12049

གླིང་གེ་སར་ (1)

Part of speech

མིང་ཚིག

Definition

གླིང་སྒྲུང་ནང་གི་མི་སྣ་གཙོ་བོ་གེ་སར་ཏེ། རབ་བྱུང་དང་པོའི་ས་སྟག་ཕྱི་ལོ་ ༡༠༣༨ ལོར་ཡབ་གླིང་ཆུང་བརྒྱུད་སྲས་པོ་སེང་བློན་དང་། ཡུམ་འགོག་བཟའ་ལྷ་མོ་གཉིས་ཀྱི་སྲས་སུ་ས་སྐྱིད་སོ་ཡག་གི་ཁ་མདོ་རུ་སྐུ་འཁྲུངས་མཁས་པ་ཕལ་མོ་ཆེས་བཞེད། ཆུང་དུས་ཀྱི་མིང་ལ་བུ་ཇོ་རུ་བཏགས། མ་ཡུམ་འགོག་བཟའ་ལྷ་མོ་དེ་གླིང་སེང་བློན་རྒྱལ་པོའི་བཙུན་མོ་དངོས་མིན་སྟབས། ཁོང་མ་བུ་གཉིས་འཚོ་བ་ཉམ་ཆུང་གིས་བཞུགས་དགོས་བྱུང་བ་དང་། ཁོང་གི་ཐུན་མོང་མ་ཡིན་པའི་བྱིས་པའི་རིག་སྟོབས་ལ་ཨ་ཁུ་ཁྲོ་ཐུང་ལ་སོགས་ཁག་གཅིག་གིས་ཕྲག་དོག་གི་རྐྱེན་གྱིས། ཁོང་ལ་སྒྲིག་འགལ་གྱི་གྱོད་གཞི་མི་ཉུང་བ་ཞིག་བཙུགས་ནས་གླིང་ཡུལ་ནས་ཕུད་པའི་བཀའ་ཆད་བཅད། ཁོང་མ་བུ་གཉིས་རྨ་སྨད་གཡུ་ལུང་སུམ་མདོར་རྒྱང་ཕུད་བྱས་པ་དང་། གནས་དེར་ལོ་ཤས་རིང་འབྱུང་པོ་མི་མ་ཡིན་པའི་འགྲོ་དོན་མང་པོ་མཛད། དེ་ནས་གླིང་གི་རྒྱལ་ས་ལ་གླིང་ཆེ་འབྲིང་ཆུང་གསུམ་གྱི་ཕུ་ནུ་རྣམས་ཐོབ་རྩོད་བྱེད་པའི་མཐར། གླིང་གི་རྒྱལ་ས་དང་། སྒ་སྐྱ་ལོའི་བུ་མོ་འབྲུག་མོ་གཉིས་རྟ་རྒྱུག་གི་རྒྱན་དུ་བཙུགས་ཤིང་། རྟ་སུ་མགྱོགས་ལ་གླིང་གི་རྒྱལ་ས་དང་། འབྲུག་མོ་གཉིས་ཐོབ་རྒྱུ་ཐག་བཅད། རིགས་རུས་དང་། ཐོབ་ཐང་། དབུལ་ཕྱུག་གང་གི་ཁྱད་པར་མེད་པར་གླིང་གི་རུས་སུ་གཏོགས་པ་ཐམས་ཅད་དེའི་འགྲན་རྩོད་ནང་དུ་ཞུགས་ཆོག་པར་དྲིལ་བསྒྲགས། དུས་དེར་བུ་ཇོ་རུའི་ཕུ་བོ་རྒྱ་ཚ་ཞ་དཀར་གྱིས་ཇོ་རུ་འབོད་དུ་མངགས། ཇོ་རུ་ལྷ་རྟ་རྐྱང་རྒོད་དང་བཅས་ཏེ་དུས་ཐོག་ཏུ་གླིང་ཡུལ་དུ་འབྱོར། རྟ་རྒྱུག་གི་འགྲན་རྩོད་ནང་དུ་ཞུགས་པས་གླིང་གི་རྒྱལ་ས་དང་། སེང་ལྕམ་འབྲུག་མོ་གཉིས་ཇོ་རུ་ལ་ཐོབ། ཉིན་དེ་ནས་གླིང་གེ་སར་རྒྱལ་པོ་ཞེས་འབོད་སྲོལ་བྱུང་། དེ་ནས་བཟུང་ཕྱོགས་བཞིའི་བདུད་བཞི་ལ་སོགས་པའི་སྐབས་དེའི་མི་སྲུན་པའི་ཡུལ་དཔོན་མང་པོ་དབང་དུ་བྱས་སྟབས། གླིང་གེ་སར་ནོར་བུ་དགྲ་འདུལ་ཞེས་མཚན་སྙན་ཆེར་རྒྱས། མཐར་དགུང་ལོ་གྱ་གཉིས་པ་རབ་བྱུང་གཉིས་པའི་ས་ཕག་ཕྱི་ལོ་ ༡༡༡༩ ལོར་མདོ་ཁམས་རྨ་རྒྱལ་གངས་ཀྱི་རི་བོའི་ཉེ་འདབས་སུ་སྐུ་གཤེགས་པར་གྲགས།

{{#arraymap:གླིང་གེ་སར་

|; |@@@ | | }}