10387

གཡུ་རྔོག་བློ་བཟང་དཔལ་ལྡན་རྒྱ་མཚོ་ (1)

Part of speech

མིང་ཚིག

Definition

རབ་བྱུང་བཅུ་བཞི་པའི་མེ་ཁྱི་ཕྱི་ལོ་ ༡༨༢༦ ལོར་མདོ་སྨད་གཡུ་རྔོག་གི་འབྲོག་སྡེར་སྐུ་འཁྲུངས། ཆུང་དུས་ནས་གདན་སར་ཞུགས། དྲུང་ཡིག་སྤྲུལ་སྐུ་ལས་དགེ་བསྙེན་དང་། ཁྲི་ཆེན་བློ་བཟང་རྒྱ་མཚན་སེང་གེ་ལས་རབ་ཏུ་བྱུང་། རྗེ་གསེར་ཁང་བ་ལས་དགེ་ཚུལ་བསྒྲུབས། བཀའ་ཆོས་མང་དུ་གསན། བཅུ་གསུམ་པར་རོང་བོ་ཐོས་བསམ་གླིང་དུ་ཞུགས། དགེ་བཤེས་བསྟན་པ་དར་རྒྱས་དང་། རྐ་སར་ལྷ་རམས་པ་དཀོན་མཆོག་རྒྱ་མཚོ་སོགས་བསྟེན། གཞུང་ལུགས་མང་པོར་སྦྱངས། རིགས་ལམ་ལ་འགྲན་ཟླ་བྲལ་བར་གྱུར། སྐྱབས་མགོན་བློ་བཟང་འཕྲིན་ལས་རྒྱ་མཚོ་དང་། ཐར་ཤུལ་ཆོས་སྐྱོང་རྒྱ་མཚོ། བློ་བཟང་ལུང་རིགས་རྒྱ་མཚོ་སོགས་ལས། མི་ཏྲ་རྡོར་ཕྲེང་། སྒྲུབ་ཐབས། རིན་འབྱུང་། ལམ་རིམ། བླ་མཆོད་ཕྱག་ཆེན་སོགས་བཀའ་ཆོས་མཐའ་ཡས་པ་གསན། སྡེ་ཁྲི་འཇམ་དབྱངས་ཐུབ་བསྟན་ཉི་མ་ལས་ཐུན་མོང་དང་ཐུན་མོང་མ་ཡིན་པའི་བཀའ་ཆོས་མང་དུ་གསན། ཤར་སྐུ་ཕྲེང་དྲུག་པའི་ཡོངས་འཛིན་མཛད། སོ་གསུམ་པར་རོང་བོ་ཐོས་བསམ་གླིང་གི་གདན་སའི་ཁྲིར་ཕེབས། ལོ་གསུམ་གྱི་རིང་ཆོས་འཆད་ཉན་སོགས་ལ་དོ་དམ་གང་ལེགས་གནང་། ཁྲི་ཟུར་རྗེས་གདན་ས་རང་དང་གཉན་ཐོག་དར་ཟིང་སོགས་བདག་སྐྱོང་ལེགས་པར་མཛད། སྐྱབས་མགོན་སྐུ་ཕྲེང་དྲུག་པ་སྐལ་ལྡན་བློ་བཟང་བསྟན་པའི་རྒྱལ་མཚན་གྱི་བཀའ་ལྟར་སླར་ཡང་རོང་བོ་ཐོས་བསམ་གླིང་གི་གདན་སའི་ཁྲིར་བཞུགས། འཆད་ཉན་ཡར་ལྡན་དུ་མཛད། འདས་ལོ་མི་གསལ། རོང་བོ་ཐོས་བསམ་གླིང་གི་གདན་རབས་ཞེ་གཉིས་པ་ཡིན།