17356

ཆོ་འཕྲུལ་གསུམ་ (1)

Part of speech	མིང་ཚིག
Definition	མདོ། མངོན་པ། དྲུག་གི་ཚོགས་ཀྱི་བཞི་པ་རེག་པ་བཞི་པའི་མདོའི་རལ་པ་ཅན་སྟོང་རབ་ཏུ་བྱུང་བའི་དགེ་སློང་རྣམས་ལ་གདམས་པ་ལས། རྫུ་འཕྲུལ་གྱི་ཆོ་འཕྲུལ་དང་། ཀུན་བརྗོད་པའི་ཆོ་འཕྲུལ་དང་། རྗེས་སུ་བསྟན་པའི་ཆོ་འཕྲུལ་རྣམ་པ་གསུམ་གསུངས་པ་ལས་མངོན་པར་ཤེས་པ་དྲུག་གི་དང་པོ་རྫུ་འཕྲུལ་གྱི་ཡུལ་ཤེས་པའི་མངོན་པར་ཤེས་པ་དང་། གསུམ་པ་སེམས་ཀྱི་རྣམ་གྲངས་ཤེས་པ་དང་། དྲུག་པ་ཟག་ཟད་ཀྱི་མངོན་ཤེས་རྣམས་ནི་རིམ་པ་བཞིན་དུ་རྫུ་འཕྲུལ་དང་། ཁྱོད་ཀྱི་སེམས་ནི་འདི་འདྲའོ་ཞེས་ཀུན་བརྗོད་པ་དང་། ལམ་ཡང་དག་པ་ཇི་ལྟ་བ་བཞིན་སྟོན་པས་རྗེས་སུ་བསྟན་པའི་ཆོ་འཕྲུལ་རྣམས་ཡིན་ནོ། །ཅིའི་ཕྱིར་ཆོ་འཕྲུལ་ཞེས་བྱ་ཞེ་ན། དང་པོར་གདུལ་བྱ་གཞན་གྱི་ཡིད་འཕྲོག་པར་བྱེད་པའི་ཕྱིར་ཏེ་ཧ་རའི་དོན་ཏོ། །དེ་ལ་དང་པོས་ནི་ཕ་རོལ་གྱི་ཡིད་འདུན་པའི་སྒོ་ནས་འཕྲོག་པར་བྱེད་ཅིང་། གཉིས་པས་ནི་ཕ་རོལ་གྱི་བསམ་པ་ཤེས་ནས་ཆོས་བསྟན་པའི་སྒོ་ནས་ཡིད་འཕྲོག་པར་བྱེད་ལ། གསུམ་པས་ནི་བསྟན་པ་བཞིན་བསྒྲུབས་པས་སྨིན་ཅིང་གྲོལ་བའི་སྒོ་ནས་ཡིད་འཕྲོག་པའི་ཕྱིར་རོ། །ཡང་ན་འདི་དག་གིས་རིམ་པ་ལྟར་བསྟན་པ་ལ་ཞེ་འགྲས་པ་དང་བར་མར་གནས་པ་དང་ཞུགས་པ་རྣམས་ཀྱི་ཡིད་འཕྲོག་པའི་ཕྱིར་རམ། ཡང་ན་འདུན་པ་དང་འཇུག་པ་དང་ཞུགས་པ་རྣམས་ཀྱི་ཡིད་འཕྲོག་པའི་ཕྱིར་རོ། །ཆོ་འཕྲུལ་གསུམ་པོ་འདི་དག་གི་ནང་ན་རྗེས་སུ་བསྟན་པའི་ཆོ་འཕྲུལ་ཁོ་ན་མཆོག་ཡིན་ཏེ། ཉོན་མོངས་པ་ཟད་པ་མེད་ན་མི་འབྱུང་ཞིང་། བར་ཆད་མེད་པའི་ལམ་ཟག་མེད་ཁོ་ན་ལས་སྐྱེས་པས་རྒྱུ་དེ་ལ་མ་འཁྲུལ་བའི་ཕྱིར་དང་། འདིར་ཉོན་མོངས་པ་དང་བྲལ་བས་ཕན་པའི་ཕྱིར་དང་། ཕྱི་མར་སྡུག་བསྔལ་གྱི་ཁུར་དང་བྲལ་བས་གཏན་དུ་ཡིད་དུ་འོང་བའི་འབྲས་བུ་ལ་སྦྱོར་བར་བྱེད་པའི་ཕྱིར་རོ། །ཆོ་འཕྲུལ་དང་པོ་གཉིས་ནི་གྷནྡྷ་རི་ཞེས་བྱ་བའི་རིག་སྔགས་ཀྱིས་ནམ་མཁའ་ལ་འགྲོ་བ་དང་། རྟོག་བྱེད་ཅེས་བྱ་བའི་རིག་སྔགས་ཀྱིས་ཕ་རོལ་གྱི་སེམས་ཤེས་པ་དང་། སྨན་དང་མི་མ་ཡིན་པའི་ནུས་པས་ཀྱང་དེ་ལྟར་འགྱུར་བའི་ཕྱིར་ཟག་མེད་ཀྱི་རྒྱུ་ལ་མི་འཁྲུལ་བའང་མ་ཡིན་ལ། གདུལ་བྱ་འདུན་པ་དང་བསམ་པ་ཤེས་པ་ཙམ་གྱིས་དངོས་སུ་ཕན་པ་དང་ཡིད་དུ་འོང་བའི་འབྲས་བུ་ལ་མི་སྦྱོར་བས་མཆོག་མ་ཡིན་ནོ་ཞེས་མཛོད་འགྲེལ་མངོན་པའི་རྒྱན་ལས་སོ། །
Domain	ཆོས་ལུགས།