29879

དུས་སྦྱོར་གྱི་འབྲས་བཤད་བཅུ་གཉིས་ (1)

Part of speech

མིང་ཚིག

Definition

༡ ལུག་གི་ཁྱིམ་དང་ཏ་ཏྐཱལ་ལ། །དབང་བསྐུར་རབ་བྱུང་འབད་རྩོལ་ལས། །བྲན་བསྟེན་བཟོ་དང་སྐྲ་སེན་འབྲེག ། དགྲ་འཐབ་དམག་ཇག་བར་འདུམ་རགས། །ཁམས་སྦ་རང་གཞན་འབྲེལ་བ་བྱེད། །སྦྱིན་སྲེག་དགུག་དྲག་དྲག་ལས་བཟང་། །རབ་གནས་ལྷ་ཁང་རྟེན་བཞེང་དང་། །བག་མ་མཁར་ལས་གཏར་ཀ་རྒྱག ། མེ་བཙའ་ཚོང་བྱ་ཆར་དབབ་པ། །གསོན་དགེ་འདུན་གྲོས་བཀྲ་ཤིས་ལས། །རྫིང་ཡུར་ཁྲོན་འདྲུ་ས་བོན་གདབ། །ལྷ་གསོལ་སྐྱེ་ཤིང་མེ་ཏོག་འཛུགས། །ཞི་དབང་རྒྱས་པའི་ལས་རྣམས་ངན། །རྩོད་དང་ནོར་ནི་ཉམས་པ་དང་། །འཇིག་རྟེན་ཀུན་གྱི་མི་བསྙེན་དང་། །མི་དགེ་སྒྲུབ་བྱེད་སྡུག་བསྔལ་བས། །པྲ་ཏི་ཏ་ཡི་དུས་སྦྱོར་སྤང་། །གཟས་བཟུང་དམག་མི་མགར་བར་ངན། །སྐྱེས་པ་ཞག་བཅུ་ཟླ་བ་བཅུ། །ལོ་བཅུ་བཅོ་བརྒྱད་ཉི་ཤུའམ། །སུམ་ཅུར་མ་ཤི་ལོ་མང་འཚོ། །སྨིན་དྲུག་ཟླ་བའི་བཅུ་གསུམ་མམ། །མིག་དམར་མེས་འཚིག་ནམ་ཕྱེད་འཆི། །རྒྱལ་པོས་མཆོད་ཅིང་ཞིང་ལ་དགའ། །བྱ་ཤེས་ཆོས་ལྡན་མགྲོན་ལ་ཡང་། །ཚིག་གསལ་ཁོག་ཡངས་འདོད་ཆགས་ཆེ། །ཁྲོ་གཏུམ་བསམ་པ་ངན་པ་ཡིན། །ནད་ཀྱིས་བཏབ་ན་འཆི་བའི་ཉེན། །བཙོན་ཚུད་མྱུར་དུ་ཐར་པ་ཡིན། ། ༢ གླང་གི་ཁྱིམ་དང་ཏཀྟཱལ་ལ། །རབ་བྱུང་སྦྱིན་སྲེག་དབང་དྲག་ལས། །རྒྱན་སྤྲོས་བག་མ་དྲ་གྱོན་བཟོ། །གཏར་སྲེག་མོ་རྩིས་སྐྲ་སེན་འབྲེག ། ལྷ་གསོལ་བཟློག་རིམ་སྲི་མནན་བྱ། །མཆོད་རྟེན་ལྷ་ཁང་རྟེན་བཞེང་དང་། །མཆོད་དང་སྦྱིན་གཏོང་རབ་གནས་ཞུགས། །མཁར་ལས་ཞིང་ཉོ་བང་མཛོད་བཅའ། །མདུན་གྲོས་བཀྲ་ཤིས་གསོན་དགེའི་ལས། །རྫིང་ཡུར་ཁྲོན་འདྲུ་ས་བོན་གདབ། །སྦྲ་ཕྱར་འཚེམ་དང་བ་དན་འཛུགས། །བྲན་གཡོག་བསྟེན་དང་གཉེན་སྦྱོར་ལས། །མེ་ཏོག་ཤིང་འཛུགས་རྟ་གླང་འདུལ། །ཚོང་བྱ་ཁྱིམ་བཟང་ལྟད་མོ་བཟང་། །ནོར་རྙེད་པ་དང་དཔལ་དང་ལྡན། །སྐལ་པ་བཟང་ཞིང་སྙན་པ་ཆེ། །མཆོད་དང་རིམ་གྲོ་བྱེད་པ་རྙེད། །ཀཱ་ཤཱའི་དུས་སྦྱོར་བསྒྲུབ་པར་བྱ། །གཟས་བཟུང་ཆོས་སྤྱོད་རྫི་བོ་ཉམས། །སྐྱེས་པ་ཞག་པོ་ཉི་ཤུའམ། །ཟླ་བ་ཉི་ཤུར་མ་ཤི་ན། །དགུ་བཅུ་འཚོ་ཞིང་དགུན་ར་འམ། །མིག་དམར་བད་མཁྲིས་དགོང་མོ་འཆི། མིག་རྩ་དམར་ལ་ལེ་ལོ་ཆེ། །མཁས་ཤིང་འཁོར་མང་སྙན་གྲགས་ལྡན། །ནད་ཀྱིས་བཏབ་ན་མྱུར་དུ་གྲོལ། །བཙོན་ཚུད་བྲོས་པས་ཐར་མི་སྲིད། ༣ འཁྲིག་པའི་ཁྱིམ་དང་ཏཏྐཱལ་ལ། །དབང་སྐུར་རབ་གནས་ཆོས་སྤྱོད་དང་། །ལྷ་གསོལ་སྨན་སྦྱོར་ལྷ་ཁང་བརྩིག ། རྟེན་བཞེང་རྒྱལ་མཚན་བ་དན་འཛུགས། །བག་མ་དྲ་གྱོན་རྒྱན་སྤྲོས་བཟོ། །རྫིང་ཡུར་ཁྲོན་འདྲུ་སྐྲ་སེན་འབྲེག ། ཚོང་དང་སྐྱེ་ཤིང་མེ་ཏོག་འཛུགས། །ལྟད་མོ་གཏར་བསྲེག་སློབ་སོགས་དང་། །མིང་འདོགས་སྒྱུ་རྩལ་རྒྱས་ལས་བཟང་། །དབང་དྲག་ཞི་བའི་ལས་སྤྱི་དང་། །རབ་བྱུང་སྒྲུབ་ཅིང་མཁར་ལས་སྤང་། །བསམ་པ་གྲགས་སྙན་གྲོགས་ཀྱང་རྙེད། །རྟག་ཏུ་ཇི་ལྟ་བར་ཡང་བྱེད། །མ་བསམ་པ་ཡང་རྙེད་པ་འབྱུང་། །ཀ་ཊི་དྷྭི་ཤ་འདི་ལ་བཟང་། །གཟས་བཟུང་རྩིས་མཁན་ཆུང་མ་ཉམས། །འདི་ལ་སྐྱེས་པར་གྱུར་པ་ན། །ཞག་ལྔ་ཟླ་བ་ཉེར་ལྔ་ལ། །མ་ཤི་དགུ་བཅུ་རྩ་ལྔ་འཚོ། །རྒྱལ་ཟླའམ་ནབས་སོ་ལྷག་པ་ལ། །བཅུ་དྲུག་སྔ་དྲོ་མཚོན་གྱིས་འཆི། །འབྱོར་ལྡན་འཇམ་ཞིང་ཆང་དད་ཆེ། །བདེན་སྨྲ་གཞན་གྱི་ཚིག་ལ་མཁས། །ལྟད་མོ་ལ་དགའ་ཆགས་པ་ཆེ། །འདི་ལ་ནད་བཏབ་འཚོ་བར་སླ། །བཙོན་ཚུད་བྲོས་པས་ཐར་མི་སྲིད། །ནོར་གྱིས་བསླུས་ན་ལྷུངས་པ་སྲིད། ༤ ཀཱརྚའི་ཁྱིམ་དང་ཏངྐཱལ་ཤར། །གྲུབ་བྱ་ཐར་འདོན་སྲི་མནན་བྱ། །རྫིང་ཁྲོན་ཆུ་བསྒྱུར་རྒྱས་པའི་ལས། །ཆར་དབབ་གྲུ་གཟིངས་ཟམ་པ་འཛུགས། །དམག་འདྲེན་གཡོ་བའི་ལས་སོགས་བཟང་། །རབ་གནས་མཁས་ལས་དྲ་གྱོན་བཟོ། །བཀྲ་ཤིས་མདུན་གྲོས་གསོན་དགེའི་ལས། །བྲན་བསྟེན་སྐྲ་འཁྲུ་སྐྲ་སེན་འབྲེག ། ལྷ་གསོལ་རྟེན་བཞེངས་ས་བོན་བཏབ། །བང་མཛོད་བཅའ་དང་རྒྱལ་མཚན་འཛུགས། །རྟ་གླང་འདུལ་བ་རྟ་རྒྱུག་པ། །སྨན་སྦྱར་དབང་ཞིའི་ལས་རྣམས་ངན། །ངེས་པར་ནོར་དང་རྙེད་པ་ཉམས། །རེག་པ་ཙམ་གྱིས་འཇིག་པར་བྱེད། །ཉོན་མོངས་རྩོད་དང་འཇིགས་པ་ཆེ། །སྦལ་པའི་དུས་སྦྱོར་སྤང་བར་བྱ། །གཟས་བཟུང་མུ་གེའི་འཇིགས་པ་འབྱུང་། །འདི་ལ་བཙས་པའི་མི་དེ་ནི། །ལོ་ཟླ་ཞག་ལྔ་བདུན་བཅུ་དྲུག ། སུམ་ཅུར་མ་ཤི་བརྒྱད་ཅུ་འཚོ། །རྟ་ཟླའི་དཀར་ཕྱོགས་བཅུ་བཞི་དང་། །མཆུ་དང་རེས་གཟའ་པ་སངས་ལ། །ཉི་རྒས་དུས་སུ་དམུ་ཆུས་འཆི། །བློ་ལྡན་ཤེས་རབ་གྲགས་སྟོབས་ལྡན། །བཟོད་སེམས་འགྲོ་དགའ་ཆོས་ལ་དཀར། །ནད་ཀྱིས་བཏབ་ན་ཡུན་ནས་འཚོ། །བཙོན་དུ་ཆུད་ན་མྱུར་དུ་ཐར། ། ༦ སེང་གེའི་ཁྱིམ་དང་ཏངྐཱལ་འབྲས། །རབ་བྱུང་ལྷ་ཁང་མཆོད་རྟེན་བཞེངས། །ལྷ་གསོལ་སྦྱིན་སྲེག་ཞི་དབང་ལས། །བཟློག་རིགས་མོ་རྩིས་སྲི་མནན་བྱ། །རྒྱན་སྤྲོས་བག་མ་རྒྱལ་སར་འཇུག ། མཁར་ལས་ཐབ་བཅའ་སྦྲ་ཕྱར་འཚེམ། །གོས་གྱོན་བཟོ་དང་སྐྲ་སེན་འབྲེག ། གསོན་དགེ་བཀྲ་ཤིས་མདུན་གྲོས་བྱ། །བསྙེན་བཀུར་དབང་བསྐུར་བརྩོན་འགྲུས་དྲག ། གཞན་ལ་བསྟུན་པ་ལྟད་མོ་དང་། །རྟ་གླང་འདུལ་བ་རྟ་རྒྱུག་པ། །དམག་འདྲེན་འཁོར་བསྟེན་བ་དན་འཛུགས། །ཚོང་འདུམས་ཆུ་རགས་སྐྱོར་བ་བཟང་། །གདོན་རྣམས་ཉམས་ཤིང་བདེ་བར་འགྲོ། །བྱ་བ་ཀུན་ལ་འཇིགས་པ་མེད། །རྒྱལ་པོས་མཆོད་ཅིང་བུད་མེད་ཐོབ། །སི་དྷའི་དུས་སྦྱོར་བསྒྲུབ་པར་བྱ། །ལུག་གི་འབྲས་བུ་རྣམས་ཀྱང་འབྱུང་། །གཟས་བཟུང་རི་བྲག་པ་ལ་ངན། །འདི་ལ་བཙས་པར་གྱུར་པ་ན། །བཅུ་གསུམ་ལོ་ཟླའི་ཞག་གྲགས་ལ། །མ་ཤི་བདུན་ཅུ་རྩ་དགུ་འཚོ། །མེ་བཞི་ས་སྐྱེས་བཅུ་དགུའི་ཚེས། །ནག་ཕྱོགས་ཉི་ཕྱེད་གཏིབས་འོག་འཆི། །སྟོབས་ལྡན་གཟུགས་བཟང་ང་རྒྱལ་ཆེ། །ལྷ་མཆོད་བླ་མ་ལ་དགའ་ཞིང་། །ནད་མང་ཚོང་ལ་དགའ་བ་ཡིན། །བཙོན་ཚུད་ནོར་གྱིས་བསླུ་དགོས་ཡོང་། །ནད་ཀྱིས་བཏབ་ན་མྱུར་དུ་གྲོལ། ། ༦ བུ་མོའི་ཁྱིམ་དང་ཏཧྐལ་ལ། །ལྷ་ཁང་སྐུ་གསུང་ཐུགས་རྟེན་བཞེངས། །བག་མ་རྒྱན་སྤྲོས་དྲ་གྱོན་བཟོ། །སྐྲ་འཁྲུ་སྨན་སྦྱོར་གཏར་སྲེག་མཁར། །བསྡུམས་ལམ་མོ་རྩིས་སྐྲ་སེན་འབྲེག ། བཀྲ་ཤིས་གསོན་དགེ་མདུན་གྲོས་བྱེད། །ཆུ་རགས་སྐྱོར་ཚོང་ཞི་རྒྱས་ལས། །བརྟན་གཡོ་རྒྱལ་པོའི་ལས་རྣམས་བཟང་། །རབ་བྱུང་དམག་འདྲེན་དྲག་ལས་སྤང་། །བུ་མོ་རྙེད་ཅིང་དགེ་བའི་གཟུགས། །བསམ་པ་ཇི་བཞིན་འགྲུབ་པར་འགྱུར། །སྐལ་བཟང་ནོར་རྣམས་ཕུན་སུམ་ཚོགས། །ཏཱ་ཊ་གྲུ་ཡི་དུས་སྦྱོར་བསྒྲུབ། །གཟས་བཟུང་སེམས་ཅན་ཀུན་ལ་འཚེ། །སྐྱེས་ཞག་ཉེར་དགུ་ཟླ་ཕྱེད་བཅུ། །ལོ་ནི་ཉེར་དགུ་མ་ཤི་ན། །དྲུག་ཅུ་འཚོ་ཞིང་ས་ག་ཡི། །ཚེས་ལྔ་ནག་པ་སྤེན་པའི་རེས། །འགོ་བའི་ནད་ཀྱིས་མཚན་མོ་འཆི། །མཁས་ནོར་དབང་ཆེ་སྐྱེ་བོ་མཐུན། །བུ་མང་མེ་ཏོག་དྲི་ལ་དགའ། །བཙོན་དུ་ཚུད་ན་ནོར་གྱིས་བསླུ། ། ༧ སྲང་ཁྱིམ་ཏཏྐཱལ་ཤར་བ་ན། །སོ་ནམ་ཚོང་དང་ས་ཁ་དབྱེ། །གྲུབ་བྱ་བརྟན་ལས་སྲང་ལ་གཞལ། །མོ་རྩིས་ཆུ་རགས་དབང་ལས་བཟང་། །རབ་གནས་རྟེན་བཞེང་བག་མ་བཟོ། །བཀྲ་ཤིས་མདུན་གྲོས་གསོན་དགེ་བྱེད། །སྐྲ་འཁྲུ་ཁྲུས་བྱེད་སྐྲ་སེན་འབྲེག ། མཁས་ལས་སྐྱེ་ཤིང་མེ་ཏོག་འཛུགས། །ཆར་དབབ་རྒྱལ་མཚན་མིང་འདོགས་པ། །བྲན་གཡོག་བསྟེན་པ་ལ་སོགས་པའི། །ཞི་རྒྱས་ལས་རྣམས་ཕལ་ཆེར་ངན། །བསམ་པ་ལ་ནི་བར་ཆད་འབྱུང་། །མཛའ་བའི་གནས་སུ་སྡུག་བསྔལ་བྱེད། །དཀའ་བའི་རྙེད་པ་གཞན་རྙེད་དེ། །ཀཱ་ཀཱ་ཙཉྩའི་དུས་སྦྱོར་སྤང་། །གཟས་བཟུང་འབྲོག་བོད་རྣམས་ལ་ངན། །འདི་ལ་སྐྱེས་པར་གྱུར་པ་ནི། །ཞག་ནི་ལྔ་དགུ་ཟླ་ལྔ་དགུ། །ལོ་ནི་ཉི་ཤུར་མ་ཤི་ན། །བརྒྱད་ཅུ་དཔྱིད་ཟླ་དབྱར་ར་དང་། །ནག་པའི་ཚེས་བརྒྱད་མོན་གྲུ་དང་། །མིག་དམར་འདུས་ནང་མཚན་མོ་འཆི། །སྟོབས་ལྡན་ང་རྒྱལ་ཚིག་རྩུབ་སྨྲ། །ཁོང་ཁྲོ་གཙང་སྦྲ་སོ་ནད་འབྱུང་། །འདི་ལ་ནད་བཏབ་འཆི་བའི་ཉེན། །བཙོན་ཚུད་མྱུར་དུ་འཆི་བ་ཡིན། ། ༨ སྡིག་པའི་ཁྱིམ་དང་ཏཏྐཱལ་ལ། །རབ་གནས་དབང་བསྐུར་འབད་རྩོལ་དང་། །བཟློག་རིམ་སྲི་མནན་དགུག་པའི་ལས། །རྒྱལ་པོ་བསྙེན་བཀུར་བརྟན་ལས་ཚོང་། །དྲག་ལས་མཚོན་ཆ་ཁྲག་ལས་བཟང་། །ལྷ་ཁང་རྟེན་བཞེང་རྒྱལ་སར་འཇུག ། ཆར་དབབ་གོས་དྲ་མཁར་ལས་བག ། མདུན་གྲོས་བཀྲ་ཤིས་གསོན་དགེའི་ལས། །སྨན་སྦྱར་གཏར་སྲེག་སྐྲ་སེན་འབྲེག ། སྦྲ་ཕྱར་འཚེམ་དང་བང་མཛོད་བཅའ། །དམག་འདྲེན་སོ་ནམ་ས་བོན་གདབ། །རྒྱལ་མཚན་བ་དན་འཕྱར་འཛུགས་དང་། །ལྷ་གསོལ་མིང་འདོགས་བསྡུམ་བྱེད་པ། །ཞི་རྒྱས་དབང་གི་ལས་རྣམས་ངན། །ལམ་དུ་བགྲོད་པའི་བསམ་པ་ལ། །འཇིགས་པ་དྲག་པོ་ཆེན་པོ་འབྱུང་། །ནོར་རྣམས་ཉམས་ཤིང་ཡིད་སྐྱོ་བས། །ཊུ་ནའི་དུས་སྦྱོར་སྤང་བར་བྱ། །གཟས་བཟུང་གྲགས་པ་ཅན་ལ་ངན། །སྐྱེས་པ་ཞག་བཅུ་ཟླ་བ་བཅུ། །ལོ་བཅུར་མ་ཤི་ལྔ་བཅུ་འཚོ། །དབྱར་འབྲིང་བཅུ་གཅིག་བཅུ་གཉིས་དང་། །སྣྲོན་དང་གྲོ་བཞིན་མིག་དམར་རེས། །སྐྲངས་འབུར་ནད་ཀྱིས་སྔ་དྲོ་འཆི། །མཐོན་པོས་བཀུར་སྟི་སྡིག་ལ་དགའ། །ཁོང་གྱོང་འཁྲུག་པའི་ལས་ལ་བརྩོན། །དབུལ་ཞིང་བུ་མོ་མང་བ་སྐྱེ། །ནད་བཏབ་རིམ་གྱིས་འཚོ་བར་འགྱུར། །བཙོན་ཚུད་ཐར་པ་མེད་པ་ཡིན། ། ༩ གཞུ་ཡི་ཁྱིམ་དང་ཏཏྐཱལ་ལ། །ལྷ་ཁང་རྟེན་བཞེང་སྲི་མནན་ལམ། །བག་མ་རྒྱན་སྤྲོས་རྒྱལ་སར་འཇུག ། གོས་གྱོན་སྨན་སྦྱོར་འཁོར་གཡོག་བསྟེན། །མོ་རྩིས་བཟློག་རིམ་སྦྲ་ཕྱར་འཚེམ། །མཁར་ལས་རྫིང་ཁྲོན་ས་ཁ་དབྱེ། །གསོ་བའི་ལས་དང་ཡོངས་སུ་བཟུང་། །ནད་གསོ་རྟ་ཕྱུགས་འདུལ་སྦྱོང་དང་། །གསོན་དགེ་མདུན་གྲོས་དགེ་ལེགས་བྱེད། །ལྟད་མོ་རྒྱལ་མཚན་དམག་འདྲེན་མིང་། །རྐུ་ཇག་སྐྲད་ལས་ལ་སོགས་པ། །ཞི་རྒྱས་དྲག་པོའི་ལས་རྣམས་བཟང་། །ངེས་པར་འགྲོ་དང་འོང་བ་དང་། །དཔའ་ཞིང་བསམ་གྲུབ་དགྲ་ཉམས་བྱེད། །རྩོད་པ་ལས་ནི་རྒྱལ་བར་འགྱུར། །དྷ་ནུའི་དུས་སྦྱོར་བསྒྲུབ་པར་བྱ། །ཆུ་རགས་སྐྱོར་བ་ལྷ་གསོལ་བ། །རབ་བྱུང་རགས་རྩིས་ངན་པ་ཡིན། །གཟས་བཟུང་འབྲུ་དང་བོན་པོ་ཉམས། །སྐྱེས་པ་ལོ་ཟླ་ཞག་གི་གྲངས། །བཅོ་བརྒྱད་མ་ཤི་བདུན་ཅུ་འཚོ། །དབྱར་འབྲིང་ངམ་ནི་དགུན་ར་ཡི། །ཚེས་ལྔ་ཁྲུམས་དང་པ་སངས་རེས། །རིམས་དང་མཚོན་གྱིས་དགོང་མོ་འཆི། །ཁྲིམས་ལྡན་བདེན་སྨྲ་ལོངས་སྤྱོད་ཆེ། །བཙོན་དུ་ཚུད་ན་ཐར་བ་དཀའ། །ནད་ཀྱིས་བཏབ་ན་འཚོ་བ་སླ། ། ༡༠ ཆུ་སྲིན་ཁྱིམ་དང་ཏཏྐཱལ་འབྲས། །རབ་བྱུང་ཞིང་ལས་ས་བོན་གདབ། །རྫིང་ཡུར་ཁྲོན་འདྲུ་བྲན་གཡོག་བསྟེན། །ཆུ་ལས་རྒྱུ་འགྲུལ་བཅིངས་པ་འགྲོལ། །བྲན་མོར་གཞག་དང་རྐང་བཞིའི་ལས། །ལམ་ཞུགས་དོན་གཉེར་བརྟེན་པ་བཙལ། །སྐྲ་འཁྲུ་སྲི་མནན་རྐུ་ཇག་དང་། །མེ་ཏོག་ཤིང་འཛུགས་བསད་ལས་བཟང་། །རབ་གནས་ལྷ་ཁང་རྟེན་བཞེང་བཟོ། །དགེ་ལེགས་གསོན་དགེ་མདུན་གྲོས་བྱེད། །སྦྱིན་སྲེག་བག་མ་རྒྱལ་སར་འཛུག ། སྨན་སྦྱོར་གཏར་སྲེག་སྐྲ་སེན་འབྲེག ། ལྷ་གསོལ་མཁར་ལས་སྦྲ་ཕྱར་འཚེམ། །ཞི་རྒྱས་དབང་གི་ལས་ཕལ་ཆེར། །འདུམ་དང་བ་དན་འཛུགས་པ་ངན། །འཐབ་དང་རྩོད་པ་འབྱུང་བ་སོགས། །སྙིང་པོ་ཉོན་མོངས་ཆེན་པོ་འབྱུང་། །གཟའ་ཡི་གནོད་པ་ལ་སོགས་ཏེ། །མོ་ནའི་དུས་སྦྱོར་སྤང་བར་བྱ། །གཟས་བཟུང་ཆུ་ནང་སེམས་ཅན་འཚེ། །འདི་ལ་སྐྱེས་པ་བཅོ་བརྒྱད་ཀྱི། །ལོ་ཟླ་ཞག་ལ་མ་ཤི་ན། །བརྒྱད་ཅུ་རྩ་བདུན་བར་དུ་འཚོ། །གྲོ་བཞིན་ཟླ་བའི་བཅོ་ལྔ་ལ། །སྐར་མ་མོན་གྲུ་སྤེན་པའི་རེས། །ཉི་ཕྱེད་གོང་དུ་སྐྲན་གྱིས་འཆི། །དཔའ་ཞིང་ཆོས་ལྡན་ལྟ་ན་སྡུག ། དྲི་སྤོས་གླུ་གར་རྩེ་ལ་དགའ། །ཉམས་ཚོ་གཟི་བརྗིད་ཆགས་པ་ཆེ། །རྒྱལ་བས་མཆོད་ཅིང་བུ་མང་སྐྱེ། །ནད་ཀྱིས་བཏབ་ན་ཡུན་ནས་འཚོ། །བཙོན་ཚུད་ཉེས་པ་ཡོད་ཉེན་ཆེ། ༡༡ བུམ་པའི་ཁྱིམ་དང་ཏཏྐཱལ་ཤར། །རབ་བྱུང་མཆོད་རྟེན་རྟེན་བཞེང་ཁྲུས། །སྐུ་འཁྲུ་མཁར་ལས་ཁྱིམ་གསར་འཛིན། །རྫིང་ཡུར་ཁྲོན་འདྲུ་ས་ཁ་དབྱེ། །ཡི་གེ་རྩིས་དང་རིག་པ་བསླབ། །བཀྲ་ཤིས་གསོན་དགེ་མདུན་གྲོས་བྱེད། །ཞི་རྒྱས་བརྟན་པའི་ལས་ཕལ་ཆེར། །ཐབ་བཅའ་བ་དང་བང་མཛོད་བརྩིག ། གྲུ་བཟོ་ཆུ་སྦྱིན་གདབ་པ་དང་། །མེ་ཏོག་ཤིང་འཛུགས་སྦྲ་ཕྱར་འཚེམ། །རྐུ་ཇག་མིང་འདོགས་ལ་སོགས་བཟང་། །དཔལ་དང་རྒྱལ་སྲིད་ཐོབ་པ་དང་། །ཕྱིས་ནས་ནོར་རྣམས་འོང་བར་འགྱུར། །དགོས་འདོད་ཐམས་ཅད་ཕུན་སུམ་ཚོགས། །གྷཊའི་དུས་སྦྱོར་བསྒྲུབ་པར་བྱ། །གཏར་ཁ་མེ་བཙའ་དྲག་པོའི་ལས། །དམག་འདྲེན་རྟ་རྒྱུག་ཆུ་རགས་སྤང་། །གཟས་བཟུང་གྲོང་དང་རྐུན་མར་ངན། །འདི་ལ་སྐྱེས་པར་བྱུང་བ་སྟེ། །བཅོ་བརྒྱད་ལོ་ཟླར་མ་ཤི་ན། །དབྱར་འབྲིང་བཅུ་གཉིས་ཆུ་སྟོད་དང་། །རེས་གཟའ་ཉི་མ་ཉི་ཤར་དུས། །རང་འཁྲུགས་ནད་ཀྱིས་འཆི་བ་ཡིན། །བློ་ལྡན་མཁས་ཤིང་སྙན་པ་ཆེ། །འཁོར་མང་ལོངས་སྤྱོད་མི་རབ་དགུ། །ང་རྒྱལ་ཆེ་ཞིང་གཞན་ཕན་བྱེད། །ནད་ཀྱིས་བཏབ་ན་མྱུར་དུ་གྲོལ། །འདི་ལ་བཙོན་ཚུད་མྱུར་དུ་ཐར། ། ༡༢ ཉ་ཡི་ཁྱིམ་དང་ཏཏྐཱལ་ལ། །ཆོས་དང་རབ་བྱུང་སློབ་གཉེར་བྱེད། །རྒྱན་སྤྲོས་བག་མ་རྒྱལ་སར་འཇུག ། གོས་དྲ་བཟོ་དང་སྐྲ་སེན་འབྲེག ། མཁར་ལས་ཐབ་བཅའ་བང་མཛོད་འབྱེད། །སྨན་སྦྱར་གཏར་སྲེག་མོ་རྩིས་བྱ། །སྐྲ་འཁྲུ་ཁྲུས་བྱེད་ས་ཁ་དབྱེ། །སོན་ནམ་ཕྱུགས་ལས་ས་བོན་གདབ། །རྒྱུ་འགྲུལ་བཟའ་བར་རིག་པ་རྩོམ། །ལམ་ཞུགས་དོན་གཉེར་སྦྲ་ཕྱར་འཚེམ། །བསྡུམས་དང་སྐྱེ་ཤིང་མེ་ཏོག་འཛུགས། །ལྟད་མོ་མིང་འདོགས་ལ་སོགས་པའི། །ཞི་བ་སྐྲད་པའི་ལས་རྣམས་བཟང་། །དགོས་པའི་གནས་ལ་སྙན་པ་ཐོབ། །ལས་རྣམས་ཀུན་ལས་རྣམ་པར་རྒྱལ། །ཤིན་ཏུ་དགའ་བའི་དོན་རྣམས་རྙེད། །དྲྀ་ཏིའི་དུས་སྦྱོར་བསྒྲུབ་པར་བྱ། །མཆོད་རྟེན་ལྷ་ཁང་རྟེན་བཞེང་དང་། །རྒྱལ་པོ་དྲག་པོའི་ལས་སྤྱི་དང་། །དམག་འདྲེན་ཆུ་རགས་སྦྱིན་སྲེག་སྤང་། །གཟས་བཟུང་བོང་ར་རི་དྭགས་ཉམས། །སྐྱེས་ཞག་བཅོ་བརྒྱད་ལོ་བཅུ་གཉིས། །དེ་ལ་མ་ཤི་གོ་ལྔ་འཚོ། །ཁྲུམས་དབྱུག་ཟླ་བའི་དཀར་ཕྱོགས་ཀྱི། །བཅུ་གཉིས་བྲེ་དང་ཕུར་བུའི་རེས། །རླུང་ནད་ཉི་མ་ཕྱེད་ཡོལ་འཆི། །ནོར་ལྡན་སེར་སྣ་ཆེ་བ་དང་། །ཉ་ཤ་འཁྲིག་པ་དག་ལ་དགའ། །ནད་བཏབ་མྱུར་དུ་གྲོལ་བར་འགྱུར། །བཙོན་དུ་ཚུད་ན་ནོར་གྱིས་བསླུ། །

{{#arraymap:དུས་སྦྱོར་གྱི་འབྲས་བཤད་བཅུ་གཉིས་

|; |@@@ | | }}