12689

གསང་ཕུ་དགོན་པ་ (1)

Part of speech

མིང་ཚིག

Definition

གསང་ཕུ་ནེའུ་ཐོག་དང་དོན་གཅིག་སྟེ། བོད་རབ་བྱུང་དང་པོའི་ཆུ་གླང་ཕྱི་ལོ་ ༡༠༧༣ ལོར་ཇོ་བོ་རྗེ་ཨ་ཏི་ཤའི་དངོས་སློབ་རྔོག་ལོ་ཙཱ་བ་ལེགས་པའི་ཤེས་རབ་ཀྱིས་ཐོག་མར་བཏབ། དེ་ཡང་དགོན་པ་འདེབས་སའི་ས་གནས་འདི་ཇོ་བོ་རྗེ་ཨ་ཏི་ཤས་ལུང་བསྟན་པ་གནང་ཞིང་། དགོན་པ་མ་བཏབ་བར་དུ་གསང་བ་མཛད་པར་ཞུ་ཞེས་ཞུས་པར་བརྟེན་ནས་གསང་ཕུ་ཞེས་མིང་ཐོགས་པར་བཤད། ཐོག་མར་གྲྭ་པ་ལྔ་བརྒྱ་ཙམ་འདུས་པ་ལ་རྔོག་གིས་འཆད་ཉན་མཛད། ཕྱ་པ་ཆོས་ཀྱི་སེང་གེས་མཚན་ཉིད་ཀྱི་སྲོལ་བཏོད་ནས་དར་རྒྱས་ཆེ་བ་བྱུང་། སེ་འབྲས་མ་ཆགས་གོང་དབུས་ཀྱི་གདན་ས་དྲུག་གི་གྲས་ཡིན། དུས་རབས་བཅུ་བཞི་པའི་ནང་རྗེ་ཙོང་ཁ་པས་དེ་གའི་མཁན་པོ་སེང་གེ་རི་བོང་ལས་རྣམ་འགྲེལ་གསན་པ་དང་། བཀའ་བཞིའི་གྲྭ་སྐོར་ཡང་མཛད། དེ་རྗེས་མཁན་པོ་གྲགས་པ་སེང་གེས་རྗེ་ཙོང་ཁ་པའི་ཞབས་ལ་གཏུགས། ཁོང་གི་བུ་སློབ་སོགས་ནས་བརྒྱུད་དེ་དགེ་ལུགས་དར་རྒྱས་ཆེ་སྟབས་གསང་ཕུར་ས་སྐྱ་དང་དགེ་ལུགས་ཀྱི་གྲྭ་ཚང་བཅུ་གཅིག་ཏུ་གྱེས་པ་སྟེ། ༡ སྤེལ་སེར། ༢ ཉི་མ་ཐང་། ༣ དྭགས་པོ་གྲྭ་ཚང་། ༤ རྣམ་རྒྱལ་གསེར་ཁང་། ༥ ཁུ་སྤེ་བཅས་གླིང་སྟོད་གྲྭ་ཚང་ལྔ་དང་། ༦ སྒྲོས་རྙིང་པ། ༧ གཞི་བ། ༨ ཉང་རོང་། ༩ གནས་སྒོ་བ། ༡༠ སྒྲོས་གསར་བ། ༡༡ རྭ་སྟོད་སྨད་བཅས་གླིང་སྨད་གྲྭ་ཚང་དྲུག་སྟེ་བཅུ་གཅིག་ཡོད་ལ་ཕྱིས་གྲྭ་ཚང་རྣམས་གྲྭ་ས་གཞན་དང་བསྒྲིལ་བའམ། ས་ཆ་གཞན་དུ་གཞིས་ཕབ་སྟབས་གསང་ཕུ་དབྱར་ཆོས་ཙམ་མ་གཏོགས་རྒྱུན་གཏན་གྲྭ་གྲངས་སུམ་ཅུ་སྐོར་ལས་མེད། དབྱར་ཆོས་སྐབས་མཁན་པོ་དང་ཁྲིམས་གནོན་རྣམས་སྙེ་ཐང་རྭ་བ་སྟོད་པ་སོགས་བླ་ཁག་བཅུས་རེས་སྐོར་གྱིས་བྱེད་པ་དང་དགའ་ལྡན་ཤར་རྩེ་མཁན་པོས་གསང་ཕུ་གླིང་སྨད་ཞབས་དྲུང་གི་མིང་འཛིན་བྱེད་སྲོལ་ཡོད། ཞིབ་པར་གླིང་སྟོད་བློ་བཟང་རྒྱ་མཚོའི་སྤྲུལ་སྐུ་ཉིད་ཐང་ངག་དབང་གཞོན་ནུ་བསྟན་པའི་ཉི་མས་མཛད་པའི་གསང་ཕུའི་གདན་རབས་དང་སྐྱེས་ཆེན་དམ་པའི་རྣམ་ཐར་བརྗོད་པ་པད་དཀར་ཆུན་པོ་ཞེས་པ་དེར་གཟིགས།