22980

ཐོག་མའི་མ་རིག་པ་ (1)

Part of speech	མིང་ཚིག
Definition	མདོ། འཁོར་བར་འཇུག་པའི་རྟེན་འབྲེལ་ཡན་ལག་བཅུ་གཉིས་ཀྱི་ཐོག་མའི་སེམས་བྱུང་རྨོངས་པ་ཞིག་ལ་ཐོག་མའི་མ་རིག་པ་ཞེས་འཇོག མཚན་ཉིད་ནི། པཎ་ཆེན་ཕར་ཕྱིན་སྤྱི་དོན་ལས། གང་ཟག་གི་བདག་མེད་རྟོགས་པའི་ཡེ་ཤེས་ཀྱི་འགལ་ཟླ་མི་མཐུན་ཕྱོགས་སུ་གྱུར་པའི་གང་ཟག་གི་བདག་འཛིན་གྱིས་བསྡུས་པའི་སེམས་བྱུང་རྨོངས་པ་དེ་དེའི་མཚན་ཉིད་ཡིན་པའི་ཕྱིར། སྤྱིར་ཉོན་མོངས་ཅན་གྱི་མ་རིག་པ་ལ། ལས་རྒྱུ་འབྲས་ལ་རྨོངས་པའི་ཉོན་མོངས་ཅན་གྱི་མ་རིག་པ་དང། དེ་ཁོ་ན་ཉིད་ལ་རྨོངས་པའི་ཉོན་མོངས་ཅན་གྱི་མ་རིག་པ་གཉིས་ཡོད། དེ་ལ་དཔྱད་པ་ནི། ཡན་ལག་བཅུ་གཉིས་ཀྱི་ནང་ཚན་དུ་གྱུར་པའི་མ་རིག་པ་ཡིན་ན། དེ་ཁོ་ན་ཉིད་ལ་རྨོངས་པའི་མ་རིག་པ་ཡིན་པས་ཁྱབ་སྟེ། དེ་ཡིན་ན་གང་ཟག་གི་བདག་འཛིན་ཡིན་དགོས་པའི་ཕྱིར། ཡང་ཉོན་མོངས་ཅན་གྱི་མ་རིག་པ་ལ། རྒྱུའི་ཀུན་སློང་གི་མ་རིག་པ་དང། དུས་ཀྱི་ཀུན་སློང་གི་མ་རིག་པ་གཉིས་ཡོད་ཀྱང་། ཡན་ལག་བཅུ་གཉིས་ཀྱི་ནང་ཚན་དུ་གྱུར་པའི་མ་རིག་པ་ཡིན་ན་རྒྱུའི་ཀུན་སློང་གི་མ་རིག་པ་ཡིན་པས་ཁྱབ་སྟེ། དེ་ཡིན་ན་རང་འབྲས་རྟེན་འབྲེལ་ཕྱི་མ་རྣམས་ཀུན་ནས་སློང་བྱེད་ཡིན་དགོས་པའི་ཕྱིར། ཞེས་གསུངས།
Domain	ཆོས་ལུགས།