22720

ཐེག་པ་ཆེན་པོའི་གོ་ཆ་རྡོ་རྗེ་ལྟ་བུའི་སེམས་བསྐྱེད་པ་བཅུ་ (1)

Part of speech	མིང་ཚིག
Definition	ཕལ་ཆེན་ལེའུ་ཞེ་གསུམ་པ་ལས་བྱུང་བ་སྟེ། ༡ འདི་ལ་ཆོས་ཐམས་ཅད་མཐའ་ཡས་པ་ཡིན་ཡང༌། བྱང་ཆུབ་སེམས་དཔའ་ནི་འདི་ལྟར་ཆོས་ཐམས་ཅད་དུས་གསུམ་མ་ལུས་པར་ཤེས་པས་མངོན་པར་རྫོགས་པར་འཚང་རྒྱ་བར་བྱའོ་སྙམ་དུ་སེམས་བསྐྱེད་པ་འདི་ནི། ཐེག་པ་ཆེན་པོའི་གོ་ཆ་རྡོ་རྗེ་ལྟ་བུའི་སེམས་བསྐྱེད་པ་དང་པོའོ། ། ༢ གཞན་ཡང་སྐྲའི་རྩེ་མོའི་གོ་དང༌། སྒོ་རེ་རེ་ལ་ཡང་སེམས་ཅན་མཐའ་ཡས་ཏེ། མུ་མེད་པས་ཆོས་ཀྱི་དབྱིངས་ཐམས་ཅད་ཀྱི་སེམས་ཅན་ལྟ་སྨོས་ཀྱང་ཅི་དགོས་ན། བྱང་ཆུབ་སེམས་དཔའ་ནི་གོ་ཆ་ཆེན་པོ་བགོས་ཤིང༌། འདི་སྐད་དུ་སེམས་ཅན་ཐམས་ཅད་མྱ་ངན་ལས་འདས་པ་ཆེན་པོ་བླ་ན་མེད་པས་ཡོངས་སུ་མྱ་ངན་ལས་འདའ་བར་བྱའོ་ཞེས་བྱ་བའི་ཚིག་བརྗོད་པ་འདི་ནི། ཐེག་པ་ཆེན་པོའི་གོ་ཆ་རྡོ་རྗེ་ལྟ་བུའི་སེམས་བསྐྱེད་པ་གཉིས་པའོ། ། ༣ གཞན་ཡང་འཇིག་རྟེན་གྱི་ཁམས་རྣམས་ནི་མཐའ་ཡས་མུ་མེད་པ་སྟེ། རིས་མེད་ལ་ས་མཚམས་མེད་པ་ན། བྱང་ཆུབ་སེམས་དཔའ་ནི་འདི་ལྟར་སངས་རྒྱས་ཀྱི་ཞིང་ཡོངས་སུ་དག་པར་བྱ་བ་བླ་ན་མེད་པས་འཇིག་རྟེན་གྱི་ཁམས་ཐམས་ཅད་ཡོངས་སུ་སྤྱད་བར་བྱའོ། །ཞེས་སྨོན་ལམ་མངོན་པར་སྒྲུབ་ཅིང༌། དེ་ཡང་དག་པ་དང༌། དབེན་པར་ཡོངས་སུ་སྦྱོང་བ་འདི་ནི། ཐེག་པ་ཆེན་པོའི་གོ་ཆ་རྡོ་རྗེ་ལྟ་བུའི་སེམས་བསྐྱེད་པ་གསུམ་པའོ། ། ༤ གཞན་ཡང་འགྲོ་བ་ཐམས་ཅད་ནི་མཐའ་ཡས་མུ་མེད་པ་སྟེ། རིས་མེད་ལ་ས་མཚམས་མེད་པ་ན། བྱང་ཆུབ་སེམས་དཔའ་ནི་འདི་ལྟར་འགྲོ་བ་ཐམས་ཅད་བླ་ན་མེད་པའི་ཡེ་ཤེས་ཀྱི་སྣང་བ་ཆེན་པོས་སྣང་བར་བྱའོ་ཞེས་ཏེ། དགེ་བའི་རྩ་བ་ཡོངས་སུ་བསྔོ་བ་འདི་ནི། ཐེག་པ་ཆེན་པོའི་གོ་ཆ་རྡོ་རྗེ་ལྟ་བུའི་སེམས་བསྐྱེད་པ་བཞི་པའོ། ། ༥ གཞན་ཡང་སངས་རྒྱས་བཅོམ་ལྡན་འདས་རྣམས་ནི་མཐའ་ཡས་མུ་མེད་པ་སྟེ། རིས་མེད་ལ་ས་མཚམས་མེད་པ་ན། བྱང་ཆུབ་སེམས་དཔའ་ནི་དགེ་བའི་རྩ་བ་བསྐྱེད་ཅིང༌། འདི་ལྟར་སངས་རྒྱས་བཅོམ་ལྡན་འདས་རྣམས་མཉེས་པར་བྱས་པའི་འོག་ཏུ་བདག་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱ་བར་བྱའོ་ཞེས་ཡོངས་སུ་བསྔོ་བ་འདི་ནི། ཐེག་པ་ཆེན་པོའི་གོ་ཆ་རྡོ་རྗེ་ལྟ་བུའི་སེམས་བསྐྱེད་པ་ལྔ་པའོ། ། ༦ གཞན་ཡང་བྱང་ཆུབ་སེམས་དཔས་སངས་རྒྱས་བཅོམ་ལྡན་འདས་རྣམས་ཀྱང་མཐོང་སྟེ། ཆོས་ཀྱང་ཉན་ལ་དགའ་བ་དང༌། སྤྲོ་བ་བསྐྱེད་ཀྱང་རང་གི་ལུས་ལ་ཡང་མངོན་པར་ཆགས་པར་མི་བྱེད་དེ། དེ་བཞིན་གཤེགས་པའི་སྐུ་ལ་ཡང་མངོན་པར་ཆགས་པར་མི་བྱེད་ཅིང༌། དེ་བཞིན་གཤེགས་པའི་སྐུ་དེ་དག་ཀྱང་ཡོད་པར་ཡང་མི་བྱེད། མེད་པར་ཡང་མི་བྱེད། མེད་པ་མ་ཡིན་པར་ཡང་མི་བྱེད། ཡོད་པ་མ་ཡིན་པར་ཡང་མི་བྱེད། དངོས་པོར་ཡང་མི་བྱེད། དངོས་པོ་མེད་པར་ཡང་མི་བྱེད། གཟུགས་སུ་ཡང་མི་བྱེད། མཚན་དུ་ཡང་མི་བྱེད། འབྱུང་བར་ཡང་མི་བྱེད། འཇིག་པར་ཡང་མི་བྱེད། དེ་བཞིན་གཤེགས་པའི་སྐུ་དེ་དག་སྐྱེ་བར་ཡང་མི་བྱེད། འཇིག་པར་ཡང་མི་བྱེད། དེ་བཞིན་གཤེགས་པའི་སྐུ་ལ་དངོས་པོར་ཡང་མི་འཇུག་སྟེ། དངོས་པོ་ཆུད་ཟ་བར་ཡང་མི་བྱེད་དོ། །དེ་ཅིའི་ཕྱིར་ཞེ་ན། དེ་ནི་དངོས་པོ་ཐམས་ཅད་མ་བཟུང་བའི་ཕྱིར་ཏེ། འདི་ནི་ཐེག་པ་ཆེན་པོའི་གོ་ཆ་རྡོ་རྗེ་ལྟ་བུའི་སེམས་བསྐྱེད་པ་དྲུག་པའོ། ། ༧ གཞན་ཡང་བྱང་ཆུབ་སེམས་དཔའ་སེམས་ཅན་གཞན་དང༌། གང་ཟག་གཞན་དག་གིས་མགོ་བཅད་པར་གྱུར་ཏམ། ལག་པ་བཅད་དམ། རྐང་པ་བཅད་དམ། རྣ་བ་དང༌། སྣ་བཅད་དམ། མིག་ཕྱུང་བར་གྱུར་ཏམ། གཤེའམ། མི་སྙན་པར་ཟེར་རམ། རྡེག་གམ། སྡིགས་སམ། སྨོད་དམ། འཆིང་ངམ། ཅོ་འདྲི་འམ། ཐོ་འཚམ་ཡང་བཟོད་ཅིང་དེའི་རྒྱུས་སེམས་ཁྲོ་བར་མི་འགྱུར། འཁྲུག་པ་དང་རྣམ་པར་འཁྲུག་པར་མི་འགྱུར། གནོད་པར་སེམས་པ་དང༌། ཁོང་ཁྲོ་བར་མི་འགྱུར་ཏེ། བརྗོད་དུ་མེད་པའི་ཡང་བརྗོད་དུ་མེད་པའི་བསྐལ་པར་བྱང་ཆུབ་སེམས་དཔའི་སྤྱད་པ་སྤྱོད་ཀྱང་། སེམས་ཅན་ཐམས་ཅད་ཡོངས་སུ་གཏོང་བའི་སེམས་མི་བསྐྱེད་དོ། །དེ་ལྟར་བྱང་ཆུབ་སེམས་དཔའི་ཆོས་ཐམས་ཅད་མི་གཉིས་པར་རྣམ་པར་སྤྱད་པའི་བསླབ་པ་ལ་སློབ་ཅིང༌། མི་འཁྲུགས་པའི་བསམ་པས་སེམས་ཅན་ཐམས་ཅད་ཀྱི་སྡུག་བསྔལ་དུ་བྱས་པའི་སྡུག་བསྔལ་ཐམས་ཅད་རང་གི་ལུས་ཀྱིས་ཉམས་སུ་བླང་བས་བཟོད་པར་བྱེད་ཅིང་བཏང་སྙོམས་སུ་གནས་པ་འདི་ནི། ཐེག་པ་ཆེན་པོའི་གོ་ཆ་རྡོ་རྗེ་ལྟ་བུའི་སེམས་བསྐྱེད་པ་བདུན་པའོ། ། ༨ གཞན་ཡང་མ་འོངས་པའི་དུས་ལ་ནི་མཐའ་མེད་དེ། ཐུག་པ་མེད་ཅིང་རྒྱུན་འཆད་པ་མེད་པ་ཡིན་ན། བྱང་ཆུབ་སེམས་དཔའ་ནི་འདི་ལྟར་མ་འོངས་པའི་བསྐལ་པ་འགྲངས་པ་ཆོས་ཀྱི་དབྱིངས་ཀྱིས་གཏུགས་པ། ནམ་མཁའི་དབྱིངས་ལྟར་གནས་པ་གང་ཇི་སྙེད་ཅིག་ཡོད་པ་དེ་དག་ཐམས་ཅད་ཀྱིས་འཇིག་རྟེན་གྱི་ཁམས་ཐམས་ཅད་དུ་སེམས་ཅན་ཡོངས་སུ་སྨིན་པར་བྱ་བས། བྱང་ཆུབ་སེམས་དཔའི་སྤྱོད་པ་སྤྱད་པར་བྱའོ། །འཇིག་རྟེན་གྱི་ཁམས་གཅིག་ཏུ་ཇི་ལྟར་སྤྱད་པ་དེ་བཞིན་དུ། འཇིག་རྟེན་གྱི་ཁམས་ཆོས་ཀྱི་དབྱིངས་ཀྱིས་ཀླས་པ། ནམ་མཁའི་དབྱིངས་ཀྱི་མཐའ་གཏུགས་པ་ཐམས་ཅད་དུ་ཡང་སྤྱད་པར་བྱའོ་ཞེས་སེམས་བསྐྱེད་ཀྱང་དེ་ལྟ་བུའི་དུས་སུ་སྤྱོད་པས། སྡང་བ་མེད་ཅིང༌། མི་འཇིགས། མི་སྐྲག་གོ ། དེ་ཅིའི་ཕྱིར་ཞེ་ན། དེ་ལྟར་སེམས་ཅན་ཐམས་ཅད་ཀྱི་དོན་དུ་བྱང་ཆུབ་སེམས་དཔའི་སྤྱོད་པ་ཉམས་སུ་ལེན་པ་ནི་བྱང་ཆུབ་སེམས་དཔའི་ཡི་དམ་བསྟན་པ་སྟེ། འདི་ནི་ཐེག་པ་ཆེན་པོའི་གོ་ཆ་རྡོ་རྗེ་ལྟ་བུའི་སེམས་བསྐྱེད་པ་བརྒྱད་པའོ། ། ༩ གཞན་ཡང་བྱང་ཆུབ་སེམས་དཔའ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་སེམས་ལ་རག་ལུས་པར་ཡིད་ཆེས་པར་བྱས་ཏེ། བསམ་པ་ཡོངས་སུ་དག་པས་དགེ་བའི་རྩ་བ་ཐམས་ཅད་ཡང་དག་པར་སྡུད་ཅིང་ཡོངས་སུ་རྫོགས་པར་བྱེད་དེ། ནམ་འདོད་པར་གྱུར་པ་དེའི་ཚེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་བྱའོ་ཞེས་བྱང་ཆུབ་ལ། དབང་བསྒྱུར་བར་གནས་ཤིང༌། བགེགས་མེད་པའི་ལམ་དུ་ཞུགས་པ་དང༌། ཉེ་བར་ལེན་པའི་རྐྱེན་ཐམས་ཅད་