ཀློང་ཆེན་གྱི་གསུང་གི་བཤད་རྒྱུན་དར་སྤེལ་གནང་ནས་སྔ་འགྱུར་བསྟན་པ་ལ་མཛད་རྗེས་བླ་མེད་གནང་། རབ་བྱུང་བཅུ་གཉིས་པའི་མེ་བྱ་ཕྱི་ལོ་༡༧༡༧ལོར་སོག་པོ་ཇུན་གར་ཚེ་དབང་རབ་བརྟན་གྱིས་བཏང་བའི་དམག་དཔུང་བོད་དུ་འབྱོར་ནས་དགོན་པ་འདི་སོགས་བོད་ཡུལ་དབུས་ཀྱི་རྙིང་མའི་དགོན་པ་མང་ཆེ་བ་གཏོར་ཞིང་། རྡོ་རྗེ་བྲག་རིག་འཛིན་ཆེན་མོ་པདྨ་འཕྲིན་ལས་དང་། ལོ་ཆེན་དྷརྨ་ཤྲི་སོགས་རྙིང་མའི་བླ་ཆེན་མང་པོ་སྐུ་བཀྲོངས་པ་སོགས་གཏོར་བཤིག་ཆེན་པོ་བྱུང་། དེ་ནས་ཕོ་ལྷ་བ་བསོད་ནམས་སྟོབས་རྒྱས་ཀྱིས་བོད་ཀྱི་སྲིད་དབང་བཟུང་རྗེས་རིམ་བཞིན་དགོན་པ་འདི་རྙིང་མའི་དགོན་སྡེ་ཆེ་བ་རྣམས་རིམ་བཞིན་སྔར་རྒྱུན་བསྐྱར་གསོ་བྱེད་ཐུབ་པ་བྱུང་ཡོད།