24622

དགེ་འདུན་འཁོར་ལོའི་དབྱེན་མི་འབྱུང་བའི་དུས་དྲུག་ (1)

Part of speech	མིང་ཚིག
Definition	མདོ། མངོན་པ། འཁོར་ལོའི་དབྱེན་དེ་ནི། སངས་རྒྱས་ནས་དང་པོ་ཆོས་ཀྱི་འཁོར་ལོ་བསྐོར་ནས་རིང་པོ་མ་ལོན་པའི་ཚེ་ནི་མི་འབྱུང་སྟེ། ཐམས་ཅད་དགའ་བ་དང་རབ་ཏུ་དགའ་བ་སྐྱེས་པར་བློ་མཐུན་པས་ན་ཤ་གཅིག་པ་ཡིན་པའི་ཕྱིར་རོ། །སངས་རྒྱས་ཀྱི་སྐུ་ཚེའི་མཐའ་མ་ཡོངས་སུ་མྱ་ངན་ལས་འདས་པའི་ཚེའང་མ་ཡིན་ཏེ། སངས་རྒྱས་ལ་དཀོན་པར་འཛིན་པ་དང་། མི་རྟག་པ་ཡིད་ལ་བྱེད་པས་སེམས་སྐྱོ་བ་ཤས་ཆེ་བར་བློ་མཐུན་པའི་ཕྱིར་རོ། །ཇི་སྲིད་དུ་བསྟན་པ་ལ་ལྟ་བ་དང་ཚུལ་ཁྲིམས་ཀྱི་སྐྱོན་མ་བྱུང་གི་བར་དུའང་མི་འབྱུང་སྟེ། བསྟན་པ་སྐྱོན་མེད་ཡིན་པའི་ཕྱིར་རོ། །མཆོག་ཟུང་གཅིག་མ་བྱུང་གི་སྔ་རོལ་དུའང་མི་འབྱུང་སྟེ། བྱེ་བ་ཡུན་རིང་དུ་མི་གནས་ཤིང་། དེ་དག་གིས་སྡུམ་པ་ཡིན་པ་ལ་སྡུམ་བྱེད་མེད་པའི་ཕྱིར་རོ། །ཐུབ་པ་ནོངས་པ་ནའང་མི་འབྱུང་སྟེ། གང་ལ་འགྲན་པའི་སངས་རྒྱས་མི་བཞུགས་པའི་ཕྱིར་རོ། །མཚམས་ཆེ་བ་དང་ཆུང་བ་མ་བཅད་པ་དག་ཏུ་ཡང་མི་འབྱུང་སྟེ། མཚམས་གཅིག་ཏུ་དགེ་འདུན་བྱེ་བ་ནི་དབྱེན་ཡིན་ན་དེ་མེད་པའི་ཕྱིར་རོ། །དེས་ན་འཁོར་ལོའི་དབྱེན་དེ་ནི་དུས་དྲུག་པོ་དེ་དག་ཏུ་མི་འབྱུང་ངོ་། །ཞེས་མཛོད་འགྲེལ་མངོན་པའི་རྒྱན་ལས་སོ། །
Domain	ཆོས་ལུགས།