17916
< Dictionaries | Monlam Grand
Jump to navigation
Jump to search
| Part of speech | མིང་ཚིག |
|---|---|
| Definition | མདོ། མངོན་པ། གྲོང་ཁྱེར་བལྟ་ན་སྡུག་གི་ཕྱི་རོལ་གྱི་ལྷོ་ནུབ་ཀྱི་མཚམས་ན་གང་དུ་ལྷ་རྣམས་འཁོད་ནས་བྱ་བ་དང་བྱ་བ་མ་ཡིན་པ་འགྲོ་བར་བྱེད་པ་ཆོས་བཟང་ལྷའི་མདུན་ས་ཞེས་བྱ་བ་ཆུ་ཞེང་དུ་དཔག་ཚད་སུམ་བརྒྱ་སུམ་བརྒྱ་མཐའ་སྐོར་དུ་དགུ་བརྒྱ་ཡོད་པ་ལྷའི་གྲོང་ཁྱེར་ལས་དཔག་ཚད་ཕྱེད་དང་བཞིས་གྱེན་དུ་འཕགས་པ་མཛེས་ཤིང་བལྟ་ན་སྡུག་པ་ས་གཞི་དང་ཡ་ཐོག་དང་བགབ་པ་དང་སྤྱི་བསྡུས་ཀྱི་གདུང་དང་ཡང་ཐོག་གི་རྩེ་བཞི་དང་ཕྱམ་རྟེན་དང་ཕྱམ་དགུ་པོ་ཐམས་ཅད་ཤེལ་ལས་བྱས་པས། སྤྲིན་དཀར་པོའི་ཕུང་པོ་ལྟར་དཀར་བ། རིན་པོ་ཆེ་སྣ་བཞིའི་ལན་ཀན་གྱིས་བསྐོར་བ་ཕྱམ་དགུ་པོ་རེ་རེའང་ཀ་བ་བཅུ་དྲུག་བཅུ་དྲུག་གིས་བརྟེན་པ། དབུས་ན་བཻ་ཌཱུརྻའི་ཀ་བ་ཟུར་བརྒྱད་པ་གསལ་ཞིང་འཕན་མེད་པ་སྤྱི་བསྡུས་ཀྱི་གདུང་ལ་སྐྲ་རྩེ་ཙམ་གྱིས་མ་རེག་པ་དེའི་དྲུང་ན་བརྒྱ་བྱིན་ཆོས་སྟོན་པའི་གསེར་གྱི་ཁྲི་བཤམས་པ་ཡོད་དོ། །དེའི་མཐར་ཉེ་དབང་གཞན་རྣམས་ཀྱི་གསེར་གྱི་ཁྲི་བཤམས་ཏེ་དེར་སུམ་ཅུ་རྩ་གསུམ་པའི་ལྷ་རྣམས་འདུས་ནས་ལྷ་དང་མི་རྣམས་ཀྱི་དོན་དང་ཆོས་སེམས་ཤིང་དཔྱོད་པ་དང་ཆོས་དང་ཆོས་མ་ཡིན་པའི་མདུན་མ་བགྲོ་བར་བྱེད་དོ། །དེར་སུམ་ཅུ་རྩ་གསུམ་པའི་ལྷ་རྣམས་གནས་པ་ན་སུམ་ཅུ་རྩ་གསུམ་པའི་སྲུང་མ་རྒྱལ་པོ་ཆེན་པོ་བཞིའི་གཡོག་ཞོ་ཤས་འཚོ་བ་རྣམས་དང་། རྒྱལ་ཆེན་བཞིའི་བུ་རྣམས་དང་། རྒྱལ་པོ་ཆེན་པོ་བཞི་པོ་རྣམས་ཀྱིས་གོ་རིམ་བཞིན་དུ་ཟླ་བ་ཕྱེད་ཀྱི་ཚེས་བརྒྱད་དང་བཅུ་བཞི་དང་བཅོ་ལྔ་ལ་འཇིག་རྟེན་འདི་ཐམས་ཅད་མྱུལ་ཞིང་འཇིག་རྟེན་པ་རྣམས་ཆོས་དང་མཐུན་པ་དང་མི་མཐུན་པ་སྒྲོགས་པར་བྱེད་དོ། །དེའི་ཚེ་ཆོས་དང་མི་མཐུན་པ་ཐོས་ན་ལྷ་རྣམས་མི་དགའ་ཞིང་སྨོད་ལ། ཆོས་དང་མཐུན་པ་ཐོས་ན་དགའ་ཞིང་བསྔགས་པར་བརྗོད་དོ། །ལྷའི་གྲོང་ཁྱེར་ནས་མདུན་ས་ཆོས་བཟང་དུ་རྒྱུ་བའི་ལམ་སྲིད་དུ་དཔག་ཚད་བཅུ་གཉིས་ཞེང་དུ་དཔག་ཚད་གཉིས་ཡོད་པ་གསེར་གྱི་བྱེ་མ་བདལ་ཞིང་ཙན་དན་གྱི་ཆུས་ཆག་ཆག་བཏབ་པ་གཡས་གཡོན་ན་མེ་ཏོག་དང་འབྲས་བུའི་ཤིང་སྣ་ཚོགས་སྐྱེས་ཤིང་ཐང་ལས་སྐྱེས་པའི་བྱ་སྣ་ཚོགས་སྐད་སྙན་པ་ཡོད་དེ། འདིའི་ལྟར་ན་མདུན་ས་ནི་གྲོང་ཁྱེར་ནས་དཔག་ཚད་བཅུ་གཉིས་ན་ཡོད་པར་མངོན་ནོ། །དེ་ལྟ་བུའི་མདུན་ས་དེ་ཡང་གདགས་པ་ལས། ཤར་ལྷོའི་མཚམས་ན་ཡོད་པར་བཤད་ལ། སའི་དངོས་གཞི་ལས་ནི་གྲོང་ཁྱེར་གྱི་བྱང་ཤར་གྱི་མཚམས་ན་མདུན་ས་དང་། ཤིང་ཡོངས་འདུ་ས་བརྟོལ་ནི་གྲོང་གི་ནང་ན་ཡོད་པར་བཤད་དེ་ཕྱོགས་གང་ན་ཡོད་པ་ནི་མ་བཤད་དོ། །དྲང་སྲོང་རྒྱས་པས་ཞུས་པའི་མདོ་ལས་ནི་མདུན་ས་དབྱིབས་གྲུ་བཞི་ལྷམ་པ་མཐའ་སྐོར་དུ་དཔག་ཚད་བརྒྱ་ཡོད་པར་གསུངས་སོ། །ཞེས་མཛོད་འགྲེལ་མངོན་པའི་རྒྱན་ལས་སོ། ། |
| Domain | ཆོས་ལུགས། |