19666

ཉེ་འཁོར་བའི་དམྱལ་བ་ (1)

Part of speech	མིང་ཚིག
Definition	ཚ་དམྱལ་བརྒྱད་པོ་ཀུན་ལའང་ཕྱོགས་ཀྱིས་ལྷག་པ་བཅུ་དྲུག་བཅུ་དྲུག་ཡོད་དོ། །གང་ཞེ་ན། ཚ་དམྱལ་དེ་དག་གི་ནི་ངོས་བཞི་ན་བཞི་བཞི་ཡོད་པའི་ཕྱིར་རོ། །ཚ་བའི་སྡུག་བསྔལ་གྱི་དངོས་གཞི་ལས་ཐར་པ་ན་མེ་མར་མུར་གྱི་འོབས་པུས་མོ་ནུབ་པ་ཙམ་ཡོད་དེ། དེ་ལ་དམྱལ་བ་དེ་དག་འགྲོ་བ་ན་རྐང་པའི་པགས་པ་དང་ཤ་ཁྲག་དག་ཞིག་སྟེ་རུས་པ་འབའ་ཞིག་ལུས་ཤིང་ཡང་རྐང་བ་བཏེག་པ་ན་སླར་ཤ་སྐྱེ་བ་དང་། དེ་རྒལ་བ་ན་རོ་མྱགས་ཀྱི་འདམ་ཞེས་བྱ་བ་མི་གཙང་བའི་འདབ་རྫབ་རྐེད་པ་ནུབ་པ་ཙམ་ཡོད་དེ། དེ་ལ་དམྱལ་བ་དག་འགྲོ་བ་ན་སྲིན་བུ་མཆུ་རྣོན་ཞེས་བྱ་བ་ལུས་དཀར་ལ་མགོ་གནག་པས་ལྕགས་ཀྱི་མཆུས་རུས་པའི་བར་དུ་ཟང་ཐལ་དུ་འབྱིན་པ་དང་། དེ་དག་ལས་ཐར་པ་ན་མཚོན་ཆའི་བསྐོར་ཞེས་བྱ་བ་སྤུ་གྲི་གཏམས་པའི་ལམ་ཞེས་བྱ་བ་རབ་ཏུ་རྣོ་བ་གཏམས་པའི་ཐང་ལ་འགྲོ་བ་ན་རྐང་པ་འཇོག་པ་དང་འདེགས་པ་ན་ཤ་ཁྲག་འཇིག་པ་དང་སྐྱེ་བར་བྱེད་པ་དག་ཡོད་དོ། །གང་དུ་རལ་གྲི་རྣོན་པོ་རྣམས་ལྷུང་ནས་ཡན་ལག་དང་ཉིང་ལག་རྣམས་གཅོད་པ་རལ་གྲི་ལོ་མའི་ནགས་ཚལ་དང་། དེ་ན་ཁྱི་སྲེ་བོ་ལྕགས་ཀྱི་མཆེ་བ་ཅན་དང་། ལྕགས་ཀྱི་ཤལ་མ་ལིའི་སྡོང་པོ་ཚེར་མ་རྣོན་པོ་སོར་བཅུ་དྲུག་པ་སེམས་ཅན་དེ་དག་འབབ་འཛེག་བྱེད་པ་ན་ཁ་གྱེན་ཐུར་དུ་ལྟ་བས་ལུས་འབིགས་པ་དང་། སྟེང་ན་བྱ་ཁྭ་ཏ་འདབ་འཇིགས་ཞེས་བྱ་བ་ལྕགས་ཀྱི་མཆུ་ཅན་རྣམས་ཀྱིས་མིག་ཕྱུང་ནས་ཟ་བ་རྣམས་ཏེ། དེ་དག་རྣམས་ནི་མཚོན་ཆའི་སྐོར་ཞེས་གཅིག་ཏུ་བགྲང་ངོ་། །དེའི་ཕྱིར་ཊཱིཀ་བྱེད་དག་གིས་ཀྱང་། །ཁྱི་སྲེ་བོ་ནི་ནགས་ཚལ་རལ་གྲི་ལྟ་བུ་ན་ཡོད་ལ། ཁྭ་ཏ་ལྕགས་ཀྱི་མཆུ་ཅན་ནི་ཤལ་མ་རིའི་ནགས་ན་ཡོད་པའོ་ཞེས་བཤད་དོ། །དེའི་ཕ་རོལ་ན་ཐལ་ཚན་གྱི་ཆུ་བོ་རབ་མེད་པ་ཡོད་དེ་དེར་དམྱལ་བ་དག་འབྲས་འཚེད་པ་བཞིན་དུ་འཚེད་པ་ཡིན་ནོ། །དེ་ལྟར་ན་ཕྱོགས་རེ་ན་བཞི་བཞིའི་བྱེ་བྲག་གིས་བཅུ་དྲུག་ཏུ་བགྲང་ངོ་། །དེ་དག་ནི་གནོད་པ་ལྷག་པའི་གནས་ཡིན་པའི་ཕྱིར་ལྷག་པ་ཞེས་བྱ་སྟེ། དམྱལ་བ་ཆེན་པོ་དག་ཏུ་གནོད་པ་བྱས་ན་ཡང་འདི་དག་ཏུ་གནོད་པ་བྱེད་པའི་ཕྱིར་རོ། །དེ་དག་ལ་ནི་ཉེ་འཁོར་བའི་དམྱལ་བ་ཞེས་བྱའོ་ཞེས་མཛོད་འགྲེལ་མངོན་པའི་རྒྱན་ལས་སོ། །
Domain	ཆོས་ལུགས།