24743

དགེ་སྦྱོང་ཚུལ་གྱི་འབྲས་བུ་ (1)

Part of speech	མིང་ཚིག
Definition	མདོ། མངོན་པ། དགེ་སྦྱོང་གི་ཚུལ་གྱི་འབྲས་བུ་བཞི་ཞེས་བརྗོད་ན་དགེ་སྦྱོང་ནི་གང་། ཚུལ་ནི་གང་། འབྲས་བུ་ནི་གང་ཞེ་ན། དགེ་སྦྱོང་ནི་ཉོན་མོངས་པ་ཅི་རིགས་པ་གཏན་དུ་ཞི་བའི་རྒྱུད་དེ། འཕགས་པའི་གང་ཟག་ཡིན་ལ། ཉོན་མོངས་པ་གཏན་དུ་ཞི་བར་བྱེད་པའི་ཐབས་དགེ་སྦྱོང་གི་ཚུལ་ནི་དྲི་མ་མེད་པའི་བར་ཆད་མེད་ལམ་སྟེ་རྣམ་གྲོལ་གྱི་ལམ་ནི་དགེ་སྦྱོང་གི་ཚུལ་གྱི་འབྲས་བུ་ཡིན་པའི་ཕྱིར་རོ། །དགེ་སྦྱོང་གི་ཚུལ་དེའི་འབྲས་བུ་ནི་འདུས་བྱས་དང་འདུས་མ་བྱས་གཉིས་ཡིན་ཏེ་དེ་དག་ཀྱང་དབྱེ་ན་རེ་རེ་ལའང་བརྒྱད་ཅུ་རྩ་དགུ་དགུའོ། །གང་ཞེ་ན། ཁམས་གསུམ་གྱི་མཐོང་སྤང་ལས་རྣམ་པར་གྲོལ་བའི་ལམ་བརྒྱད་དང་སྒོམ་སྤང་དགུ་དགུ་བརྒྱད་ཅུ་རྩ་གཅིག་ལས་རྣམ་པར་གྲོལ་བའི་ལམ་བརྒྱད་ཅུ་རྩ་གཅིག་སྟེ། དེ་ལྟར་རྣམ་གྲོལ་གྱི་ལམ་བརྒྱད་ཅུ་རྩ་དགུ་དང་། དེ་དག་གི་བར་ཆད་མེད་པའི་ལམ་ཡང་བརྒྱད་ཅུ་རྩ་དགུ་དང་། སྤང་བྱ་ཟད་པའི་འགོག་པ་བརྒྱད་ཅུ་རྩ་དགུ་རྣམས་དང་བཅས་པ་སྟེ། དེ་ལྟར་ན་བར་ཆད་མེད་པའི་ལམ་བརྒྱད་ཅུ་རྩ་དགུ་ནི་དགེ་སྦྱོང་གི་ཚུལ་ཡིན་ལ། རྣམ་པར་གྲོལ་བའི་ལམ་བརྒྱད་ཅུ་རྩ་དགུ་ནི་དགེ་སྦྱོང་གི་ཚུལ་གྱི་འབྲས་བུ་འདུས་བྱས་དག་ཡིན་ཏེ། བར་ཆད་མེད་པའི་ལམ་དང་འདྲ་བ་དང་། དེའི་སྟོབས་ཀྱིས་སྐྱེ་བའི་ཕྱིར་བར་ཆད་མེད་པའི་ལམ་གྱི་རྒྱུ་མཐུན་དང་སྐྱེས་བུ་བྱེད་པའི་འབྲས་བུ་ཡིན་པའི་ཕྱིར་རོ། །སྤང་བྱ་ཟད་པའི་འགོག་པ་བརྒྱད་ཅུ་རྩ་དགུ་ནི་དགེ་སྦྱོང་ཚུལ་གྱི་འབྲས་བུ་འདུས་མ་བྱས་དག་ཡིན་ཏེ། འབྲས་བུ་འདུས་མ་བྱས་ཀྱང་བར་ཆད་མེད་པའི་ལམ་གྱི་སྐྱེས་བུ་བྱེད་པའི་འབྲས་བུ་ཡིན་པའི་ཕྱིར་རོ། །དེ་དག་བསྡུས་ནས་མདོ་ལས་དགེ་སྦྱོང་ཚུལ་གྱི་འབྲས་བུ་བཞིར་བཤད་དོ། །དེའི་ཕྱིར་སློབ་དཔོན་འཕགས་པས་ཀྱང་། དགེ་སྦྱོང་གང་ཞེ་ན། ཉོན་མོངས་པ་ཞི་བའི་རྒྱུད་དོ། །ཚུལ་གང་ཞེ་ན། ལམ་སྔ་མའོ། །ཚུལ་གྱི་འབྲས་བུ་གང་ཞེ་ན། ལམ་ཕྱི་མ་དང་འདུས་མ་བྱས་སོ་ཞེས་བཤད་དོ། །གལ་ཏེ་དེ་ལྟར་འབྲས་བུ་རྣམ་པ་མང་པོ་ཡོད་ན་འོ་ན་འབྲས་བུ་བཞིར་ཇི་ལྟར་གཞག་ཅེ་ན། འབྲས་བུ་མང་མོད་ཀྱི་དེ་དག་མདོ་ལས་འབྲས་བུ་བཞིར་རྣམ་པར་བཞག་པ་ནི་རྒྱུ་མཚན་རྣམ་པ་ལྔ་དག་སྲིད་པའི་ཕྱིར་རོ། །ལྔ་གང་ཞེ་ན། རྒྱུན་ཞུགས་ལ་སོགས་པའི་འབྲས་བུ་རེ་རེར་འཇོག་པ་ལ་ནི་སྔོན་གྱི་ཞུགས་པའི་ལམ་སྔ་མ་བཏང་བ་དང་། དེ་ལས་གཞན་པའི་འབྲས་བུ་ལ་གནས་པའི་ལམ་ཐོབ་པ་དང་། སྤང་བྱ་ཟད་པ་བསྡོམས་པའི་ཐོབ་པ་གཅིག་རྙེད་པ་དང་། སྡུག་བསྔལ་ལ་ཆོས་ཤེས་པ་ལ་སོགས་པ་ཆོས་ཤེས་པ་བཞི་དང་སྡུག་བསྔལ་ལ་རྗེས་སུ་ཤེས་པ་ལ་སོགས་པ་རྗེས་སུ་ཤེས་པ་བཞི་སྟེ། ཤེས་པ་བརྒྱད་ཚན་ཐོབ་པ་དང་། མི་རྟག་པ་ལ་སོགས་པ་ཡེ་ཤེས་ཀྱི་རྣམ་པ་བཅུ་དྲུག་ཚང་བར་ཐོབ་པའོ། །ཞེས་མཛོད་འགྲེལ་མངོན་པའི་རྒྱན་ལས་སོ། །
Domain	ཆོས་ལུགས།