27548

དབུ་མའི་གཞུང་གི་རང་བཞིན་ཕུན་ཚོགས་ (1)

Part of speech	མིང་ཚིག
Definition	མདོ། དབུ་མ། རང་བཞིན་ཕུན་སུམ་ཚོགས་པ་ནི་སངས་རྒྱས་རྣམས་ཀྱིས་བརྡར་བཏགས་པའི་དབུ་མ་ཞེས་པའི་མཚན་གྱི་དོན། མཐའ་དང་བྲལ་བ་དང་། མཐར་ཐུག་པ་དང་། རྗེས་སུ་འབྲེལ་བའི་ཡོན་ཏན་གསུམ་ལས། དང་པོ་མཐའ་དང་བྲལ་བ་འཇུག་པའི་ཡུལ་ཡང་གསུམ་སྟེ། གཞི་དབུ་མར་བརྗོད་པས་བདེན་པ་གཉིས་པོ་དག་ཕན་ཚུན་དང་སོ་སོ་ལ་ལྟོས་ནས་ཡོད་མེད་རྟག་ཆད་ཀྱི་མཐའ་དང་བྲལ་བ་དང་། ལམ་དབུ་མར་བརྗོད་པས་ཐབས་ཤེས་རབ་གཉིས་པོ་དེ་སྒྲོ་འདོགས་དང་སྐུར་བའི་མཐའ་དང་བྲལ་བ་དང་། འབྲས་བུ་དབུ་མར་བརྗོད་པས་མི་གནས་པའི་མྱ་ངན་ལས་འདས་པ་ནི། སྲིད་པ་དང་ཞི་བའི་མཐའ་གཉིས་དང་བྲལ་བའི་ཕྱིར་རོ། ། མཐར་ཐུག་པ་འཇུག་པའི་ཡུལ་ཡང་གསུམ་སྟེ། བདེན་པ་གཉིས་པོ་ནི་གཞིའི་མཐར་ཐུག་ཡིན་ཏེ། ཤེས་བྱའི་ལུས་ཐམས་ཅད་ལ་ཁྱབ་པའི་ཆོས་ཅན་དང་ཆོས་ཉིད་ཡིན་པས་དངོས་པོའི་ལུས་ཉིད་དང་། རྟོགས་པས་སྒྲོ་སྐུར་གྱི་མཐའ་ཟད་པར་སྤོང་བས་ཤེས་བྱའི་གནས་ཉིད་དང་། དེ་ལ་འཁྲུལ་མ་འཁྲུལ་གྱིས་ཉོན་མོངས་དང་རྣམ་བྱང་དུ་འགྱུར་བས་ངེས་ལེགས་ཀྱི་དམིགས་པ་ཡིན་པའི་ཕྱིར་རོ། །ཐབས་ཤེས་རབ་གཉིས་ནི་ལམ་གྱི་མཐར་ཐུག་པ་ཡིན་ཏེ། དུས་གསུམ་གྱི་སངས་རྒྱས་ཐམས་ཅད་གཤེགས་ཤིང་རྗེས་སུ་གཤེགས་པའི་ཤུལ་ཡིན་པ་དང་། ཇི་སྐད་འཆད་པའི་འབྲས་བུ་འགྲུབ་པ་ལ་དགོས་ཤིང་ཚང་བས་ངེས་པའི་རྒྱུ་ཡིན་པ་དང་། མ་མཐོང་བའི་གཡང་ས་མེད་ཅིང་ཉམས་སུ་འབབ་པས་འཇུག་པ་བདེ་བའི་སྒོ་ཡིན་པའི་ཕྱིར་རོ། །མི་གནས་པའི་མྱ་ངན་འདས་པ་ནི་འབྲས་བུ་རྣམས་ཀྱི་མཐར་ཐུག་པ་ཡིན་ཏེ། བདག་གི་དོན་གྲུབ་པ་དང་། གཞན་གྱི་དོན་བྱེད་པས་སྐྱེས་བུ་ཆེན་པོ་རྣམས་ཀྱི་གཉེར་བྱའི་དོན་ཚང་བ་དང་། སྤངས་རྟོགས་ཡོངས་སུ་རྫོགས་པས་དེ་ལས་ལྷག་པའི་དོན་མེད་པ་དང་། འདས་པའི་ལམ་གྱིས་ཐོབ་པས་སླར་ལྡོག་པ་མེད་པར་སོན་པའི་ཕྱིར་རོ། ། གསུམ་པ་དེ་དག་རྗེས་སུ་འབྲེལ་པ་ནི། གཞི་ལམ་འབྲས་བུ་གསུམ་པོ་དེ་དག་ཕན་ཚུན་ངེས་པས་འབྲེལ་བ་དང་། དགོས་པ་ཚང་བས་འཚམ་པ་དང་། ལག་རྗེས་མ་འཁྲུལ་བས་མཐུན་པའི་ཕྱིར་རོ། །ཞེས་ཀུན་མཁྱེན་གོ་རམས་པས་དབུ་མའི་སྤྱི་དོན་ལས་གསུངས་སོ། །
Domain	ཆོས་ལུགས།