25823

དཔང་བློ་གྲོས་བརྟན་པ་ (1)

Part of speech

མིང་ཚིག

Definition

ལོ་ཙཱ་བ་འདི་ཉིད་རབ་བྱུང་ལྔ་པའི་མེ་བྱི ༡༢༧༦ ལོར་ལ་སྟོད་ལྷོ་སྤྱང་ལུང་གི་འོ་འབུ་གྱམ་དུ་སྐུ་བལྟམས། དགུང་ལོ་ལྔ་པ་ལ་ཆོས་རྗེ་སྤྱང་གླིང་པ་ལས་དགེ་བསྙེན་ནོད། མཚན་བློ་གྲོས་བརྟན་པར་གསོལ། དགུང་ལོ་བདུན་པ་ལ་མཁན་ཆེན་གསེར་ཁང་པ་དང་མེ་སྟོན་འདུལ་འཛིན་པ་ལས་རབ་ཏུ་བྱུང༌། དགུང་ལོ་བཅུ་གསུམ་ནས་བཅུ་དགུ་བར་རྟག་བདེ་སེང་རྒྱལ་གྱི་ཞབས་ལ་གཏུགས་ཏེ་མདོ་སྔགས་ཀྱི་ཆོས་ལ་སྦྱངས། དགུང་ལོ་བཅུ་དགུ་པ་ལ་རྟག་བདེ་བ་གཤེགས་ནས་མང་མཁར་ཁྲ་ཚང་དུ་ལོ་ཙཱ་བ་ལོ་མཆོག་ལས་དུས་འཁོར་ཤོང་ལུགས། ཀ་ལཱ་པ་དང་ཙནྡ྄ར་པ། སྙན་ངག་མེ་ལོང་སོགས་གསན། རྟག་བདེ་ཏི་ཕུག་གི་མཁན་པོ་ཤེས་རབ་དཔལ་དང༌། ས་སྐྱའི་འཇམ་དབྱངས་གཞི་ཐོག་པ། འཇམ་སྐྱ་བ། རོང་པ་ཤེས་རབ་སེང་གེ་སོགས་ཀྱི་ཞབས་པད་བསྟེན། དགུང་ལོ་ཉི་ཤུ་པ་ལ་མཁན་ཆེན་གསེར་ཁང་པ་དང་མེ་སྟོན་འདུལ་འཛིན་པ་ལས་བསྙེན་པར་རྫོགས། ཨ་ཙ་ར་བྱུང་ཚད་ལས་ཕྲལ་སྐད་བསླབས། འཇམ་དབྱངས་གཞི་ཐོག་པ་དང་པཎྜི་ཏའི་དབང་གི་ལོ་ཙཱ་མཛད་པས་ལོ་ཙཱ་བར་གྲགས། ཉེར་གཅིག་པ་ལ་བལ་ཡུལ་དུ་བྱོན། དགུང་ལོ་སོ་གཉིས་པ་ལ་གུང་ཐང་གནས་པོ་ཆེར་ཆོས་གཞི་བཙུགས། ཡ་ཚེ་དང་ཧོར་རྒྱལ་པོས་གདན་འདྲེན་བྱུང་བ་ལ་བར་ཆད་དུ་གཟིགས་ནས། སྤྲིངས་ཡིག་གོང་འོག་ཅན་གྱིས་ཡ་ཚེ་བཟློག ཅད་པུ་དགོན་གསར་ལ་སེང་གེ་གླིང་དུ་བཏགས་ཏེ་དེར་བཞུགས་པས་ཧོར་བཟློག སྐབས་དེར་ས་སྐྱར་བྱོན་ནས་ལོ་མཆོག་པ་ལ་མངའ་བའི་བཀའ་ལུང་མཐའ་གསན། དགུང་ལོ་དྲུག་ཅུ་རེ་གཉིས་པ་ལ་བོ་དོང་ཨེའི་གདན་ཁྲིར་ཕེབས། དབུས་སུ་ཕེབས་ནས་ཆོས་མང་དུ་གསུངས་པས་དབུས་ཀྱི་དགེ་བའི་བཤེས་གཉེན་ཕལ་མོ་ཆེས་གསན། སྣར་ཐང་དུ་མཆིམས་བློ་བཟང་པ་སོགས་ལ་དགོངས་རྒྱན་སྙན་ངག་གནང༌། མཁས་པའི་བདག་ཉིད་བུ་དོལ། རྒྱལ་སྲས་པ། ལོ་ཆེན་བྱང་ཆུབ་རྩེ་མོ། གུང་ཐང་བདེ་བློ། མ་ཏི་པཎ་ཆེན། ཀུན་སྤངས་ཆོས་གྲགས་དཔལ། འཇམ་དབྱངས་དོན་ཡོད་རྒྱལ་མཚན། ནེ་རིང་པ་འཇམ་དབྱངས་མཚན་ཅན་སོགས་ཀྱིས་དཔང་ལོ་ཆེན་པོའི་ཞབས་ལ་བཏུད། རྗེ་འདི་ཉིད་ཀྱི་འགྱུར་ལ་མཚོན་ན། དཔལ་རྡོ་རྗེ་སྙིང་པོ་རྒྱན་ཞེས་བྱ་བའི་རྒྱུད་ཀྱི་རྒྱལ་པོ་ས་སྐྱ་པཎྜི་ཏས་བསྒྱུར་བའི་འཕྲོ་རྣམས་རྫོགས་པར་བསྒྱུར། བསྟན་འགྱུར་ལས། དཔལ་ལྡན་དྲི་མ་དང་བྲལ་བའི་འོད་ཀྱི་རྒྱུད་ལ་འཇུག་པའི་བཤད་སྦྱར་མི་གཡོ་བའི་སྙིང་པོ་སྣང་བ་ཞེས་བྱ་བ། རྣལ་འབྱོར་ཡན་ལག་དྲུག་གི་བརྗེད་བྱང་། དབང་མདོར་བསྟན་གྱི་འགྲེལ་པ། ཚད་མ་ཀུན་ལས་བཏུས་པའི་འགྲེལ་པ་རྒྱལ་དབང་བློས་མཛད་པ་དང༌། སི་སོགས་ཀྱི་མཐའ་དཔྱད་འཇམ་དཔལ་གྲགས་པས་མཛད་པའི་ཙནྡར་པའི་ཡི་གེའི་མདོ་ཏིང་མཐའི་བྱ་བ་སློབ་དཔོན་གཙང་ཁ་ཤས་མཛད་པའི་འགྲེལ་པ་མདོར་བསྟན་སོགས་གཞི་འགྱུར་དང་ཞུ་ཆེན་མང་དུ་མཛད་ཅིང༌། དུས་འཁོར་འགྲེལ་ཆེན་གྱི་བསྟོད་འགྲེལ། ཀ་ལཱ་པ། སྙན་ངག་མེ་ལོང་གི་འགྲེལ་པ། ཚོགས་གསུམ་གསལ་བ་སོགས་བསྟན་བཅོས་མང་དུ་བཀའ་རྩོམ་མཛད་ཅིང༌། གཞན་དོན་གྱི་བྱ་བ་རྫོགས་ནས་དགུང་ལོ་དྲུག་ཅུ་རེ་བདུན་ལ་ཕེབས་པ་རབ་བྱུང་དྲུག་པའི་ཆུ་རྟ ༡༣༤༢ ལོར་བོ་དོང་ཨེར་དག་པའི་ཞིང་དུ་གཤེགས།

{{#arraymap:དཔང་བློ་གྲོས་བརྟན་པ་

|; |@@@ | | }}