14898

ངག་དབང་བསྟན་འཛིན་བཟང་པོ་ (1)

Part of speech

མིང་ཚིག

Definition

གཙང་ཆེན་སྐུ་ཕྲེང་གསུམ་པའི་ཐུགས་སྲས་གླང་འབུད་དགོན་གྱི་རྡོ་རྗེ་སློབ་དཔོན་བླ་མ་ངག་མཆོག་གམ་ངག་དབང་བསྟན་འཛིན་བཟང་པོ་མཆོག་ནི། འཛི་སྲིབ་ཀ་ཐོག་སའི་ཆར་ཡབ་ཀ་ཐོག་དཔའ་སྐྱོང་དང་། ཡུམ་བསེ་མཚོ་གཉིས་ཀྱི་སྲས་སུ་དམ་པ་འདི་ཉིད་ས་གླང་ལོར་སྐུ་འཁྲུངས། དགུང་ལོ་བཅུ་གསུམ་གྱི་སྟེང་ཙམ་ལ་འཛམ་ཐང་གཙང་བའི་གཟིམས་ཁང་དུ་འོང་ནས་རྡོ་རྗེ་སློབ་དཔོན་ཆེན་པོ་ངག་དབང་ཆོས་འབྱོར་ཞབས་པའི་དྲུང་ནས་དུས་ཀྱི་འཁོར་ལོའི་ཟབ་ལམ་སྦྱོར་བ་ཡན་ལག་དྲུག་གི་དབང་ལུང་ཟབ་ཁྲིད་ཡོངས་རྫོགས་ཞུས་ནས་ཉམས་ལེན་གོང་མའི་ཕྱག་བཞེས་བཞིན་དམ་པ་འདི་ཉིད་ཀྱིས་ལེགས་པར་མཛད་ཅིང༌། འདི་སྐབས་ཅི་རིགས་པར་རྗེ་བླ་མས་ཁོང་ལ་ངག་མཆོག་གམ་ངག་དབང་བསྟན་འཛིན་བཟང་པོ་ཞེས་པའི་མཚན་གསོལ། དགུང་ལོ་ཉི་ཤུའི་སྐོར་དེ་མཚམས་ཉིད་ཀྱིས་བསྐྱེད་རིམ་འགའ་རེ་དང༌། གཙང་བའི་སྒྲུབ་གྲྭ་ལ་མཚམས་སྒྲུབ་ལོ་འགར་ཡང་མཛད། དགུང་ལོ་སུམ་ཅུའི་སྐོར་སོགས་སུ་ཛ་འགོའི་དགོན་གྱི་བྱམས་ཕུག་ཏུ་དགེ་བཤེས་བློ་བཟང་མཆོག་གྲུབ་རྒྱ་མཚོའི་མདུན་ནས་གཞུང་དཀའ་པོད་ལྔ་ལ་སློབ་གཉེར་ལེགས་ངེས་མཛད། དགེ་བཤེས་ཀྱི་བཀའ་ལུང་ལྟར་དམ་པ་འདིས་ཛ་འགོའི་དགོན་གྱི་འདུ་ཁང་བཞེངས་པ་སོགས་ལ་མཐུན་རྐྱེན་བླ་ལྷག་ཀྱང་མཛད། དགུང་ལོ་བཞི་བཅུའི་སྐོར་ཞིག་ནས་བཟུང་རིམ་པར་ཁོང་ཉིད་སྡེ་དགེ་ལ་བྱོན་ནས་ཉིད་ཀྱིས་རྒྱལ་བའི་བཀའ་ཆོས་ཆེན་མོའི་གླེགས་བམ་ཡོངས་སུ་རྫོགས་པ་དང༌། གཞན་བསྟན་བཅོས་ཀྱི་རིགས་པོ་ཏི་ལྔ་བཅུ་ལྷག་གི་གྲངས་ལེགས་གྲུབ་མཛད། དེ་ནས་ལོ་འགའི་རྗེས་སུ་དམ་པ་གང་དེས་གླང་འབུད་དགོན་བཏབ་ནས་དགོན་དེ་ལ་མདོ་སྔགས་བཤད་སྒྲུབ་གླིང་ཞེས་པའི་དགོན་མིང་ཡང་བཏགས། ཁོང་དགོན་དེར་རྒྱུན་བཞུགས་གནང་། དེ་མཚམས་ཤིག་ནས་ཁོང་ཉིད་འབོས་པ་སང་ནང་ལ་བྱོན་ཏེ་དེར་ཉིད་ཀྱིས་ཨ་ཛུ་བླ་མ་སོགས་འདུས་པ་བདུན་ཅུ་ལྷག་ལ་འབའ་མདའ་བླ་མའི་ལམ་རིམ་རྒྱས་འགྲེལ་ཆེན་མོའི་བཤད་ཁྲིད་སོགས་ཆོས་བཀའ་ཅི་རིགས་པ་གསུངས་ཤིང༌། རང་དགོན་དུ་རྒྱ་ཚོགས་བླ་མ་བསོད་ནམས་སོགས་འདུས་པ་བཅུ་ཕྲག་ཙམ་ལ་སྤྱོད་འཇུག་ས་བཟང་གི་འགྲེལ་བའི་སྟེང་ནས་བཤད་ཁྲིད་མཛད། དགུང་ལོ་དྲུག་ཅུ་རེ་གཉིས་སྟེང་རང་དགོན་དུ་སྐུ་གཤེགས་ཏེ་ཐུགས་དམ་ཞག་ལྔ་ཕྲག་ཏུ་བཞུགས་པའི་རྗེས་ནས་ཤུག་ཆུང་ཡང་སྤྲུལ་གྱིས་ཐུགས་དམ་ལེགས་བཀྲོལ་གྱི་སྒོ་ནས་གདུང་ཆོས་ཡུལ་སྲོལ་དང་བསྟུན་ནས་དགོངས་མཆོད་སློབ་ཚོགས་དག་གིས་གནང་། ཐུགས་སློབ་ཀྱང་དཀྱུས་སུ་བརྗོད་པས་ཕྱོགས་ཙམ་མཚོན་ཞིང་བླ་མ་ཡོན་ཏན་རིན་ཆེན་སོགས་བསྟན་པ་ལ་ཕན་ཐོགས་པ་མང་དུ་བྱུང་ངོ་། །