15846

ཅུ་གང་ (1)

Part of speech	མིང་ཚིག
Definition	རྒྱ་ནག་སྐད་ཀྱི་ཇུ་དབང་ཞེས་པ་ཟུར་ཆག་པ་སྟེ། བོད་སྐད་དུ་བསྒྱུར་ན་སྨྱུག་བཅུད་ཅེས་པའི་དོན་ཡིན་ལ། འདི་ལ་རིགས་གསུམ་སྟེ། མཆོག་ནི་རྩིའི་གཙོ་བོར་བཤད་བཞིན། ཡུལ་ཝཱ་རཱ་ཎ་སི་དང༌། མ་ག་དྷཱ་སོགས་སུ་ས་ལ་བཏབ་པའི་ཤིང་སྨྱུག་མ་ལྟ་བུའི་རྐང་ལས་འབྱུང་བ་ཡིན་ཏེ། །དཀའ་འགྲེལ་ལས། ཅུ་གང་ཝཱ་རཱ་ཎ་སིའ་ལ། སར་བཏབ་ཅེས་བྱ་འོད་མའི་རིགས། །དེ་ཡི་རྒྱུ་རུ་གྱུར་པ་ཞིག ། སོ་ནམ་བྱས་པའི་སྦུབས་ནས་འབྱུང༌། །ཞེས་གསུངས་པ་བཞིན། ཁ་དོག་དཀར་ལ་སེར་ཁ་ཅུང་ཟད་ཡོད་པ་དབྱིབས་ཧ་ཤིག་བརྡར་ཕྱེ་འདྲ་བ། འཇམ་ཞིང་སྣུམ་ལ་འབོལ་བ། ལག་པ་སོགས་ལ་མི་འགོས་ཤིང༌། ཞིབ་ཀྱང་དར་རས་རྐང་སག་གེ་བའི་ནང་དུ་གཏུམ་ཀྱང་མི་འཐུལ་བ། ཁར་འཇུ་ཞིང་བྲོ་བའི་རི་མོ་གསལ་བ། ཡུན་དུ་མྱངས་ན་ཅུང་ཟད་མངར་ཉམས་ཡོད་པའོ། །འབྲིང་པོ་ནི། དཀའ་འགྲེལ་ལས། མཚན་མ་པྲེ་ཏ་པུ་རིའི་ཡུལ། །རང་བྱུང་དྲི་ཆུའི་ནང་ནས་སྐྱེ། །ཕུང་པོ་ཤིན་ཏུ་ཆེ་བ་ལ། །ཚ་སྣ་འོང་བའི་ས་ལས་སྐྱེ། །ཞེས་གསུངས་པས། གནས་ཆེན་གངས་རི་ཏི་སེའི་ལོགས་སུ་མཚན་མའི་གནས་ཏེ། ཡབ་དབང་ཕྱུག་ཆེན་པོའི་ལིངྒའི་དབྱིབས། བྲག་ལས་དེའི་ཁམས་ཀྱི་ཚུལ་དུ་ཆུ་དང་བསྡོངས་ནས་འབབ་པ་ཆུ་ཅུ་གང༌། ཡུམ་ཨུ་མའི་ཀཀྐོ་ལའི་དབྱིབས་ཀྱི་གྲོག་མོ་ལས་འཕོས་པའི་ཅུ་གང་ད་ལྟ་གངས་རི་བསྐོར་བ་རྣམས་ཀྱིས་འཁྱེར་ཡོང་བ་འདི་ནི་སྔ་མ་ཝཱ་རཱ་ཎ་སི་མ་དེ་ལས་ཅུང་དམན་ཡང་ནུས་པ་བཟང་སྟེ། དཀའ་འགྲེལ་གོང་འཕྲོས་སུ། པྲེ་ཏ་པུ་རིའི་ཅུ་གང་ཡང༌། །དེ་ལས་དམན་ཏེ་གོང་བཤད་པ། །ཧ་ཤིག་བརྡར་བའི་ཕྱེ་མ་འདྲ། །མང་དུ་སྤུངས་ན་ཅུང་ཟད་སེར། །འཇམ་ཞིང་དཀར་བ་ཤིས་པར་བྱ། །ཞེས་དང༌། དུང་མིག་ལས། ཆུ་ཅུ་གང་འབྲིང་སྟེ་བག་ཕྱེ་སིག་མེད་འདྲ། །ཞེས་སོ། །ཐ་མ་ནི་བོད་ཁམས་མ་ངེས་པའི་གནས་བཟང་གར་ཡང་འབྱུང་བ་ནི། བྲག་ཕུག་གཏིང་རིང་བ་ཕལ་ཆེར་ལས་འབྱུང་སྟེ། ཉི་ལྷགས་རླུང་གསུམ་གྱིས་མ་གདུངས་པའི་བྲག་ཆུ་རླན་དང་མ་བྲལ་བའི་བྲག་ངོས་ལ་ཆགས་པ། བཟང་ཤོས་ནི་རས་སག་ཏུ་གཏུམ་ལ་བཙིར་བས་ཆུ་སྔོ་སངས་ཀྱིས་དོན་ནས་འགྲོ་བ། ཡང་ལ་འཇམ་ཞིང་རོ་མེད་པ་ཡོང་བས། ཆུ་དེ་བཅིངས་པར་བསིལ་སྐམ་བྱེད་པར་གསུངས། དེ་རིགས་ཕལ་ཆེར་རྒས་ནས་རྡོར་གྱུར་པའི་སྲ་མཁྲེགས་ཅན་དང༌། ལན་ཚ་བྲོ་བ་སོགས་ནི་གཞན་རྐྱེན་གྱིས་བསྒྱུར་བ་ཡིན་པས་ངན་ལ་སྤང་བྱའོ། །བི་ཇི་སྨན་གཞོན་པས། ཐབས་ཀྱི་ཆུ་ལས་བྱུང་བ་ཡི། ཀུནྡ་ཅུ་གང་ཤེས་རབ་ཀྱི༌། མཚན་དབྱིབས་བྲག་ཕུག་ལ་ཆགས་པ། །འཁོར་ལོ་སྡོམ་དང་ཕག་མོའི་བཅུད། །ཡིན་ཞེས་རང་བྱུང་བཟང་པོས་བཤད། །བྱིན་རླབས་ཅན་གྱི་གནས་མ་གཏོགས། །དམན་ལས་འབྱུང་བ་མ་མཐོང་ངོ༌། །ཞེས་གསུངས་པ་བཞིན། ཅུ་གང་གློ་ཚད་ཀུན་སེལ་རྨ་ཚད་གཅོག ། ཅེས་པར། བདུད་རྩི་ཐིགས་པ་ལས། ཅུ་གང་བསིལ་རླན་མིག་སེར་ནད་ལ་ཕན། །ཞེས་གསུངས། མིང་རྣམ་གྲངས་ནི། བྷཾབ་ལོ་ཙཱ་ན། །ཏག་ཤིར། ཏཱ་མ་ཀྵི་རི། བཾ་ཤ་རོ་ཙ་ན། སྨྱིག་མ། རྩི་འཇམ་ཟེར། འཕགས་པ་རང་བྱུང་བཟང་པོས་ཅུ་གང་བདེ་བྱེད་ཀྱི་སྦྱོར་ཆེན་འཁོར་ལོ་ཡིག་སྣ་དང་བཅས་པར་བཤད་ཅེས་སྨན་ནག་པས་གསུངས་པས།
Foreign	ཟུར་ཆག