11521

གྲུབ་མཐས་བློ་བསྒྱུར་བའི་ཉན་པ་པོ་ (1)

Part of speech	མིང་ཚིག
Definition	དབུ་མ། གྲུབ་མཐས་བློ་ཁ་བསྒྱུར་བ་ལ། སྤྱོད་འཇུག་ལས། རྣལ་འབྱོར་པ་ཡང་བློ་ཁྱད་ཀྱིས། །གོང་མ་གོང་མ་རྣམས་ཀྱིས་གནོད། །ཅེས་གསུངས་པ་ལྟར། ནང་པ་སངས་རྒྱས་པའི་གྲུབ་མཐའ་སྨྲ་བ་བཞི་པོ་རྣམས་འོག་མ་འོག་མའི་དོན་དམ་གྱི་འདོད་ཚུལ་ལ། གོང་མ་གོང་མས་གནོད་བྱེད་བརྗོད་ནས་གྲུབ་མཐའ་གོང་མ་ལ་སྦྱོར་བ་དང། འཆད་པ་པོ་དབུ་མ་པ་ཁོ་ནས་རང་གཞན་གྱི་གྲུབ་མཐའ་སྨྲ་བའི་དངོས་སྨྲ་བ་རྣམས་ལ། གོང་མ་གོང་མའི་གནོད་བྱེད་བརྗོད་ནས་མཐར་དབུ་མའི་གྲུབ་མཐའ་ལ་སྦྱོར་བ་དང། ཡང་དབུ་མ་པས་དེ་དག་ལ་རང་ལུགས་ཀྱི་གནོད་བྱེད་བརྗོད་པའི་སྒོ་ནས་མཐར་ཐུག་དབུ་མའི་གྲུབ་མཐའ་ལ་སྦྱོར་བ་གསུམ་ཡོད་པ་ལས། དང་པོ་ནི། རང་རང་གི་གཞུང་ན་གསལ། གཉིས་པ་ནི། དབུ་མའི་གཞུང་ལུགས་ཉིད་ལས། ཡོད་ན་མི་རྟག་པས་ཁྱབ་པའི་མདོ་སྡེ་པའི་གྲུབ་མཐས་འདུས་མ་བྱས་དངོས་པོར་ཡོད་པའི་བྱེ་བྲག་ཏུ་སྨྲ་བའི་གྲུབ་མཐའ་དགག དྲུག་གི་ཅིག་ཅར་སྦྱར་བའི་སེམས་ཙམ་པའི་རིགས་པས་མདོ་སྡེ་པ་རྡུལ་ཕྲན་བདེན་གྲུབ་ཏུ་འདོད་པ་དགག གཅིག་དུ་བྲལ་གྱི་རྟགས་ཀྱིས་སེམས་ཙམ་པ་སེམས་བདེན་གྲུབ་ཏུ་འདོད་པ་འགོག་པར་གསུངས་པ་ལྟ་བུའོ། །གསུམ་པ་ནི། གྲངས་ཅན་པ་བདག་སྐྱེ་ཁས་བླངས་པ་ལ་འགལ་པར་བརྗོད་པའི་ཐལ་འགྱུར་དང། རང་སྡེ་དངོས་སྨྲ་བ་རྣམས་གཞན་སྐྱེ་ཁས་བླངས་པ་ལ་རྒྱུ་མཚན་མཚུངས་པའི་མགོ་སྙོམས་དང། གཅེར་བུ་པ་གཉིས་ཀ་ལས་སྐྱེ་བ་ཁས་བླངས་པ་ལ། དེ་གཉིས་ཀའི་གནོད་བྱེད་དང། རྒྱང་འཕེན་པ་རྒྱུ་མེད་ལས་སྐྱེ་བ་ཁས་བླངས་པ་ལ། རྒྱུ་མཚན་མཚུངས་པའི་མགོ་སྙོམས་སོགས་བརྗོད་པའི་སྒོ་ནས་སྐྱེ་མེད་རྟོགས་པ་ལ་འགོད་པ་ལྟ་བུའོ། །མདོར་ན་གྲུབ་མཐའ་སྨྲ་བའི་དངོས་སྨྲ་བ་ཐམས་ཅད་དགག་སྒྲུབ་ཀྱི་སྒོ་ནས་དབུ་མའི་དེ་ཁོ་ན་ཉིད་ཉན་པོར་རུང་བར་ཤེས་པར་བྱའོ། །ཞེས་ཀུན་མཁྱེན་གོ་རམས་པས་དབུ་མའི་སྤྱི་དོན་ལས་གསུངས་སོ། །
Domain	ཆོས་ལུགས།