17503

ཆོས་ཀྱི་བདག་མེད་རྟོགས་པའི་ལྟ་བ་ (1)

Part of speech	མིང་ཚིག
Definition	མདོ། དབུ་མ། བདེན་འཛིན་གྱི་སྤྲོས་པ་གཅོད་པའི་ལྟ་བ་ནི། མྱུ་གུ་ལྟ་བུ་དཔྱད་གཞིར་བཟུང་ནས་གཅིག་དང་དུ་མ་གང་དུ་གྲུབ་དཔྱོད་པའི་རིགས་པ་དང་། མཐའ་བཞི་གང་ལས་སྐྱེས་དཔྱོད་པའི་རིགས་པ་དེའི་ངོར་ཅི་ཡང་མ་རྙེད་པ་དེའི་ཚེ། ཅི་ཡང་མ་རྙེད་པ་དེའི་ངང་ལ་མཉམ་པར་འཇོག་པ་ཡིན་ལ། དེ་ལྟར་མཉམ་པར་བཞག་པའི་མཉམ་གཞག་དེའི་ངོ་བོ་ནི་ཡུལ་སྟོང་ཉིད་དང་། ཡུལ་ཅན་ཡེ་ཤེས་ཀྱི་དབྱེ་བ་སོ་སོ་ཐ་དད་པ་གཉིས་ཡོད་པ་མ་ཡིན་གྱི། སྟོང་པ་ཉིད་དང་དབྱེར་མེད་པའི་ཡེ་ཤེས་དེ་ཉིད་ལ་ཆོས་ཀྱི་བདག་མེད་རྟོགས་པའི་ལྟ་བ་ཞེས་བྱའོ། །དེའི་རྗེས་ཐོབ་ཏུ་ཡིད་ལ་བྱ་བའི་རིམ་པ་ནི། མཉམ་གཞག་དེ་ལས་ལངས་པ་ན་མྱུ་གུ་ལྟ་བུ་བདེན་པའི་གཅིག་དང་དུ་མ་དང་བྲལ་ལོ་ཞེས་བྱ་བ་དང་། བདེན་པར་མེད་དོ་ཞེས་བྱ་བ་ཡིད་ལ་བྱེད་ལ། དེ་ལ་ཡང་ཡུལ་དང་ཡུལ་ཅན་གཉིས་ཀྱི་སྣང་བ་མི་འཆར་བ་རྟོག་མེད་ཀྱི་ཤེས་རབ་དང་། གཉིས་ཀྱི་སྣང་བ་འཆར་བ་རྟོག་བཅས་ཀྱི་ཤེས་རབ་གཉིས་ལས། དང་པོ་ལྟ་བ་དངོས་ཡིན་ལ། གཉིས་པ་ནི་ལྟ་བ་དངོས་མ་ཡིན་ཏེ། མཚན་མར་འཛིན་པའི་བློ་ཡིན་པའི་ཕྱིར། བདེན་མེད་ཀྱི་སྤྲོས་པ་གཅོད་པའི་ལྟ་བ་ནི། མཉམ་གཞག་ཏུ། མྱུ་གུ་བདེན་པས་སྟོང་པ་དེ་ལྟ་བུ་དཔྱད་གཞིར་གཟུང་ནས་གང་དུ་གྲུབ་དཔྱོད་པའི་རིགས་པ་དེས་དཔྱད་པ་ན། གང་དུ་ཡང་མ་རྙེད་པ་དེའི་ཚེ་དེ་ཉིད་ཀྱི་ངང་ལ་མཉམ་པར་འཇོག་པ་ཡིན་ལ། དེ་དུས་ཀྱི་ཡུལ་སྤྲོས་བྲལ་དང་གཉིས་སུ་མེད་པའི་མཉམ་གཞག་གི་ཡེ་ཤེས་དེ་ལ། སྤྲོས་བྲལ་དང་། བརྗོད་བྲལ་གྱི་ལྟ་བ་ཞེས་བྱ་སྟེ། སོ་སོར་རྟོག་པའི་ཤེས་རབ་ཀྱིས་དཔྱད་པ་སྔོན་དུ་བཏང་ནས་སྤྲོས་པའི་མཐའ་གང་ཡང་མ་གཟིགས་པའི་ཤེས་རབ་ཡིན་པའི་ཕྱིར། རྗེས་ཐོབ་ཏུ་བདེན་པའི་སྤྲོས་པ་དང་། བདེན་མེད་ཀྱི་སྤྲོས་པ་གང་ཡང་མེད་དོ་ཞེས་བྱ་བ་ཡིད་ལ་བྱེད་ཅིང་། ཐ་སྙད་འདོགས་པར་བྱེད་ལ། དེའི་ཚེ་ཡང་དེ་ལྟར་ཡིད་ལ་བྱེད་པའི་ཤེས་རབ་རྟོག་པའི་ངོ་བོར་སྐྱེས་པ་དེ་ནི། ལྟ་བ་དངོས་མ་ཡིན་ཏེ། སྤྲོས་བྲལ་གྱི་མཚན་མ་འཛིན་པའི་རྟོག་པ་ཡིན་པའི་ཕྱིར། རྗེས་ཐོབ་ཏུ་དབང་ཤེས་ལ་སྤྲོས་པའི་མཚན་མ་སྣང་ཡང་། ཡིད་ཀྱི་ཤེས་པས་བདེན་མེད་སྒྱུ་མ་ལྟ་བུ་མངོན་སུམ་དུ་རྟོགས་པའི་སྣང་བཅས་ཀྱི་རྣལ་འབྱོར་མངོན་སུམ་འབྱུང་ལ། དེ་ལྟ་བུ་དེ་ཡང་ལྟ་བ་དངོས་ཡིན་ཏེ། སོ་སོར་རྟོག་པའི་ཤེས་རབ་ཀྱིས་དཔྱད་པ་སྔོན་དུ་བཏང་ནས་སྤྲོས་པའི་མཚན་མ་ཅི་ཡང་མི་འཛིན་པའི་ཤེས་རབ་ཡིན་པའི་ཕྱིར་རོ་ཞེས་པཎ་ཆེན་ཤཱཀྱ་མཆོག་གི་དབུ་མ་རྣམ་ངེས་ལས་སོ། །
Domain	ཆོས་ལུགས།