27502

དབུ་མ་བའི་ལུགས་ཀྱི་ཐུན་མིན་འགོག་པའི་སྙོམས་འཇུག་ (1)

Part of speech	མིང་ཚིག
Definition	ཐུན་མོང་མ་ཡིན་པ་ཡང་དག་མཐའ་ལ་སྙོམས་པར་འཇུག་པའི་འགོག་སྙོམས་ཀྱི་ངོ་བོ་ནི། ཤེར་ཕྱིན་ལྷག་པར་ཐོབ་པའི་སྟོབས་ཀྱིས་མཚན་འཛིན་གྱི་སྤྲོས་པ་མཐའ་དག་བཀག་པའི་དེ་བཞིན་ཉིད་ལ་རྩེ་གཅིག་པའི་ཡེ་ཤེས་སོ། །གང་ཟག འདི་ལ་ཐེག་ཆེན་འཕགས་པ་རྣམས་འཇུག་གི ཐེག་དམན་རྣམས་མི་འཇུག་སྟེ། འདིའི་དགག་བྱའི་གཙོ་བོ་མཚན་འཛིན་གྱི་སྤྲོས་པ་འགོག་མི་ནུས་པའི་ཕྱིར། ས་མཚམས། ས་དྲུག་པ་ནས་འཐོབ་སྟེ། དེར་ཤེར་ཕྱིན་ལྷག་པར་ཐོབ་པའི་ཕྱིར་རོ། །ས་བདུན་པ་ནས་སྐད་ཅིག་རེ་རེ་ལ་འཇུག་ལྡང་བྱེད་ནུས་ཏེ། དེར་མཚན་འཛིན་གྱི་སྤྲོས་པ་དངོས་སུ་འགོག་པའི་ནུས་པ་ཐོབ་པའི་ཕྱིར། ས་བརྒྱད་པར་ནི་རྩོལ་མེད་དུ་འཇུག་ནུས་ཏེ། མཚན་འཛིན་གྱི་སྤྲོས་པ་མཐའ་དག་དང་བྲལ་བའི་ཕྱིར་རོ། །སངས་རྒྱས་ཀྱི་སར་ནི་དུས་རྟག་ཏུ་མཉམ་པར་བཞག་པའི་སྒོ་ནས་གཞན་དོན་འབད་མེད་ལྷུན་གྲུབ་ཏུ་འབྱུང་བ་ཡིན་ཏེ། སངས་རྒྱས་འཕགས་པས་རྫོགས་སྨིན་སྦྱངས་གསུམ་བྱས་ནས་ཡང་དག་མཐའ་མངོན་དུ་བྱས་པའི་ཕྱིར་རོ། །དགག་བྱ་ནི། སའི་སྙིང་པོ་འཁོར་ལོ་བཅུ་པའི་མདོ་ལས་འདུ་ཤེས་གསུམ་གསུངས་པའི་མཚན་འཛིན་གྱི་སྤྲོས་པའི་འདུ་ཤེས་ནི་འདིའི་ཐུན་མོང་མ་ཡིན་པའི་དགག་བྱ་ཡིན་ནོ། །འདི་ནས་བཤད་པའི་མཚན་འཛིན་དང་། སྐབས་དང་པོར་སྦྱོར་ལམ་གྱི་དགག་བྱར་བཤད་པའི་མངོན་ཞེན་དང་། སྐབས་དང་པོ་དང་ལྔ་པར་བཤད་པའི་བཏགས་འཛིན་རྟོག་པ་དང་། སྐབས་གསུམ་པར་བཤད་པའི་གཞི་ལམ་འབྲས་གསུམ་ལ་མཚན་མར་འཛིན་པའི་མཚན་འཛིན་དང་། རྒྱུད་བླ་ནས་བཤད་པའི་ཤེས་སྒྲིབ་དང་། འཇུག་པ་ལས་བཤད་པའི་འཁོར་གསུམ་དུ་རྣམ་པར་རྟོག་པའི་བློ་རྣམས་དོན་གཅིག་ཅིང་། དེ་ནི་ཐེག་ཆེན་ཐུན་མོང་མ་ཡིན་པའི་དགག་བྱ་ཡིན་གྱི་ཐེག་དམན་གྱིས་དེ་འགོག་མི་ནུས་ཤིང་མ་བཀག་ཀྱང་རང་གི་བྱང་ཆུབ་ཐོབ་པ་ལ་གེགས་ཅུང་ཟད་ཀྱང་མི་བྱེད་དོ། །འགོག་བྱེད་ནི། ཤེར་ཕྱིན་ལྷག་པར་ཐོབ་པའི་སྟོབས་ཀྱིས་མཚན་འཛིན་གྱི་སྤྲོས་པ་མཐའ་དག་འགོག་པའི་ནུས་པ་མཐུ་ཅན་དུ་གྱུར་པའི་ཟག་མེད་ཀྱི་ཡེ་ཤེས་ནི་འགོག་བྱེད་ཀྱི་ཤེས་པ་ཡིན་ཏེ། འདིར་འགོག་བྱེད་ཀྱི་ཤེས་པ་དང་། འགོག་པའི་སྙོམས་འཇུག་གཉིས་ནི་ཤེས་པ་རིགས་རྒྱུན་གཅིག་ལ་འཇོག་དགོས་པའི་ཕྱིར་རོ། །ཐེག་ཆེན་ཐུན་མོང་མ་ཡིན་པའི་རྟོགས་རིགས་སུ་གྱུར་པའི་མཚན་འཛིན་གྱི་སྤྲོས་པ་མཐའ་དག་བཀག་པའི་མཚན་མེད་རྟོགས་པའི་ཤེས་རབ་དེ་ཐེག་ཆེན་གྱི་ཚོགས་སྦྱོར་གྱི་གནས་སྐབས་སུ་དོན་སྤྱིའི་ཚུལ་དུ་བསྒོམས་པའི་མཐུས་ཐེག་ཆེན་གྱི་མཐོང་ལམ་དུ་མངོན་སུམ་དུ་རྟོགས། ས་དྲུག་པར་མཚན་འཛིན་གྱི་སྤྲོས་པ་འགོག་པའི་ནུས་པ་ཐོབ། ས་བདུན་པར་སྐད་ཅིག་རེ་རེ་ལ་འཇུག་ལྡང་ནུས། ས་བརྒྱད་པར་རྩོལ་མེད་དུ་འཇུག་ནུས། སངས་རྒྱས་ཀྱི་སར་ཇི་ལྟ་བ་མཁྱེན་པའི་རྣམ་མཁྱེན་དུ་འགྱུར་བས་ན། ཐེག་ཆེན་རང་གི་རྟོགས་རིགས་ཐུན་མོང་མ་ཡིན་པ་དེ་ལ་ས་དྲུག་པ་ནས་འདིའི་འགོག་སྙོམས་སུ་བཞག་པ་ཙམ་མོ། །ཞེས་ཀུན་མཁྱེན་གོ་རམས་པའི་སྙོམས་འཇུག་རབ་གསལ་ལས་སོ། །
Domain	ཆོས་ལུགས།