12755

གསང་བ་རྫོགས་པ་ཆེན་པོ་ (1)

Part of speech	མིང་ཚིག
Definition	སྔགས། རྫོགས་ཆེན། རྙིང་མ། རྫོགས་པ་ཆེན་པོ་སྟེ། འདིའི་ལུགས་ཀྱི་བཞེད་པ་ནི། ཡིད་ཀྱི་མུན་སེལ་ལས། གསང་བ་རྫོགས་པ་ཆེན་པོ་ནི། ཆོས་ཐམས་ཅད་གཞི་ནས་ལྷུན་གྱིས་གྲུབ་པའི་ཕྱིར། དབྱིངས་དང་ཡེ་ཤེས་དབྱེར་མེད་ཀྱི་ངོ་བོར་སངས་རྒྱས་ཏེ་བདེན་པ་དབྱེར་མེད་པ་ནི། འདི་ཉིད་ལས། དོན་དམ་ཀུན་རྫོབ་དབྱེར་མེད་པའི། །མཉམ་པའི་དཀྱིལ་འཁོར་ཆེན་པོ་རུ། །ཞེས་པ་ལ་སོགས་པས། ཡེ་ནས་མཉམ་རྫོགས་ཆེན་པོ་གཅིག་ཏུ་སངས་རྒྱས་པར་བསྟན་ཏེ། ལམ་བསྒྲུབ་པའང་དེ་ཉིད་གསལ་བར་བྱེད་པ་ཙམ་ལས་གཞན་མི་འདོད་ཅིང་། སེམས་ཅན་གྱི་དུས་ན་སེམས་དང་། སངས་རྒྱས་ཀྱི་དུས་ན་ཡེ་ཤེས་རང་སྣང་བ་དེ་ཡང་། ཡོད་མེད་ལ་སོགས་པ་གང་དུའང་མ་གྲུབ་པའི་ཚུལ་གྱིས་གནས་པར་འདོད་ལ། ཁྱད་པར་དུ་འཁྲུལ་སྣང་གཞི་མེད་པ་རྨི་ལམ་ལྟར་གདོད་མ་དང་ཐ་མ་ན་མེད་ལ། གློ་བུར་དུ་ད་ལྟ་རང་སྣང་བས་གནད་ཟབ་མོས་དག་པར་སླ་ཞིང་། ཡེ་ཤེས་ཀྱི་རང་བཞིན་ཉིན་སྣང་གི་སེམས་ལྟར་མ་འཁྲུལ་པར་ཡེ་ནས་དེ་ལྟར་གནས་པས། ཚེ་འདིར་འབད་ན་འགྲུབ་པའི་གནད་ཀྱང་དེ་ལྟར་འདོད་དོ། །དེའང་ཐ་སྙད་དུ་འཁྲུལ་པ་རྩ་བ་མེད་ལ་རྟེན་དང་བྲལ་བ་སྨིག་སྒྱུའི་ཆུ་དང་དྲི་ཟའི་གྲོང་ཁྱེར་དང་འདྲ་ལ། ཡེ་ཤེས་ནི་དངོས་སྣང་དོན་བྱེད་ནུས་པའི་རྣམ་པ་དང་འདྲ་ཞིང་། དོན་དམ་པར་དེ་གཉིས་ཀའང་རང་བཞིན་གྱིས་རྣམ་པར་དག་པ་ནམ་མཁའ་ལྟ་བུའི་ངང་ལས་གཞན་དུ་གྲུབ་པ་མེད་པར་འདོད་དོ། །ཞེས་གསུངས། རྒྱས་པར་ཨ་ཏི་ཡོ་ག་དང་རྫོགས་པ་ཆེན་པོའི་སྐབས་སུའང་གཟིགས།
Domain	ཆོས་ལུགས།