16872

ཆུ་ཡག་ཐུགས་རྗེ་འགྲོ་འདུལ་གླིང་ (1)

Part of speech

མིང་ཚིག

Definition

གནའ་དུས་མ་ཎི་རྡོ་འབུམ་དང་། ཁང་བརྩེགས་མཆོད་རྟེན་མང་པོ་ལ་དད་ལྡན་རྣམས་ཀྱིས་ཕྱག་སྐོར་སྒྲིབ་སྦྱོང་བྱེད་པའི་རྟེན་ཁྱད་པར་འཕགས་པ་དང་མཐོང་ཐོས་དྲན་རེག་གི་འགྲོ་བ་སྒྲོལ་བའི་ཕྲིན་ལས་ཅན་དང་། ཚེ་དཔག་མེད། ཐུགས་རྗེ་ཆེན་པོ། རྗེ་བཙུན་སྒྲོལ་མ་རྣམས་ཀྱི་གནས་སུ་གྲགས། མཁས་གྲུབ་ཀརྨ་ཆགས་མེད། སྟག་ཤམ་ནུས་ལྡན་རྡོ་རྗེ་སོགས་སྐྱེས་ཆེན་མང་པོས་ཞབས་ཀྱིས་བཅགས་ཤིང་བྱིན་གྱིས་བརླབས་པའི་ལོ་རྒྱུས་མང་པོ་ཡོད། ཁྱད་པར་དུས་འགྱུར་རྗེས་ཕྱི་ལོ་༡༩༨༤ བསྟན་པ་བསྐྱར་གསོའི་སྐབས་རྦ་ཤ་བླ་མ་ཨོ་རྒྱན་དཔལ་འབྱོར་གྱི་ཡང་སྲིད། མཆོག་སྤྲུལ་པདྨ་རྣམ་རྒྱལ་རིན་པོ་ཆེས། ལྷ་ཁང་། ཆ་བརྒྱད་མཆོད་རྟེན། ཡིག་བརྒྱའི་དུང་འཁོར་སོགས་རྟེན་བཞེངས་པ་དང་། ཚེས་བཅུ། ཉེར་ལྔ། སྒྲུབ་པ་དུས་མཆོད་སོགས་བཙུགས། དེ་ལ་བརྟེན་ནས་སྨྱུང་གནས་དང་། དུས་མཆོད། རྟེན་བཞེངས་སོགས་གོང་འཕེལ་དུ་གྱུར། བླ་གྲྭ་ཕལ་ཆེ་བ་རྒྱལ་བ་ཀཿཐོག་པའི་མཁན་ཆེན་པདྨ་རང་གྲོལ། མཁན་ཆེན་ཚུལ་ཁྲིམས་མཐར་ཕྱིན། མཁན་ཆེན་འཇམ་དབྱངས་རྒྱལ་མཚན་སོགས་ལས་སྨིན་གྲོལ་གྱི་གདམ་པ་མང་དུ་གསན་པས་རྒྱལ་བ་ཀཿཐོག་པའི་ཆོས་བརྒྱུད་འཛིན་པའོ། །