18943

ཉན་རང་སངས་རྒྱས་ལས་འཁྲུངས་པ་ (1)

Part of speech	མིང་ཚིག
Definition	མདོ། དབུ་མ། ཐུབ་དབང་དེ་ལས་ཉན་ཐོས་དང་རང་སངས་རྒྱས་སྐྱེས་སོ། །ཅི་ལྟར་སྐྱེས་ཤེ་ན། དེ་པས་རྟེན་ཅིང་འབྲེལ་བར་འབྱུང་བ་གསུངས་པའི་དོན་ཐོས་པའི་ཤེས་རབ་ཀྱིས་བཟུང་ཞིང་བསམ་པ་ལས་བྱུང་བའི་ཤེས་རབ་ཀྱིས་ལེགས་པར་བསམ་པའི་དོན། བསྒོམ་བྱུང་གིས་ཚུལ་བཞིན་དུ་ཉམས་སུ་བླངས་པ་ལས་སྐལ་པ་དང་འཚམས་པའི་ཡོན་ཏན་རྫོགས་པར་འགྱུར་བའི་ཕྱིར། དེ་མི་འཐད་དེ། རྟེན་འབྲེལ་ཐོས་བསམ་བྱས་པ་འགའ་ཞིག་བྱང་ཆུབ་ཐོབ་པར་མ་དམིགས་སོ་ཞེ་ན། གལ་ཏེ་ཡང་འགའ་ཞིག་རྟེན་ཅིང་འབྲེལ་བར་འབྱུང་བ་ཐོས་བསམ་དབང་གིས་དབུ་མའི་དོན་ལ་མཁས་སུ་ཟིན་ཀྱང། མཐོང་བའི་ཆོས་ཁོ་ན་ལ་མྱ་ངན་ལས་འདས་པ་ཐོབ་པ་མི་འགྱུར་མོད། འོན་ཀྱང་ལས་བཞིན་དུ་ཚེ་རབས་གཞན་དུ་གདོན་མི་ཟ་བར་འབྲས་བུ་ཡོངས་སུ་སྨིན་པར་འགྱུར་རོ། །ཞེས་ཀུན་མཁྱེན་རོང་སྟོན་གྱིས་དབུ་འཇུག་རྣམ་བཤད་ལས་གསུངས་སོ། ། ཉན་ཐོས་དང་རང་སངས་རྒྱས་རྣམས་བཅོམ་ལྡན་འདས་ཐུབ་པའི་དབང་པོ་ལས་འཁྲུངས་ཏེ། དེས་རྟེན་ཅིང་འབྲེལ་བར་འབྱུང་བ་ཕྱིན་ཅི་མ་ལོག་པར་བསྟན་པའི་དོན་ཉན་པ་དང་། སེམས་པ་དང་། བསྒོམ་པའི་རིམ་པས་ལྷག་པར་མོས་པ་ཇི་ལྟ་བ་བཞིན་ཉན་ཐོས་དང་རང་སངས་རྒྱས་ཀྱི་བྱང་ཆུབ་ཡོངས་སུ་རྫོགས་པར་འགྱུར་བའི་ཕྱིར་རོ། །མཐོང་ཆོས་ཞི་དེ་ལྟར་ཡིན་ཀྱང་། ཉན་ཐོས་གཞན་རྣམས་དང་། རང་སངས་རྒྱས་ལ་ཇི་ལྟར་ཞེ་ན། དེ་དག་ཀྱང་མྱོང་བར་ངེས་པའི་ལས་ཚེ་རབས་གཞན་དུ་རྣམ་སྨིན་འཛིན་པ་ལྟར་ཚེ་འདིར་རྟེན་ཅིང་འབྲེལ་བར་འབྱུང་བ་ཉེ་བར་བསྟན་པ་ཉན་པ་ལས་དོན་དམ་པའི་དོན་ལ་མཁས་སུ་ཟིན་ཀྱང། མཐོང་བའི་ཆོས་ཚེ་འདི་ཁོ་ན་ལ་མྱ་ངན་ལས་འདས་པ་ཐོབ་པར་མི་འགྱུར་མོད་ཀྱི་ཚེ་རབས་གཞན་དུ་ངེས་པར་འཐོབ། དེས་ན་རང་རྒྱལ་གྱི་རིགས་ཅན་རྣམས་ཀྱང་བསྐལ་པ་བརྒྱའི་བར་དུ་སངས་རྒྱས་ལས་རྟེན་ཅིང་འབྲེལ་བར་འབྱུང་བའི་ཆོས་ཐོས་ནས་སྲིད་པ་ཐ་མ་པའི་རྟེན་ལ་སངས་རྒྱས་དང་ཉན་ཐོས་མེད་པའི་ཞིང་ཁམས་སུ་རང་བྱུང་གི་བྱང་ཆུབ་མངོན་དུ་བྱེད་པས་སངས་རྒྱས་ལས་འཁྲུངས་ཞེས་ཀུན་མཁྱེན་གོ་རམས་པས་འཇུག་པའི་དཀའ་འགྲེལ་ལས་གསུངས་སོ། །
Domain	ཆོས་ལུགས།