25961

དཔལ་ཀུན་རིག་རྣམ་པར་སྣང་མཛད་ (1)

Part of speech

མིང་ཚིག

Definition

དཔལ་ཀུན་རིག་རྣམ་པར་སྣང་མཛད་ནི། གསང་སྔགས་ཕྱི་རྒྱུད་པའི་ལུགས་ལྟར་ན། སྟོན་པ་ཤཱཀྱ་ཐུབ་པས་ཡིད་ཀྱི་ལུས་འོག་མིན་དུ་གཤེགས་ཏེ་མངོན་པར་རྫོགས་པ་སངས་རྒྱས་པ་ལ་གསུངས་ཏེ། དཔལ་གསང་བ་སྙིང་པོའི་རྒྱུད་དོན་གསལ་བྱེད་མེ་ལོང་ལས། སྔགས་ཕྱི་རྒྱུད་པ་རྣམས་ཀྱི་སྣང་ངོར་ལྷའི་བུ་དམ་པ་ཏོག་དཀར་པོ་དེ་བྱང་ཆུབ་སེམས་དཔའ་ས་མཐར་ཕྱིན་པ་སྲིད་པ་ཐ་མ་བ་སྐྱེ་བ་གཅིག་གིས་ཐོགས་པ་ཅན་ཞིག་ཡིན་ལ། དེ་མིའི་རྒྱལ་བུ་དོན་གྲུབ་ཏུ་སྐྱེ་བ་བཞེས་ནས་ཁྱིམ་ནས་ཁྱིམ་མེད་པར་རབ་ཏུ་བྱུང་ཞིང་། ཆུ་བོ་ནཻ་རཉྫ་ནའི་འགྲམ་ན་དཀའ་ཐུབ་མཛད་ཅིང་བྱང་ཆུབ་སྙིང་པོར་བཞུགས་པ་ལ། སངས་རྒྱས་རྣམས་ཀྱིས་བསྐུལ་པས་མི་གཡོ་བའི་ཏིང་ངེ་འཛིན་བཞེངས་ནས་རྣམ་སྨིན་གྱི་ལུས་ནཻ་རཉྫ་ནའི་འགྲམ་དུ་བཞག་ནས། ཡིད་ཀྱི་ལུས་འོག་མིན་གྱི་གནས་སུ་ཕྱིན་ཏེ་དོན་དམ་པ་བྱང་ཆུབ་ཀྱི་མཆོག་ཏུ་སེམས་བསྐྱེད་པ་ལ་སངས་རྒྱས་རྣམས་ཀྱིས་དབང་བསྐུར་ནས། དཔལ་ཀུན་རིག་རྣམ་པར་སྣང་མཛད་དུ་མངོན་པར་རྫོགས་པར་སངས་རྒྱས། དེ་ནས་སུམ་ཅུ་རྩ་གསུམ་གྱི་གནས་སུ་བབས་ནས་ལྷ་ཡུལ་གྱི་གདུལ་བྱ་རྣམས་སྨིན་པར་མཛད། དེ་ནས་མི་ཡུལ་གྱི་གདུལ་བྱ་རྣམས་འདུལ་བའི་དོན་དུ་སླར་དཀའ་ཐུབ་ཀྱི་ཁོང་པར་བཞུགས་ནས་བྱང་ཆུབ་ཀྱི་ཤིང་དྲུང་དུ་སངས་རྒྱས་པ་ལ་སོགས་པའི་ཚུལ་བསྟན་པར་སྣང་ངོ་། །དེ་ཡང་འདི་ཉིད་ཀྱི་ལེའུ་དྲུག་པ་ལས། ཉན་ཐོས་རྣམས་ལ་དགྲ་བཅོམ་གཟུགས། །རང་རྒྱལ་རྣམས་ལ་བསེ་རུའི་ཚུལ། །གཞན་ཡང་ཐེག་མཆོག་རིམ་པ་བཞིན། །འོག་མིན་བླ་མེད་གནས་མཆོག་ཏུ། །སྐུ་ནི་རྣམ་པར་སྣང་མཛད་ཚུལ། །ཞེས་པས་མངོན་ནོ། །ཞེས་གསུངས།