14923

ངག་བཅུ་ (1)

Part of speech	མིང་ཚིག
Definition	ཕལ་ཆེན་ལེའུ་ཞེ་གསུམ་པ་བྱུང་བ་སྟེ། འདི་ལྟར་སེམས་ཅན་ཐམས་ཅད་བདེ་བར་བྱེད་པས། བྱང་ཆུབ་སེམས་དཔའ་རྣམས་ཀྱི་ངག་ནི་འཇམ་པའོ། །སེམས་ཅན་ཐམས་ཅད་ཀྱི་སེམས་སིམ་པར་བྱེད་པས། བྱང་ཆུབ་སེམས་དཔའ་རྣམས་ཀྱི་ངག་ནི་སྙན་པའོ། །ཡང་དག་པ་ཇི་ལྟ་བ་བཞིན་དུ་གོ་བར་བྱེད་པས། བྱང་ཆུབ་སེམས་དཔའ་རྣམས་ཀྱི་ངག་ནི་མི་རྫུན་པའོ། །རྨི་ལམ་ན་ཡང་ལོག་པར་མི་སྨྲ་བས། བྱང་ཆུབ་སེམས་དཔའི་ངག་ནི་བདེན་པའི་རྗེས་སུ་འབྲང་བའོ། །བརྒྱ་བྱིན་དང༌། ཚངས་པ་དང༌། འཇིག་རྟེན་གྱི་མགོན་པོ་ཐམས་ཅད་ཟིལ་གྱིས་གནོན་པས། བྱང་ཆུབ་སེམས་དཔའ་རྣམས་ཀྱི་ངག་ནི་རྒྱ་ཆེ་བའོ། །ཆོས་ཀྱི་རང་བཞིན་སྟོན་པས། བྱང་ཆུབ་སེམས་དཔའ་རྣམས་ཀྱི་ངག་ནི་ཟབ་མོའི་དབྱངས་སུ་སྒྲོག་པའོ། །ཆོས་བསྟན་པ་ཐམས་ཅད་མི་ཟད་པས། བྱང་ཆུབ་སེམས་དཔའ་རྣམས་ཀྱི་ངག་ནི་སྙིང་པོ་དང་ལྡན་པའོ། །སྒྲ་ཇི་ལྟ་བ་བཞིན་དུ་ཁོང་དུ་ཆུད་པར་བྱེད་པས། བྱང་ཆུབ་སེམས་དཔའ་རྣམས་ཀྱི་ངག་ནི་ཤིན་ཏུ་གསལ་བའོ། །དུས་དང་ལས་དང་རྣམ་པར་སྨིན་པ་ཇི་ལྟ་བ་བཞིན་དུ་ཡོངས་སུ་སྟོན་པས། བྱང་ཆུབ་སེམས་དཔའ་རྣམས་ཀྱི་ངག་ནི་རྣམ་པ་ཐ་དད་པའོ། །བསམ་པ་ཇི་ལྟ་བ་བཞིན་དུ་རྣམ་པར་སྤྱོད་པ་ལ་འཇུག་པར་བྱེད་པས། བྱང་ཆུབ་སེམས་དཔའ་རྣམས་ཀྱི་ངག་ནི་འགྲོ་བ་ཐམས་ཅད་ལ་འགྲོ་བའོ། །
Domain	ཆོས་ལུགས།

ངག་བཅུ་ (2)

Part of speech

མིང་ཚིག

Definition

ཕལ་ཆེན་ལེའུ་ཞེ་གསུམ་པ་ལས་བྱུང་བ་སྟེ། འདི་ལྟར་དེ་བཞིན་གཤེགས་པའི་གསུང་ལ་མོས་པ་ཡོངས་སུ་དག་པ། བྱང་ཆུབ་སེམས་དཔའི་ཚིག་སྔོན་མ་ཐོས་པ་ལ་མངོན་པར་མོས་པ་ཡོངས་སུ་དག་པ། འགྲོ་བ་ཐམས་ཅད་ཀྱི་ཡིད་དུ་མི་འོང་བའི་ཚིག་ཡོངས་སུ་སྤངས་པས་ཡོངས་སུ་དག་པ། སྔོན་གྱི་མཐར་ངག་གི་ཉེས་པ་བཞི་དང་བྲལ་བས་ཡོངས་སུ་དག་པ། དགའ་བ་དང་མོས་པ་ཆེན་པོས་དེ་བཞིན་གཤེགས་པ་མངོན་དུ་བསྟོད་པས་ཡོངས་སུ་དག་པ། སྒྲ་ཆེན་པོས་དེ་བཞིན་གཤེགས་པ་མཆོད་པར་འོས་པ། ཡང་དག་པ་ཇི་ལྟ་བ་བཞིན་དུ་སངས་རྒྱས་ཀྱི་ཡོན་ཏན་དང༌། ལེགས་པ་བརྗོད་པས་ཡོངས་སུ་དག་པ། བསམ་པ་ཐག་པས་སེམས་ཅན་གཞན་ལ་ཆོས་ཀྱི་སྦྱིན་པས་སྡུད་པས་ཡོངས་སུ་དག་པ། སྒྲ་དབྱངས་དང༌། རོལ་མོ་བརྡུང་བ་དང༌། དཀྲོལ་བའི་དབྱངས་ཀྱིས་དེ་བཞིན་གཤེགས་པ་ལ་མངོན་པར་བསྟོད་པས་ཡོངས་སུ་དག་པ། སངས་རྒྱས་བཅོམ་ལྡན་འདས་རྣམས་ལས་མངོན་སུམ་དུ་ཆོས་ཐོས་ནས། རང་གི་ལུས་འབུལ་བས་ཡོངས་སུ་དག་པ། བྱང་ཆུབ་སེམས་དཔའི་ཆོས་སྨྲ་བ་ཐམས་ཅད་ལས་ཆོས་ཐོས་ནས་རིམ་གྲོ་བྱ་བའི་ཕྱིར། བདག་འབུལ་ཞིང་སྙིང་ཐག་པ་ནས་ཡོངས་སུ་གཏོང་བས་ཡོངས་སུ་དག་པ་སྟེ། བྱང་ཆུབ་སེམས་དཔའི་ངག་ནི་ལས་རྣམ་པར་དག་པ་བཅུ་པོ་དེ་དག་གིས་ཤིན་ཏུ་སྦྱངས་པར་འབྱུང་ངོ༌། །