11442

གྲུབ་དབང་ནམ་མཁའ་བསམ་གཏན་ (1)

Part of speech

མིང་ཚིག

Definition

འབའ་ར་ཀུན་མཁྱེན་ངག་དབང་ཡེ་ཤེས་ཀྱི་སློབ་མ་གྲུབ་དབང་ནམ་མཁའ་བསམ་གཏན་ནི། ཕ་དྲུག་གི་ཡུལ་སྟོད་སྒྲགས་ཀྱི་གྲོང་སྟོད་ཅེས་པར། མེས་ཀྱི་རིགས་སུ་སྐུ་འཁྲུངས། སློབ་དཔོན་སྔགས་འཆང་ཞལ་ངོ་ལྷུན་གྲུབ་ཅེས་པར་ལོ་དྲུག་གི་བར་དུ་བསྟེན་ཏེ། གསོ་བ་རིག་པ་ལ་སྦྱངས། རྒྱུད་བཞི། མན་ངག་ལྷན་ཐབས། བྱེ་བ་རིང་བསྲེལ། གཡུ་ཐོག་སྙིང་ཐིག་གི་ལུང་དང་ཁྲིད། ལུས་ཐིག་གི་མན་ངག་ཕྱག་ལེན་བཅས་པ་གསན། འགྲོ་ཕན་ཡང་ལོ་བཞི་ཙམ་མཛད་རྗེས་འཁོར་བ་སྤངས་ནས་རྗེ་འབའ་ར་བ་ངག་དབང་ཡེ་ཤེས་ཀྱི་ཞབས་ལ་བཏུད། གདམས་པ་དང་རྗེས་སུ་གདམས་པ་མང་དུ་གསན་ཅིང། ལ་ལྡེབས་རྩ་ཕུག་ཅེས་པའི་རི་ཁྲོད་སོགས་སུ་ཡུན་རིང་སྒྲུབ་པ་ཉམས་སུ་བཞེས་པས་གྲོལ་བ་བརྙེས། ཀུན་སྤང་གི་བརྟུལ་ཞུགས་ལྷུར་བཞེས་ནས་འཁྲུལ་བ་རང་སར་ཞིག། སྨན་སྒོམ་ཆོས་རྗེ་དང་མཆེད་གྲོགས་ཡིན་ཞིང། དོགས་གཅོད་ཞུ་བ་སོགས་ཕན་ཚུན་གུས་བཀུར་ཆེ། ཕྱིས་སྒྲུབ་བརྒྱུད་པའི་བྱ་བཏང་གཙང་མའི་རྣམ་ཐར་འཁྱོངས་ཤིང་ཕོ་ཉའི་ལམ་གྱི་གདེང་ལྡན་རྣལ་འབྱོར་གྱི་དབང་ཕྱུག་འཁྲུལ་ཞིག་དམ་པ་འདི་ཁོ་ནར་ངེས་སོ་ཞེས་བྲག་དཀར་བ་ཆོས་ཀྱི་དབང་ཕྱུག་གི་གསུང་ལས་བཏུས་སོ། །