14925

ངག་བཟླས་ (1)

Part of speech	མིང་ཚིག
Definition	སྔགས། རྣལ་འབྱོར་བླ་མེད་རྒྱུད། ངག་གི་བཟླས་པ་ལ། དམ་ཚིག་གི་བཟླས་པ་དང་། ཁྱོགས་ཀྱི་བཟླས་པ། ཁྲོས་པའི་བཟླས་པ། ཁྲོ་བོའི་བཟླས་པ་དང་། གོང་བུའི་བཟླས་པ་དང་ལྔ། དང་པོ་དམ་ཚིག་གི་བཟླས་པ་ནི། ལྷ་རང་རང་གི་ཐུགས་ཀའི་ས་བོན་གྱི་མཐར་བཟླ་བྱའི་སྔགས་ཀྱིས་བསྐོར་བ་ལ་དཀྱིལ་འཁོར་གྱི་ལྷའི་ཚོགས་སྤྲོས། འགྲོ་བའི་དོན་བྱས། སླར་རླུང་དང་ལྷན་ཅིག་ཏུ་འདུས་ནས་ཐུགས་ཀའི་ས་བོན་ལ་བསྡུ་བའི་བཟླས་པ་བྱའོ། །གཉིས་པ་ཁྱོགས་ཀྱི་བཟླས་པ་ནི། ཆོས་ཐམས་ཅད་མཉམ་པ་ཉིད་དུ་རྟོགས་པའི་ང་རྒྱལ་གྱིས་སྔགས་ཀྱི་ཕྲེང་བ་རང་གི་ཞལ་ནས་ཞུགས་རྡོ་རྗེའི་ལམ་ནས་ཡུམ་གྱི་པདྨར་འཐོན། ཡུམ་གྱི་རྩ་དབུ་མ་ནས་གྱེན་དུ་བརྒྱུད་དེ་ཞལ་ནས་འཐོན། རང་གི་ཞལ་དུ་ཞུགས་ཏེ་འཁོར་བ་ལ་དམིགས་ཏེ་སྔགས་འཕྲེང་རྣམས་ཞི་ཞིང་ལྷོད་པའི་རྣམ་པར་བཟླ་བ་ནི་ཁྱོགས་ཀྱི་བཟླ་ཚུལ་ལོ། །གསུམ་པ་ཁྲོས་པའི་བཟླས་པ་ནི། ཆོས་ཐམས་ཅན་མཉམ་པ་ཉིད་དུ་རྟོགས་པའི་ང་རྒྱལ་གྱིས་སྔགས་ཕྲེང་རྣམས་དང་པོ་ཡུམ་གྱི་ཞལ་དུ་ཞུགས། ཡུམ་གྱི་པདྨ་ནས་འཐོན་ཏེ་རང་གི་རྡོ་རྗེའི་ལམ་དུ་ཞུགས་རྩ་དབུ་མ་ནས་གྱེན་དུ་བརྒྱུད་དེ་རང་གི་ཞལ་ནས་འཐོན། ཡུམ་གྱི་ཞལ་དུ་ཞུགས་ཏེ་འཁོར་བར་བསམ་ཞིང་སྔར་ལྟར་སྔགས་ཕྲེང་རྣམས་སྡུག་ཅིང་རྩུབ་པའི་རྣམ་པར་བཟླ་བ་ནི་ཁྲོས་པའི་བཟླས་པ་ཡིན་ཏེ། དེ་ནི་རྩ་སྔགས་སམ་འཕྲེང་སྔགས་ཀྱི་བཟླ་ཚུལ་ཡིན་ནོ། །བཞི་པ་ཁྲོ་བོའི་བཟླས་པ་ནི། ཡི་གེ་འབྲུ་གསུམ་ལ་སོགས་པའི་སྔགས་རྣམས་རང་གཞན་གྱིས་ཐོས་པར་སྒྲ་དྲག་ཏུ་བཟླ་བ་ནི་ཁྲོ་བོའི་བཟླ་ཚུལ་ཡིན་ནོ། །ལྔ་པ་གོང་བུའི་བཟླས་པ་ནི། ལྷ་རང་རང་གི་ཐུགས་ཀའི་ས་བོན་གྱི་མཐར་སྔགས་འཕྲེང་གིས་བསྐོར་བའི་སྔགས་འཕྲེང་རྣམས་མགོ་གྱེན་དུ་བསྟན་ནས་འགྲེང་བའི་རྣམ་པ་ཅན་ལ་དམིགས་ནས་བཟླ་བ་ནི་གོང་བུའི་བཟླ་ཚུལ་ཡིན་ཏེ། དེ་ནི་སྙིང་པོ་དང་ཉེ་སྙིང་གི་བཟླས་པར་ཡང་བཤད་དོ། །དེ་ཡང་སྔགས་གང་དང་གང་བཟླ་བ་དེའི་ཚེ་དཀྱིལ་འཁོར་གྱི་ལྷ་དུ་ཡོད་ཀྱི་ཞལ་དུ་ཡོད་ནས་སྔགས་རྣམས་འདོན་པའི་རྣམ་པ་ཡིད་ལ་བྱས་ན་དེ་སྙེད་ཀྱི་ཕན་ཡོན་འབྱུང་བར་གྲུབ་ཆེན་ལྭ་བའི་ན་བཟའ་ཅན་གྱིས་བཤད་དོ། །བཟླས་པའི་གྲངས་ནི། རང་ཉིད་བདག་འཇུག་ལེན་པ། སློབ་མ་ལ་དབང་བསྐུར་བ། ལྷ་ལ་རབ་གནས་བྱ་བ་རྣམས་ལ་གཙོ་བོ་ལ་འབུམ། འཁོར་རྣམས་ལ་ཁྲི་ཕྲག་རེ། ཡེ་ཤེས་འབེབས་པ་དང་། བགེགས་མཐར་བྱེད་ཀྱི་ཕྲེང་སྔགས་ཁྲི་ཕྲག་གཅིག དེ་རྣམས་ཀྱི་ཀྱི་ཁ་སྐོང་གི་བཅུ་ཆའི་སྦྱིན་སྲེག་དང་བཅས་པ་བྱ་བར་གསུངས་སོ། །
Domain	ཆོས་ལུགས།