24616

དགེ་འདུན་བསྟན་འཛིན་ནོར་བུ་དཔལ་བཟང་པོ་ (1)

Part of speech

མིང་ཚིག

Definition

རབ་བྱུང་བཅོ་ལྔ་པའི་ཆུ་བྱ་ཕྱི་ལོ་ ༡༨༧༣ ལོར་ཆུ་བཟང་རྭ་ལོ་ཐང་དུ་ཡབ་གསེར་འོད་སྐྱབས་དང་། ཡུམ་ལྷ་མོ་བྱམས་གཉིས་ཀྱི་སྲས་སུ་འཁྲུངས། འོན་རྒྱལ་སྲས་པ་དང་། ཐར་ཤུལ་རི་དགེ་འདུན་ཆོས་སྐྱོང་རྒྱ་མཚོ་གཉིས་ནས། ལ་མོ་སྐུ་ཕྲེང་དྲུག་པའི་ཡང་སྲིད་དུ་ངོས་བཟུང་། བརྒྱད་ཀྱི་སྟེང་གདན་ཁྲིར་བཞུགས། བདེ་ཆེན་དགོན་དུ་ཚོགས་བཞུགས་གནང་། དགེ་བཤེས་ཤེས་རབ་རྒྱ་མཚོ་དང་། ཀླུ་འབུམ་ལྷ་རམས་པ་ངག་དབང་ཚུལ་ཁྲིམས། དགེ་བཤེས་སངས་རྒྱས་ཆོས་གྲགས། དཔལ་རིས་དགེ་བཤེས་བློ་བཟང་རབ་གསལ་སོགས་བསྟེན། བཀའ་པོད་ལྔ་ལ་གསན་སྦྱངས་མཛད། རྒྱ་ནག་ཏུ་སྔ་ཕྱིར་ལན་གཉིས་ཕེབས། དང་པོའི་སྐབས་གོང་མ་བཀྭང་ཞི་ལ་མཇལ་འཕྲད་བྱས། མང་ཕོ་སེར་བོ་སོགས་ན་བཟའ་ནེར་སྤྱད་ཕོན་ཆེན་དང་། པ་ཐེ་གྱོ་ཞེས་མི་བརྒྱད་ཀྱིས་འཁུར་བའི་ཅོ་ཙི་སེར་བོ་སོགས་བདག་རྐྱེན་ཕུལ། ལན་གཉིས་པར་ཡོན་ཧྲི་ཁེ་དང་མཇལ། མཚོ་སྔོན་སོག་པོའི་དཔོན་ཁག་སྤྱིའི་བླ་མ་ཞེས་བསྔགས་བརྗོད་བྱས། ཡངས་པའི་ས་ཆེན་གསལ་བའི་མཁས་པ་ཆེན་པོ་ཚ་ཀན་ནོ་མིན་ཧན་གྱི་བླ་གྲྭ་སྤྱིའི་བདག་པོ་ཧུ་ཐོག་ཐུའི་ཐམ་ག་རྒྱལ། ཞེས་རྒྱ་བོད་མཛྙུ་སོག་པོ་བཅས་ཀྱི་ཡི་གེ་ཡོད་པའི་དངུལ་ཐམ་ག་གནང་། མཁས་པ་མི་གསུམ་གྱི་ལྷ་ཁང་ལ་ཞིག་གསོས་དང་། ནང་རྟེན་གསར་བཞེངས་མཛད། རབ་བྱུང་བཅོ་ལྔ་པའི་མེ་འབྲུག་ཕྱི་ལོ་ ༡༩༡༦ ལོར་རྣམ་རྒྱལ་ཕུན་ཚོགས་ཆོས་རྫོང་གླིང་བཏབ། རབ་བྱུང་བཅུ་དྲུག་པའི་མེ་ཡོས་ཕྱི་ལོ ༡༩༢༧ ལོར་སྐུ་གཤེགས།