ཡོངས་སུ་བྱང་བས་སངས་རྒྱས་ཀྱི་བྱང་ཆུབ་ཏུ་བརྟེན་པ་ཐོགས་པ་མེད་ཀྱང༌། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་མི་རྒྱ་སྟེ། དེ་ཡང་ཅིའི་ཕྱིར་ཞེ་ན། འདི་ལྟར་སེམས་ཅན་ཐམས་ཅད་ཡོངས་སུ་སྨིན་པར་བྱ་བ་དང༌། སྨོན་ལམ་ཡོངས་སུ་རྫོགས་པར་བྱ་བའི་ཕྱིར་ཏེ། བྱང་ཆུབ་སེམས་དཔའི་སྤྱོད་པ་འཇིག་རྟེན་གྱི་ཁམས་ཐམས་ཅད་ཀྱིས་ཀླས་ཏེ་སྤྱོད་པ་འདི་ནི། ཐེག་པ་ཆེན་པོའི་གོ་ཆ་རྡོ་རྗེ་ལྟ་བུའི་སེམས་བསྐྱེད་པ་དགུ་བའོ། ། ༡༠ གཞན་ཡང་བྱང་ཆུབ་སེམས་དཔའ་སངས་རྒྱས་བཅོམ་ལྡན་འདས་རྣམས་ཀྱང་མི་དམིགས། བྱང་ཆུབ་ཀྱང་མི་དམིགས། བྱང་ཆུབ་སེམས་དཔའ་ཡང་མི་དམིགས། ཆོས་ཐམས་ཅད་ཀྱང་མི་དམིགས། སེམས་ཅན་ཐམས་ཅད་ཀྱང་མི་དམིགས། སེམས་ཀྱང་མི་དམིགས། སྤྱོད་པ་ཡང་མི་དམིགས། སྔོན་གྱི་མཐའ་ཡང་མི་དམིགས། ཕྱི་མའི་མཐའ་ཡང་མི་དམིགས། ད་ལྟར་བྱུང་བ་ཡང་མི་དམིགས། འགྲོ་བ་ཐམས་ཅད་ཀྱང་མི་དམིགས། འདུས་བྱས་དང་འདུས་མ་བྱས་ཀྱང་མི་དམིགས་ཏེ། དེ་དེ་ལྟར་དབེན་བར་གནས་པ་ཡིན། དེ་ལྟར་ཟབ་མོ་ལ་གནས་པ་དང༌། དེ་ལྟར་ཞི་བ་ལ་གནས་པ་དང༌། དེ་ལྟར་ཉོན་མོངས་པ་མེད་པ་ལ་གནས་པ་དང༌། དེ་ལྟར་བརྗོད་དུ་མེད་པ་ལ་གནས་པ་དང༌། དེ་ལྟར་གཉིས་སུ་མེད་པ་ལ་གནས་པ་དང༌། དེ་ལྟར་རྟོག་པ་མེད་པ་ལ་གནས་པ་དང༌། དེ་ལྟར་ཆོས་ཐམས་ཅད་ཀྱི་རང་བཞིན་ལ་གནས་པ་དང༌། དེ་ལྟར་རིག་པ་ལ་གནས་པ་དང༌། དེ་ལྟར་གྲོལ་བ་ལ་གནས་པ་དང༌། དེ་ལྟར་མྱ་ངན་ལས་འདས་པ་ལ་གནས་པ་དང༌། དེ་ལྟར་ཡང་དག་པའི་མཐའ་ལ་གནས་པ་ཡིན་ཡང་སྨོན་ལམ་གྱི་རྒྱུན་ཀྱང་མི་གཅོད། ཐམས་ཅད་མཁྱེན་པ་ཉིད་དུ་སེམས་བསྐྱེད་པ་དང༌། བྱང་ཆུབ་སེམས་དཔའི་སྤྱོད་པ་དང༌། སེམས་ཅན་ཡོངས་སུ་སྨིན་པར་བྱ་བ་དང༌། ཕ་རོལ་ཏུ་ཕྱིན་པ་རྣམས་དང༌། སེམས་ཅན་གདུལ་བ་དང༌། སངས་རྒྱས་མཆོད་ཅིང་རིམ་གྲོར་བྱ་བ་དང༌། ཆོས་བསྟན་པ་དང༌། འཇིག་རྟེན་གྱི་ཁམས་བརྒྱན་པའི་རྒྱུན་ཀྱང་མི་གཅོད་དོ། །དེ་ཅིའི་ཕྱིར་ཞེ་ན། འདི་ལྟར་བྱང་ཆུབ་སེམས