29708

དུས་བཞི་ཅིག་ཆར་པའི་ལུགས་ (1)

Part of speech	མིང་ཚིག
Definition	མདོ། མངོན་པ། ཅིག་ཆར་བའི་ལུགས་ནི། མཁས་པ་ཁ་ཅིག གླིང་བཞི་ཆར་དུ་དགུན་དགུན་མཉམ། དཔྱིད་དཔྱིད་མཉམ། དབྱར་དབྱར་མཉམ། སྟོན་སྟོན་མཉམ་འབྱུང་ངོ་། །གཞུང་ནས་བསྟན་པའི་དུས་བཞི་གང་ནས་འབྱུང་ནི། གླིང་བཞི་ལ་ནམ་ཕྱེད་ཉི་མ་ནུབ་པ་དང་། ཉི་མ་ཕྱེད་དང་འཆར་དུས་གཅིག་པ། སྟོན་ཉིན་མཉམ་མཚན་མཉམ་གྱི་དུས་ཉིན་ཞག་གཅིག་དང་། དཔྱིད་ཉིན་མཉམ་མཚན་མཉམ་གྱི་དུས་ཉིན་ཞག་གཅིག་ཁོ་ན་ལ་འབྱུང་གི་གཞན་རྣམས་ལ་མི་འབྱུང་ངོ་། །ཉི་མས་གླིང་དུ་ལ་བྱ་བ་བྱེད་པ། ཉི་ཟླས་གླིང་གཅིག་ཁོ་ན་ལ་བྱ་བ་བྱེད་པའི་དུས་ཡོད་དེ། དགུན་ཉི་ཐུང་བ་མཐར་ཐུག་པའི་ཚེ་གླིང་གང་རུང་གཅིག་གི་ཉིན་ཕྱེད་ཀྱི་དུས་སུ་གླིང་དེ་ཁོ་ན་ལ་བྱ་བ་བྱེད་པའི་ཕྱིར་ཏེ། གླིང་གཅིག་ཤོས་ནས་ཉི་མ་ནུབ་ནས་ཡུད་ཙམ་གསུམ་སོང་། གཅིག་ཤོས་སུ་ཉི་མ་ཤར་བ་ལ་ཡུད་ཙམ་གསུམ་ལུས་པས་དེ་ལ་བྱ་བ་མི་བྱེད་པའི་ཕྱིར་རོ། །དེ་ནས་ཡུད་ཙམ་གསུམ་སོང་བ་ན་མདུན་ཕྱོགས་ཀྱི་གླིང་ལ་ཉི་མ་ཤར་བས་གླིང་གཉིས་ལ་བྱ་བ་བྱེད་ཅིང་། དེ་ནས་ཡུད་ཙམ་དྲུག་སོང་བ་ན་མདུན་ཕྱོགས་ཀྱི་གླིང་དུ་ཉི་མ་ཕྱེད་པའི་ཚེ་གླིང་དེ་ཁོ་ན་ལ་བྱ་བ་བྱེད་པའི་ཚུལ་ནི་སྔར་བཞིན་ནོ། །ཡང་ཉི་མས་གླིང་གཉིས་ཁོ་ན་ལ་བྱ་བ་བྱེད་པ་ཡོད་དེ། སྟོན་དཔྱིད་ཀྱི་ཉིན་མཉམ་མཚན་མཉམ་གྱི་དུས་ཀྱི་ཞག་གཉིས་པོ་དེ་ལ་གླིང་གཉིས་ཁོ་ན་ལ་བྱ་བ་བྱེད་པའོ། །ཉི་མས་གླིང་གསུམ་ལ་བྱ་བ་བྱེད་པ་ཡང་ཡོད་དེ། དབྱར་ཉི་རིང་བ་མཐར་ཐུག་པའི་ཚེ། གླིང་གང་རུང་གཅིག་གིས་ཉིན་ཕྱེད་ཀྱི་དུས་སུ། གླིང་གཅིག་ཤོས་ནས་ཉི་མ་ནུབ་པ་ལ་ཡུད་ཙམ་གྱི་གསུམ་ལུས། མདུན་ཕྱོགས་ཀྱི་གླིང་དུ་ཉི་མ་ཤར་ནས། ཡུད་ཙམ་གསུམ་སོང་བའི་ཕྱིར་རོ། །ལུགས་འདི་ལ་གླིང་གང་རུང་གཅིག་གི་དཀྱིལ་དུ་ཉི་