11424

གྲུབ་ཐོབ་ཆེན་པོ་སྦྱིན་པ་རྒྱལ་མཚན་ (1)

Part of speech

མིང་ཚིག

Definition

ཕ་ཇོའི་ཡང་སྲིད་སྲས་ཚེ་དབང་བསྟན་འཛིན་དང་། སྒང་ཁའི་སྲས་མོ་དམ་ཆོས་བསྟན་འཛིན་ཡབ་ཡུམ་ཟུང་གི་སྲས་སུ། རྒྱལ་སྲས་བསྟན་འཛིན་རིན་པོ་ཆེའི་གཅེན་དུ་སྐུ་འཁྲུངས། (བསྟན་འཛིན་རབ་རྒྱས་རབ་བྱུང་བཅུ་གཅིག་པའི་ས་སྟག་ ༡༦༣༨ ལོར་འཁྲུངས། ) ཞབས་དྲུང་གི་བརྒྱུད་འཛིན་སློབ་མ་བཞི་ཡི་ཡ་གྱལ་ཡིན། ཡབ་དང་ཞབས་དྲུང་ལས། བརྒྱུད་པའི་དབང་ཁྲིད་གདམས་སྐོར་ཡོངས་རྫོགས་གསན། དབེན་པའི་གནས་རྣམས་སུ། གང་ལ་ལྟོས་མེད་ཀྱིས་དཀའ་སྤྱད་ཆེན་པོས་ཉམས་བཞེས་མཛད་པས། མཉམ་རྗེས་འདྲེས་པའི་རྟོགས་པ་འཁྲུངས་ཏེ་གྲུབ་ཐོབ་ཆེན་པོར་གྲགས། རྒྱལ་སྲས་བསྟན་འཛིན་རིན་པོ་ཆེས་སྤ་གྲོ་སྟག་ཚང་གི་དབུ་འདྲེན་དུ་བསྐོས་པ་ལས། འོད་གསལ་སྒང་དུ་གནས་གཞིའང་བཏབ་ཅིང༌། འབའ་རའི་གདན་ས་འབྲང་རྒྱས་དགོན་པར་བཞུགས་གནས་གཙོ་བོར་མཛད། སྤྲུལ་བསྒྱུར་མཐུན་སྣང་དུ་སྟོན་པ་སོགས་སྤར་ལུང་རྣམས་སུ་གྲུབ་རྟགས་དང་མངོན་མཁྱེན་གྱིས་འགྲོ་དོན་ཆེན་པོ་བྱུང༌། དེ་ནས་བསྟན་འཛིན་རིན་པོ་ཆེས་གཞུང་དུ་གདན་དྲངས་ཏེ་སླར་བྱོན་སྐབས་ཅུང་ཟད་བསྙུན་པའི་ཚུལ་གྱིས་རྡོ་ཀྱོང་ལར་ཕེབས་དུས། ས་འདིར་ཡབ་མེས་ངག་དབང་བསྟན་འཛིན་ཡང་མྱ་ངན་ལས་འདའ་བར་མཛད་པའི་གནས་ཡིན་པས། ང་ཡང་འདིར་མྱ་ངན་ལས་འདའོ་ཞེས་གསུངས་ཏེ་སྐྱེ་འཆི་ལ་རང་དབང་ཐོབ་པའི་སྒོ་ནས་ཞི་བར་གཤེགས་སོ། །སློབ་མའི་གཙོ་བོ་མཁན་པད་དཀར་ལྷུན་གྲུབ་དང༌། ཕྲིན་ལས་རྒྱ་མཚོའམ་ཆོས་མཛད་རས་ཆུང་པར་གྲགས་པ་སོགས་དངོས་སློབ་དང་ཡང་སློབ་ལ་མཁས་གྲུབ་མང་པོ་བྱུང་ངོ༌། །