་དཔའ་རྣམས་ནི་སྨོན་ལམ་ཆེན་པོས་ཤིན་ཏུ་བྱུང་བའི་ཕྱིར་ཏེ། གང་གིས་ཆོས་ཐམས་ཅད་ཀྱི་མཚན་ཉིད་འདི་ལྟ་བུར་རབ་ཏུ་ཤེས་པ་ནི་སྙིང་རྗེ་ཆེན་པོ་དེ་བས་ཀྱང་རྣམ་པར་འཕེལ་བར་བྱེད། ཡོན་ཏན་བརྗོད་དུ་མེད་པས་ཀྱང་སེམས་ཅན་ཐམས་ཅད་ཡོངས་སུ་མི་གཏོང་བའི་སེམས་ཆེར་བསྐྱེད་དེ། དེ་ལྟར་དངོས་པོ་མེད་པའི་ཆོས་ཐམས་ཅད་ལ་ཡང་བྱིས་པ་སོ་སོའི་སྐྱེ་བོ་ཀུན་ཏུ་གཏི་མུག་པ་འདི་དག་གིས་ཆོས་ཐམས་ཅད་ཀྱི་རང་བཞིན་ཁོང་དུ་མི་ཆུད་མི་ཤེས་ཀྱི། དེ་ཁོང་དུ་ཆུད་པར་བྱའོ། །དེ་ཅིའི་ཕྱིར་ཞེ་ན། འགྲོ་བ་ཐམས་ཅད་ན་སངས་རྒྱས་བཅོམ་ལྡན་འདས་རྣམས་ལས་ལྷག་པར་ཞི་བའི་གནས་ཀྱང་མེད་ན། དེ་དག་གིས་ཀྱང་ཆོས་དེ་ལྟ་བུར་བསྟན་ཏེ། སེམས་ཅན་ཡང་ཡོངས་སུ་སྨིན་པར་མཛད་ཅིང༌། ཐུགས་རྗེ་ཆེན་པོ་ཡང་མ་གློད་ན་བདག་ཅག་གིས་ལྟ་སེམས་བསྐྱེད་པ་བདེན་པའི་ཚིག་ལ་གནས་ལ་མི་སླུ་བ། སངས་རྒྱས་དང་ཆོས་ཀྱི་རིགས་ཐམས་ཅད་མི་གཅོད་པ། སྨོན་ལམ་ཆེན་པོས་མངོན་དུ་བྱས་པ་དང༌། སེམས་ཅན་ཐམས་ཅད་ཀྱི་དོན་ལ་གདོན་མི་ཟར་སེམས་བསྐྱེད་པ་དང༌། དགེ་བའི་རྩ་བ་ཐམས་ཅད་ཤིན་ཏུ་བསགས་པས་ཡོངས་སུ་བསྔོ་བ་ལ་མཁས་པའི་གནས་པ་ལ་རབ་ཏུ་གནས་པ་ཡེ་ཤེས་ཟབ་མོས་མངོན་པར་བསྒྲུབས་པ་འགྲོ་བའི་ཚོགས་ཐམས་ཅད་ཁོང་དུ་ཆུད་པ་དང༌། སེམས་ཅན་ཐམས་ཅད་ལ་མཉམ་པ་ཉིད་དུ་གྱུར་པའི་སེམས་ཀྱིས་སེམས་ཅན་ཐམས་ཅད་བླ་ན་མེད་པའི་ཆོས་སྦྱིན་པ་ཆེན་པོ་ལ་བོད་ལ། སེམས་ཅན་ཐམས་ཅད་གྲོལ་བར་མ་བྱས། སེམས་ཅན་ཐམས་ཅད་སངས་རྒྱས་སུ་ཕྱིན་པར་མ་བྱས། སངས་རྒྱས་ཀྱི་ཆོས་ཐམས་ཅད་ཡོངས་སུ་རྫོགས་པར་མ་བྱས་ཏེ། སྨོན་ལམ་ཆེན་པོ་ཡོངས་སུ་མ་རྫོགས་པར་སྙིང་རྗེ་ཆེན་པོ་ཡང་ཇི་ལྟར་གློད་པར་བྱ། སྨོན་ལམ་ཆེན་པོ་ཡོངས་སུ་རྫོགས་པར་བྱའོ་སྙམ་པ་འདི་ནི་ཐེག་པ་ཆེན་པོའི་གོ་ཆ་རྡོ་རྗེ་ལྟ་བུའི་སེམས་བསྐྱེད་པ་བཅུ་པའོ། །
Domain	ཆོས་ལུགས།

{{#arraymap:ཐེག་པ་ཆེན་པོའི་གོ་ཆ་རྡོ་རྗེ་ལྟ་བུའི་སེམས་བསྐྱེད་པ་བཅུ་

|; |@@@ | | }}