མ་ཡོད་པའི་ཚེ་ཉི་མའི་འོད་ཟེར་གྱི་མཐའ་ཟད་མ་ཟད་ཀྱི་སྒོ་ནས་ཉི་མ་འཆར་ནུབ་འཇོག་པ་ཡིན་གྱི་སྒྲིབ་བྱེད་ཡོད་མེད་ཀྱི་སྒོ་ནས་འཆར་ནུབ་འཇོག་པ་མ་ཡིན་ཏེ། ཐང་ཆེན་པོའི་དཀྱིལ་དུ་མར་མེ་བཞག་པ་བཞིན་ནོ་ཞེས་ཟེར་རོ། །དེ་ཉིད་འཐད་པར་མཐོང་སྟེ། ཉི་ཟླའི་མཐོ་དམན་ནི་གསེར་རི་དང་པོ་དང་མཉམ་ཞིང་། འཆར་ས་ནི་གསེར་རི་བདུན་ཆར་བརྒལ་ནས་ཕྱིའི་རྒྱ་མཚོའི་དཀྱིལ་དུ་གླིང་དཀྱིལ་ཕན་ཆད་དུ་འཆར་བས་ཉི་མའི་འོད་ཟེར་གྱི་ནུས་པ་མ་ཟད་ན་གླིང་གསུམ་ཆར་གསལ་བ་ལ་སྒྲིབ་བྱེད་ཅུང་ཟད་ཀྱང་མེད་པའི་ཕྱིར་རོ། །ཕྱོགས་འདི་ལའང་དབྱར་ཉི་རིང་བ་མཐར་ཐུག་པའི་ཚེ། ཉིན་ཞག་གཅིག་ལ་ཡུད་ཙམ་སུམ་ཅུ་སོ་དྲུག་ཡོད་པར་ཐལ། དེའི་ཚེ་འཛམ་བུ་གླིང་གི་ཉིན་བར་ལ་ཡུད་ཙམ་བཅོ་བརྒྱད་ཡོད་པ་གང་ཞིག བྱང་སྒྲ་མི་སྙན་གྱི་ཉིན་བར་ལ་ཡང་ཡུད་ཙམ་བཅོ་བརྒྱད་ཡོད་པ་དེ་འཛམ་བུ་གླིང་གི་མཚན་མོར་བྱ་དགོས་པའི་ཕྱིར་རོ། །ཞེས་པ་འདི་གནོད་བྱེད་དུ་འཇུག་གོ་སྙམ་ན། གཏན་ཚིགས་ཕྱི་མ་མ་གྲུབ་སྟེ། དེའི་ཚེ་འཛམ་བུའི་གླིང་དུ་ཉི་མ་འཆར་བའི་ཚེ་བྱང་སྒྲ་མི་སྙན་དུ་ཉི་མ་ནུབ་པ་ལ་ཡུད་ཙམ་གསུམ་ལུས་པའི་ཕྱིར་དང་། འཛམ་བུ་གླིང་དུ་ཉི་མ་ནུབ་པའི་ཚེ་སྒྲ་མི་སྙན་དུ་ཉི་མ་ཤར་ནས་ཡུད་ཙམ་གསུམ་སོང་བ་དེའི་ཉིན་མོ་ལྷོའི་འཛམ་བུ་གླིང་པའི་མཚན་མོ་དང་མི་མཉམ་པའི་ཕྱིར་རོ། །དེ་བཞིན་དུ་ལྷོ་བགྲོད་མཐར་ཐུག་པའི་ཚེ་ཉིན་ཞག་གཅིག་ལ་ཡུད་ཙམ་ཉི་ཤུ་རྩ་བཞི་ལས་མེད་པར་ཐལ་བར་ཡང་འདི་ཉིད་ཀྱིས་གསལ་ཏེ། ནམ་ཕྱེད་ཉི་མ་ནུབ་པ་དང་། ཉི་མ་ཕྱེད་དང་འཆར་དུས་གཅིག་པ་ལོ་གཅིག་ལ་ཉིན་ཞག་གཉིས་ལས་མེད་པའི་གནད་འདི་ཤེས་ན་ཐམས་ཅད་རང་གྲོལ་དུ་འགྱུར་རོ། །ཞེས་ཀུན་མཁྱེན་གོ་རམས་པའི་ངོ་མཚར་གསུམ་ལྡན་ལས་སོ། །
Domain	ཆོས་ལུགས།

{{#arraymap:དུས་བཞི་ཅིག་ཆར་པའི་ལུགས་

|; |@@@ | | }}