26065

དཔལ་གསེར་གྱི་འོད་ཅན་གྱི་མཆོད་རྟེན་ (1)

Part of speech

མིང་ཚིག

Definition

སྟོན་པ་ཤཱཀྱ་ཐུབ་པའི་མཛད་པ་བཅུ་གཉིས་ཀྱི་ཡ་གྱལ་བདུད་འདུལ་བའི་མཛད་པ་འདོན་སྐབས་རང་བྱུང་དུ་བྱོན་པར་གྲགས་པའི་མཆོད་རྟེན་ཞིག་སྟེ། དཔལ་གསང་བ་སྙིང་པོའི་རྒྱུད་དོན་གསལ་བྱེད་མེ་ལོང་ལས། ཐོག་མར་བདུད་བསྐུལ་བའི་ཕྱིར་སྨིན་མཚམས་ནས་འོད་ཟེར་བཀྱེ་སྟེ། བྱང་ཆུབ་སེམས་དཔའ་མང་པོ་འཁོར་དུ་བསྡུས་ནས་བདུད་ཀྱི་གནས་མོག་མོག་པོར་བྱས་པ་དང་། བདུད་སྡིག་ཅན་གྱིས་བདུད་ཀྱི་དཔུང་མི་འཁྲུགས་ཕྲག་གཅིག་བསྡུས་ཏེ་ཆོ་འཕྲུལ་སྣ་ཚོགས་བསྟན་ཅིང་མཚོན་ཆ་སྣ་ཚོགས་འཕངས་པ་རྣམས་མེ་ཏོག་གི་ཆར་དུ་གྱུར་ཅིང་། བདུད་རྣམས་ཀྱིས་རྒྱུ་བསོད་ནམས་ཀྱི་ཚོགས་ལ་སྐུར་པ་འདེབས་པའི་ཚེ་སའི་ལྷ་མོ་དཔང་གསོལ་ཏེ་སའི་ལྷ་མོས་དཔང་པོ་བྱས་པས་བདུད་རྣམས་སྐྱེངས་ནས་བྱེར་བར་གྱུར་ཅིང་། བདུད་ཀྱི་བུ་མོ་རྣམས་ཀྱི་གཡོ་སྒྱུས་ཀྱང་བསླུར་མ་ཚུགས་པར་བདུད་ཀྱི་དཔུང་རྣམས་འཐོར་ནས་ཞག་བདུན་དུ་འཕྲད་པར་མ་གྱུར་ཏོ། །དེའི་ཚེ་དཔལ་གསེར་གྱི་འོད་ཅན་གྱི་མཆོད་རྟེན་རང་བྱུང་དུ་བྱོན་ཏོ། །ཞེས་གསུངས།