16737

ཆུ་བཟང་སྐུ་ཕྲེང་དང་པོ་རྣམ་རྒྱལ་དཔལ་འབྱོར་ (1)

Part of speech

མིང་ཚིག

Definition

འདི་བ་རབ་བྱུང་བཅུ་པའི་ས་སྟག་ཕྱི་ལོ་ ༡༥༧༨ ལོར། སྟོད་ལུང་དཀར་ལེབ་ཁང་གསར་དུ། ཡབ་བསོད་ནམས་མགོན་པོ་དང་ཡུམ་མ་མ་བྲེ་སང་གཉིས་ཀྱི་སྲས་སུ་འཁྲུངས། རྭ་པ་སྟོད་དང་འབྲས་སྤུངས་སྒོ་མང་དུ་ཐུགས་གཉེར་གྱིས་མཁས་པའི་གྲགས་པ་རྒྱས། གཙང་པ་རྒྱལ་པོས་ས་སྐྱ་དང་བཀའ་བརྒྱུད་པའི་དགེ་བཤེས་གཉིས། དགེ་ལུགས་པ་དང་རྩོད་དུ་བཅུག་པར་འདི་བས་ཕམ་པར་བྱས། རྒྱལ་བ་ཡོན་ཏན་རྒྱ་མཚོའི་བཀས། མདོ་སྨད་དུ་ཕེབས་ཏེ་མཚོ་སྲིབ་དང་ཐར་ཁེར་དུ་འགྲོ་དོན་མཛད། དེ་ནས་སྐུ་འབུམ་དང་དགོན་ལུང་གཉིས་ཀྱི་གདན་ཁྲིར་ཕེབས། ཕྱི་ལོ་ ༡༦༤༩ ལོར་ཆུ་བཟང་དགོན་དགའ་ལྡན་མི་འགྱུར་གླིང་བཏབ། དོན་བཞི་པ་ལྕགས་ཡོས་ཕྱི་ལོ་ ༡༦༥༡ ལོར་དགོངས་པ་རྫོགས། གསུང་རྩོམ་འཇིགས་བྱེད་རྫོགས་རིམ་གྱི་ཁྲིད་ཡིག་ཡོད།