11627

གྲོ་མོ་བཀའ་བརྒྱུད་སྤྲུལ་སྐུ་ངག་དབང་ཆོས་ཀྱི་རྒྱལ་མཚོ་ (1)

Part of speech

མིང་ཚིག

Definition

སྦས་ཡུལ་འབྲས་མོ་ལྗོངས་ཀྱི་ཉེ་འདབས། གངས་ཆེན་མཛོད་ལྔ་ཟུང་དུ་འབྲེལ་བའི་མཚམས་ལ་མོ་ཞེས་པའི་ཡུལ་དུ། ཡབ་གཙང་ལ་སྟོད་བྲག་ནག་བླ་མ་པདྨ་འོད་འབར་དང་། ཡུམ་ཀུན་བཟང་དཔལ་མོ་གཉིས་ཀྱི་སྲས་སུ། རབ་བྱུང་བཅུ་གསུམ་པའི་ཤིང་ཕག་ ༡༧༥༥ ལོར་བལྟམས། སྐྱེས་མཆོག་འབར་ར་བའི་སྐུ་ཕྲེང་གསུམ་པ་རྗེ་ཀརྨ་གསལ་བྱེད་ཀྱི་དངོས་སློབ་གྲུབ་དབང་དཀོན་མཆོག་རྒྱལ་མཚན་གྱི་སྐུ་སྐྱེ་ངག་དབང་བསྟན་འཛིན་ཉི་ཟླའི་སྤྲུལ་སྐུ་ཡིན། དགུང་ལོ་བཞི་ལྔ་ཙམ་ལ། ཐང་སྒོ་དགོན་དུ་གྲུབ་ཐོབ་དཀར་པོ་ཞེས་དགུང་ལོ་བརྒྱ་དང་དྲུག་ཅུ་ཙམ་བཞུགས་པ་ཞིག་ཡོད་པ་དེས། རྗེ་བསྟན་འཛིན་ཉི་ཟླའི་སྤྲུལ་སྐུ་འཁྲུལ་མེད་ཡིན་པའི་ངོས་འཛིན་མཛད། སྐུ་གོང་མའི་ཉེར་སྤྱད་ངོས་ཟིན་པས་ཡིད་ཆེས་སུ་གྱུར། གྲོ་མོ་བཀའ་བརྒྱུད་དགོན་གསར་གྱི་གདན་སའི་ཁྲི་ལ་མངའ་གསོལ། སྟོད་ནས་རྗེ་ཆོས་གྲགས་རྒྱ་མཚོས། མཚན་ངག་དབང་ཆོས་ཀྱི་རྒྱ་མཚོ། དཔལ་བཟང་པོ་ཞེས་ཆེད་དུ་བསྩལ། དགུང་ལོ་དགུ་པ་ལ་འབའ་རར་རྗེ་ངག་དབང་ཆོས་གྲགས་རྒྱ་མཚོའི་དྲུང་དུ། གཙུག་ཕུད་ཕུལ། བཅུ་བཞི་ལ་བླ་མ་གཤེགས། མོན་རྫོང་རི་ཁྲོད་དུ་གྲུབ་དབང་ཀརྨ་དཔལ་ལྡན་གྱི་སྤྱན་སྔར་བྱོན་ཏེ། ཕྱག་ཆེན་དང་། ནཱ་རོ་ཆོས་དྲུག་སོགས་སླར་ཡང་ཉམས་ཁྲིད་བསྐྱངས། ཐབས་ལམ་གསང་ཁྲིད་ཀྱི་དབང་སོགས་ལུང་ཆོས་ཇི་སྙེད་བཞུགས་སོ་ཅོག་གསན་ནས། མཉེས་པ་གསུམ་གྱིས་བཀུར་སྟི་མཛད། པཎ་ཆེན་བློ་བཟང་དཔལ་ལྡན་ཡེ་ཤེས་ཀྱི་དྲུང་དུ་བསྙེན་པར་རྫོགས། མཆོག་དམན་ཀུན་གྱིས་གུས་པས་འདུད་ཅིང་། སྙན་གྲགས་ཇེ་རྒྱས་སུ་གྱུར། གདན་ས་དེ་ཉིད་དང་། ཁམ་བུ་སྒྲིལ་མ་དགོན་གསང་སྔགས་ཆོས་སྡིངས། རང་དགོན་བཀའ་བརྒྱུད་དགོན་གསར་རྣམས་སུ་ཕྱག་ཆེན་དང་ཆོས་དྲུག་གི་ཁྲིད་སོགས་དབང་ཁྲིད་དུ་མ་སྤེལ། དགོན་གནས་དེ་དག་དང་། ཁྱད་པར་དུ་རང་དགོན་དུ་རྟེན་གསུམ་འགྲན་ཟླ་བྲལ་བ་གསར་དུ་བཞེངས་ཤིང། བསྟན་པའི་གཞི་མ་དགེ་འདུན་གྱི་སྡེའང་རྗེ་འདིའི་སྐུ་དུས་ལ་གྲྭ་ཚང་བརྒྱ་ཕྲག་ལྷག་ཙམ་ཚོགས། བདེ་མཆོག་དང་། ཚེ་ཆོག་ལ་སོགས་པའི་སྒྲུབ་མཆོད་རྣམས་ཀྱང་ཇེ་རྒྱས་ཇེ་བཟང་དུ་གྱུར། མཚན་མོ་ཡང་ཕལ་ཆེར་མནལ་བ་མེད་པར། ཐུགས་དམ་ཁོ་ནར་བཞུགས་པས། ཉེ་གནས་ཀྱིས་མཚན་མོ་ཕྱེད་ཡོལ་ཙམ་ནས་གསོལ་ཇ་རེ་རྒྱུན་ལྡན་ཞུས་དགོས་ཀྱི་ཡོད། རྗེ་ཉིད་དང་གྲྭ་རིགས་བཅས་པས་ནག་ཆང་བསྟེན་པའི་རིགས་སོགས་ནམ་ཡང་མི་མཛད་པར། སངས་རྒྱས་བསྟན་པའི་མིག་རྒྱན་དུ་བཞུགས་སོ། །གཞན་ཡང་འབྲུག་དང་འབྲས་ལྗོངས་བར་གྱི་རྩོད་རྙོག་རིགས་བསལ་ནས། ཕན་ཚུན་བདེ་འཇམ་ལ་བཀོད་པ་སོགས་བསྟན་འགྲོའི་དོན་ཅི་ཡང་མཛད་པའི་མཐར། དགུང་ལོ་དོན་བདུན་པ་ལྕགས་ཡོས་ ༡༨༣༡ ལོའི་ཟླ་བ་གསུམ་པའི་ཚེས་བཅུ་གསུམ་ལ་གཟུགས་སྐུ་ཆོས་དབྱིངས་སུ་གཤེགས་སོ། །སློབ་མའི་གཙོ་བོ་ནི། འཇམ་གླིང་པ་རིག་འཛིན་ཆོས་དབྱིངས་རྡོ་རྗེ། གྲུབ་ཆེན་རྡོ་རྗེ་རྒྱལ་མཚན། གངས་རི་སྤྲུལ་སྐུ། གྲུམ་པ་སྤྲུལ་སྐུ། འབའ་ར་རྗེ་བཙུན་མ་ཉི་མ་ཆོས་སྒྲོན། ཕག་རི་སྐད་གཏོད་གྲུབ་ཆེན་ཧེ་རུ་ཀ་རྣམས་སོ། །

{{#arraymap:གྲོ་མོ་བཀའ་བརྒྱུད་སྤྲུལ་སྐུ་ངག་དབང་ཆོས་ཀྱི་རྒྱལ་མཚོ་

|; |@@@ | | }}