29716

དུས་བཞི་འཆོལ་བའི་ལུགས་ (1)

Part of speech	མིང་ཚིག
Definition	མདོ། མངོན་པ། འཆོལ་བའི་ལུགས་བརྗོད་པ་ནི། སྔོན་གྱི་མཁས་པ་ཁ་ཅིག་ན་རེ། འཛམ་བུ་གླིང་དུ་དགུན་ཉི་ཐུང་བ་མཐར་ཐུག་པའི་ཚེ་བྱང་སྒྲ་མི་སྙན་དུ་དབྱར་ཉི་རིང་བ་མཐར་ཐུག་པ་དང་། ཤར་ལུས་འཕགས་གླིང་དུ་དཔྱིད་ཉིན་མཉམ་མཚན་མཉམ་དང་། ནུབ་བ་གླང་ལོངས་སྤྱོད་དུ་སྟོན་ཉིན་མཉམ་མཚན་མཉམ་འབྱུང་ངོ་། །དེའི་ཚེ་འཛམ་བུ་གླིང་དུ་ཉིན་མོ་ལ་ཡུད་ཙམ་བཅུ་གཉིས། མཚན་མོ་ལ་ཡུད་ཙམ་བཅོ་བརྒྱད། བྱང་དུ་དེ་ལས་ལྡོག་པ་འབྱུང་ཞིང་། ཤར་གྱི་སྔ་དྲོ་ལ་ཡུད་ཙམ་དགུ་འབྱུང་སྟེ། བྱང་གི་ཕྱི་དྲོ་ལ་ཡུད་ཙམ་དགུ་ཡོད་པ་གང་ཞིག དེ་གཉིས་ཉི་མའི་བགྲོད་པ་གཅིག་པའི་ཕྱིར་རོ། །ཤར་གྱི་ཕྱི་དྲོ་ལ་ཡུད་ཙམ་དྲུག་འབྱུང་སྟེ། ལྷོའི་སྔ་དྲོ་ལ་ཡུད་ཙམ་དྲུག་འབྱུང་བ་གང་ཞིག དེ་གཉིས་ཉི་མའི་བགྲོད་པ་གཅིག་པའི་ཕྱིར། དེའི་ཚེ་ནུབ་ཀྱི་སྔ་དྲོ་ལ་ཡུད་ཙམ་དྲུག་འབྱུང་སྟེ། ལྷོའི་ཕྱི་དྲོ་ལ་ཡུད་ཙམ་དྲུག་པ་གང་ཞིག དེ་གཉིས་ཉི་མའི་བགྲོད་པ་གཅིག་པའི་ཕྱིར་རོ། །དེ་ནས་ཟླ་བ་གསུམ་སོང་བ་ན་འཛམ་བུའི་གླིང་དུ་དཔྱིད་ཉིན་མཚན་མཉམ་པ་དང་། ནུབ་ཏུ་དགུན་ཉི་ཐུང་བའི་མཐར་ཐུག་དང་། བྱང་དུ་སྟོན་ཉིན་མཉམ་མཚན་མཉམ་དང་། ཤར་དུ་དབྱར་ཉི་རིང་བའི་མཐར་ཐུག་པ་འབྱུང་ལ་དེ་ནས་ཟླ་བ་གསུམ་སོང་བ་ན་འཛམ་བུ་གླིང་དུ་དབྱར་ཉི་རིང་བའི་མཐར་ཐུག་པ་དང་། གཞན་རྣམས་དེས་འགྲེ། དེ་ནས་ཟླ་བ་གསུམ་སོང་བ་ན་འཛམ་བུའི་གླིང་དུ་སྟོན་ཉིན་མཉམ་མཚན་མཉམ་དང་། གཞན་རྣམས་དེས་འགྲེ་སྟེ། དེ་རྣམས་གླིང་གང་རུང་གཅིག་གིས་ལོ་གཅིག་ལ་འཁོར་བའོ། །གཞུང་ནས་བསྟན་པའི་དུས་བཞི་གང་ལ་འབྱུང་ངོས་བཟུང་བ་ནི། ལུགས་འདི་ལ་འཛམ་བུའི་གླིང་དུ་ནམ་ཕྱེད་པ་དང་། ནུབ་ཏུ་ཉི་མ་ནུབ་པ་དང་། བྱང་དུ་ཉི་མ་ཕྱེད་པ་དང་། ཤར་དུ་ཉི་མ་ཤར་བ་རྣམས་དུས་གཅིག་པ་ཞག་རེ་བཞིན་དུ་འབྱུང་བས་ཁྱབ་བོ། །ཉི་མ་མྱུར་བུལ་གྱི་རྒྱུ་མཚན་ནི། འོ་ན་ཉི་མ་གླིང་གི་དཀྱིལ་གྱི་ཐད་ཀྱི་ནམ་མཁར་འགྲོ་བའི་ཚེ་ལམ་ཐུང་ཡང་འགྲོ་བ་བུལ་བ་དང་། གླིང་གི་ཕྱི་རོལ་རྒྱ་མཚོར་འབབ་པའི་ཚེ་ལམ་རིང་ཡང་བགྲོད་པ་མྱུར་བའི་རྒྱུ་མཚན་ཅི་ཞེ་ན། རྒྱ་མཚོར་འབབ་པའི་ཚེ་རང་འདྲེན་བྱེད་ཀྱི་རླུང་གི་སྟེང་དུ་ལྕགས་རི་ཁའི་རླུང་བསྣན་པས་ཤིན་ཏུ་མྱུར་ལ། དེ་ནས་རི་རབ་ལ་ཐག་ཉེར་སོང་བའི་ཚེ་ལྕགས་རི་ཁའི་རླུང་དང་ཇེ་འགྱང་དུ་སོང་བས་བགྲོད་པ་ཇེ་བུལ་དུ་སོང་ལ། བྱང་བགྲོད་མཐར་ཐུག་པའི་ཚེ་རང་འདྲེན་བྱེད་ཀྱི་རླུང་ཁོ་ནས་འདྲེན་པས་ཤིན་ཏུ་བུལ་བར་སྔོན་གྱི་མཁས་པ་དག་བཞེད་དོ། །ཉི་མས་གླིང་དུ་ལ་བྱ་བ་བྱེད་ངོས་བཟུང་བ་ནི། ལུགས་འདི་ལ་ཉི་མས་གླིང་གཉིས་ནི་སྣང་བར་བྱེད་པ་དང་། གླིང་གཉིས་ནི་མུན་པར་བྱེད་པ་རྒྱུན་དུ་འབྱུང་ངོ། །ཞེས་ཀུན་མཁྱེན་གོ་རམས་པའི་ངོ་མཚར་གསུམ་ལྡན་ལས་སོ། །
Domain	ཆོས་ལུགས།