14912

ངག་དབང་རིན་ཆེན་བསྟན་པ་རྒྱལ་མཚན་ (1)

Part of speech

མིང་ཚིག

Definition

ངག་དབང་རིན་ཆེན་བསྟན་པ་རྒྱལ་མཚན་ནམ་གཙང་བསམ་ཆོས་སྐུ་ཕྲེང་དང་པོ་མཆོག་ནི། ཀུན་མཁྱེན་ཆེན་པོ་པདྨ་དཀར་པོའི་ཞལ་སློབ་ཡིན། (ཀུན་མཁྱེན་ཆེན་པོ་པདྨ་དཀར་པོ་རབ་བྱུང་དགུ་པའི་མེ་ཕག་ ༡༩༢༧ ལོར་འཁྲུངས། ) ཀུན་མཁྱེན་རྒྱལ་བའི་དབང་པོའི་ཞབས་པད་བསྟེན་ཡུན་རིང་བས་གསུང་ངག་ལ་འདྲིས། བསྲེ་འཕོའི་རྣམ་བཤད་རྡོ་རྗེ་འཆང་གི་དགོངས་པ་གསལ་བར་བྱེད་པ་སོགས་བསྟན་བཅོས་ཕལ་ཆེ་བའི་ཡིག་མཁན་དང༌། དོ་དམ་པ་མཛད། ཕྱིས་ཀུན་མཁྱེན་གྱིས་པ་སྣམ་བསམ་གྲུབ་ཆོས་སྡིངས་ཀྱི་བླ་མར་བཀོད་པ་གནང་ཞིང༌། གནས་དེར་ཆོས་བརྒྱུད་དར་བའི་རྟེན་འབྲེལ་སྒྲིག་པར་མཛད། དེ་ཡང་རྗེ་འདི་ཉིད་ཐོག་མར་ཟུར་གསང་སྔགས་གླིང་ཞེས་པའི་གྲོང་ཚོའི་བྱང་ངོས་མ་ལུང་གི་བྲག་ཕུག་ཏུ་བཞུགས་སྐབས། དྷརྨ་ཞེས་པའི་ཆོས་དཔེ་ཞིག་རླུང་གིས་ཁྱེར་བྱུང་བས། ཐུགས་དགོངས་ལ་ངའི་དགོན་པ་འདེབས་སའི་གནས་དེར་ཡི་གེ་འདི་བབ་པར་ཤོག་ཅེས་སྨོན་ལམ་བཏབ་པས། ད་ལྟའི་དགོན་གནས་འདིར་བབས། ཐུགས་མཉེས་ཏེ་ང་རང་གི་བསམ་པ་ལྟར་གྲུབ་སོང་གསུངས་ནས་དགོན་པ་ཕྱག་བཏབ་ཅིང༌། མཚན་ཡང་དེ་ལྟར་ཐོགས་པར་བཤད། དེར་སློབ་ཚོགས་མང་པོ་བསྐྱངས། ཕྱག་ལེན་ལ་ངེས་པའི་དབང་གིས་གསེར་མདོག་ཅན་གྱི་དགེ་བཤེས་མང་པོས་ཞབས་ལ་གཏུགས། ཁྲིད་གདམས་ངག་གི་ཕྲིན་ལས་ཆེའོ། །དེའི་ཡང་སྲིད་བསམ་ཆོས་སྐུ་ཕྲེང་གཉིས་པ་ཆོས་རྗེ་དོན་གྲུབ་རྣམ་རྒྱལ། གསུམ་པ་ངག་དབང་དཔལ་བཟང་མཆོག་གྲུབ། བཞི་པ་དཔག་བསམ་ཕྲིན་ལས་ཡར་འཕེལ། ལྔ་པ་ངག་དབང་བསྟན་འཛིན་འགྱུར་མེད། དྲུག་པ་ངག་དབང་འགྱུར་མེད་ལྷུན་གྲུབ། བདུན་པ་ངག་དབང་འགྱུར་མེད་ཡོན་ཏན་རྒྱ་མཚོ། སྐུ་ཕྲེང་བརྒྱད་པ་མཆོག་སྤྲུལ་བློ་གྲོས་དཔལ་ལྡན་རྣམས་རིམ་བཞིན་བྱོན་པའོ། །

{{#arraymap:ངག་དབང་རིན་ཆེན་བསྟན་པ་རྒྱལ་མཚན་

|; |@@@ | | }}