27815

དབོན་ཞང་རྡོ་རིང་།་ (1)

Part of speech	མིང་ཚིག
Definition	རྡོ་རིང་དེ་ནི་ལྷ་སའི་གཙུག་ལག་ཁང་གི་རྒྱལ་སྒོའི་མདུན་དེ་སྔོན་རྒྱ་བཟའ་ཝུན་ཁྲེན་ཀོང་ཇོས་བཙུགས་པར་གྲགས་པའི་རྒྱ་ལྕང་ཞིག་ཡོད་པ་དེའི་མཁྲིས་སུ་གནས་ཤིང་རྡོ་རིང་དེའི་མཐོ་ཚད་ལ་སྤྱི་ཁྲེ༤. ༧༨དང་ཞེང་ལ་སྤྱི་ཁྲེ༠. ༩༥མཐུག་ཚད་ལ་སྤྱི་ཁྲེ་༠. ༥༠བཅས་ཡོད་པ་དང༌། རྡོ་རིང་གི་རྩེ་མོར་ཆར་ཁེབས་དང་ཏོག་ཞབས་ཏུ་རྡོའི་རུས་སྦལ་གྱི་སྟེགས་བཅས་ཡོད། རྡོ་རིང་གི་ངོས་བཞི་ཀར་ཡི་གེ་བཀོད་ཅིང༌། ཤར་ངོས་སུ་བོད་ཡིག་ཡིག་ཕྲེང་༧༡དང་ནུབ་ངོས་ཀྱི་གཡོན་དུ་བོད་ཡིག་ཡིག་ཕྲེང་༧༧དང་གཡས་སུ་རྒྱ་ཡིག་ཡིག་ཕྲེང ༦. བྱང་ངོས་ཆིངས་འགྲིག་ལ་ཞུགས་མཁན་བོད་ཕྱོགས་ཀྱི་དཔོན་རིགས་བཅུ་བདུན་གྱི་མིང་རྒྱ་བོད་ཤན་སྦྱར་དང༌། ལྷོ་ངོས་སུ་ཆིངས་འགྲིག་ལ་ཞུགས་མཁན་རྒྱ་ཕྱོགས་ཀྱི་དཔོན་རིགས་བཅོ་བརྒྱད་ཀྱི་མིང་རྒྱ་བོད་ཤན་སྦྱར་བཅས་བཀོད་ཡོད། བོད་ཀྱི་བཙན་པོ་ཁྲི་གཙུག་ལྡེ་བཙན་དང་ཐང་རྒྱལ་རབས་ཀྱི་གོང་མ་མུའི་ཙུང་གི་དུས་སུ་བོད་རྒྱ་ཕྱོགས་གཉིས་པོས་ཕོ་ཉ་བ་མངགས་ནས་བཙན་པོ་ཁྲི་རལ་པ་ཅན་གྱི་ཁྲི་ལོ་བདུན་པ་ལྕགས་གླང་ཕྱི་ལོ་ ༨༢༡ ལོར་ཐང་གི་རྒྱལ་ས་ཁྲང་ཨན་དང༌། ཆུ་སྟག་ཕྱི་ལོ་ ༨༢༢ ལོརབོད་ཀྱི་རྒྱལ་ས་སོ་སོར་སྔ་རྗེས་སུ་ཆིངས་འགྲིག་བྱས་པ་མ་ཟད་བཙན་པོ་ཁྲི་རལ་པ་ཅན་གྱི་ཁྲི་ལོ་དགུ་པ་ཆུ་ཡོས་ཕྱི་ལོ་ ༨༢༣ ལོར་ལྷ་སར་ཆིངས་ཡིག་གི་ནང་དོན་རྡོ་རིང་ལ་བཀོད་དེ་གཙུག་ལག་ཁང་གི་མདུན་དུ་བཙུགས་ཡོད། ད་དུང་ཐང་གི་རྒྱལ་ས་ཁྲང་ཨན་དུའང་རྡོ་རིང་དེ་འདྲ་ཞིག་བཙུགས་པར་འཁོད་ཀྱང་ད་ལྟ་བསྡད་མེད། རྡོ་རིང་གི་ཡི་གེའི་ནང་དུ་དེ་སྔོན་སྲོང་བཙན་སྒམ་པོ་དང་ཁྲི་ལྡེ་གཙུག་བཙན་རྒྱལ་ཐོག་གཉིས་ཀྱི་སྐབས་སུ་ཐང་རྒྱལ་རབས་ཝུན་ཁྲེན་ཀོང་ཇོ་དང་ཀིམ་ཤིང་ཀོང་ཇོ་གཉིས་སྔ་རྗེས་སུ་བཙན་པོའི་ཇོ་མོར་བསུས་ནས་བོད་རྒྱ་གཉེན་དུ་འབྲེལ་ཏེ་དབོན་ཞང་དུ་གྱུར་པའི་ལོ་རྒྱུས་དོན་ཆེན་ལ་དྲན་གསོ་དང༌། ཐང་བོད་གཉིས་སྔར་ནས་ཆབ་སྲིད་གཅིག་ཏུ་མོལ་ཏེ་བོད་རྒྱ་མི་རིགས་དབར་མཛའ་མཐུན་དམ་ཟབ་ཀྱི་འབྲེལ་བ་ཆགས་པ་མ་ཟད། ཐ་ན་སྐབས་རེ་མཐའ་མཚམས་སོ་བློན་གྱིས་ས་ཆ་ཆ་ཤས་སུ་དམག་འཁྲུག་བསླངས་ནས་ཟིང་ཆ་བྱུང་བའི་སྐབས་ཀྱང་ཕན་ཚུན་འགྲོ་འོང་རྒྱུན་མི་ཆད་པའི་མཛའ་བཤེས་འབྲེལ་བར་ནན་བཤད་བྱས་པ་ཕྱོགས་གཉིས་ཀས་དུས་གཏན་དུ་འཁོན་རྩོད་ཞི་བར་བྱས་ནས“གཉེན་རྙིང་པའི་སྲི་ཞུ་དང་དེའི་སྔ་ཁྱིམ་མཚེས་དགྱེས་པའི་ཚུལ་སླར་དུ་བརྩེགས་ཏེ་རབས་ཁྲིར་སྐྱིད་པའི་མཇལ་དུམ་ཆེན་པོ་མཛད་པ་དེ་བོད་རྒྱ་མི་རིགས་གཉིས་པོའི་མི་དམངས་ཀྱི་རེ་འདོད་དང་བསམ་འདུན་མཚོན་པར་གསལ་བཤད་བྱུང་བ་མཚོན་པའི་ལོ་རྒྱུས་ཀྱི་དབང་རྟགས་གནད་ཆེན་ཞིག་ཡིན།
Domain	ལོ་རྒྱུས།