30913

དོན་དམ་པའི་སྒྲ་དོན་ (1)

Part of speech	མིང་ཚིག
Definition	མདོ། དབུ་མ། དོན་དམ་པ་ལ་པ་ར་མ་ཨརྠ་སྟེ། པ་ར་མ་ནི་མཆོག་གམ་དམ་པ། ཨརྠ་ནི་དོན་ཏེ་དམ་པ་རྣམས་ཀྱིས་བརྟགས་ན་སྐྱོན་མེད་པའི་དོན་ཡིན་པས་ན་དོན་དམ་པ་ཞེས་བསྒྱུར། དེས་བདེན་པ་གཉིས་ཀྱི་མཚན་ཉིད་དང་སྒྲ་དོན་མཐུན་པ་ཡིན་ནོ། །ཞེས་ཆོས་རྗེ་ས་པཎ་གྱིས་ཐུབ་པའི་དགོངས་གསལ་ལས་གསུངས་སོ། ། དོན་དམ་གྱི་སྒྲ་དོན་ནི། དོན་དང་དམ་པ་དང་བདེན་པ་གསུམ་གཞི་མཐུན་གྱི་བསྡུ་བར་འདོད་པས་སྟོང་པ་ཉིད་ལ་དོན་དང་དམ་པ་དང་བདེན་པ་གསུམ་ཀ་ལ་བཤད་དོ། །འདིར་སྟོང་ཉིད་བདེན་པ་བཤད་པ་ཡང་ཐ་སྙད་པའི་བློས་བསྙད་ཚུལ་ལ་ལྟོས་ནས་གཞག་པ་ཡིན་གྱི་ཡང་དག་པར་མ་ཡིན་ནོ། །ཡང་ན་བདེན་པའི་སྒྲ་དོན་གཉིས་ལ་འཇུག་སྟེ། མི་སླུ་བ་ལ་བདེན་པའི་སྒྲ་བརྗོད་པ་དང་། གནས་ཚུལ་ལ་གྲུབ་པ་ལ་བདེན་པའི་སྒྲ་བརྗོད་པའོ། །སྟོང་ཉིད་ལ་བདེན་པའི་སྒྲ་བརྗོད་པ་ནི་དང་པོའི་དབང་དུ་བྱས་པས་དགག་བྱ་མིན་ལ། དགག་བྱ་གཟུང་བ་ནི་ཕྱི་མིའི་དབང་དུ་བྱས་སོ། །ཞེས་ཀུན་མཁྱེན་རོང་སྟོན་གྱིས་རིགས་ཚོགས་ཀྱི་དཀའ་གནད་ལས་གསུངས་སོ། ། དོན་དམ་པའི་སྒྲ་དོན་ནི། པ་ར་མ་ཨརྠ་སཏྱ་ཞེས་པའི་པ་ར་མ་ནི་དམ་པ། ཨརྠ་ནི་དོན། སཏྱ་ནི་བདེན་པ་སྟེ། འཕགས་པའི་ཡེ་ཤེས་དམ་པའི་སྤྱོད་ཡུལ་དུ་གྱུར་པའི་ཆོས་ཉིད་ནི་རྟོགས་པར་བྱ་བའམ་བརྟག་པར་བྱ་བ་ཡིན་པས་ན་དོན་འདི་ལས་མཆོག་ཏུ་གྱུར་པ་གཞན་མེད་པས་ན་དམ་པ་མི་སླུ་བས་བདེན་པ་ཞེས་གཞི་མཐུན་གྱི་བསྡུ་པའོ། །ཐལ་འགྱུར་བས་ནི་འདི་ལས་གཞན་དོན་དམ་ཡུལ་ཅན་ལ་བྱས་ནས་དེའི་ངོར་བདེན་པ་ཞེས་པའི་སྒྲ་བཤད་མི་མཛད་ལ། རང་རྒྱུད་པས་ནི་གཉིས་ཀ་མཛད་པར་སྣང་སྟེ། རྟོག་གེ་འབར་བ་ལས་དོན་ཞེས་བྱ་བ་ནི་ཤེས་པར་བྱ་བ་ཡིན་པའི་ཕྱིར་དོན་ཏེ། བརྟག་པར་བྱ་བ་དང་། གོ་བར་བྱ་བ་ཞེས་བྱ་བའི་ཐ་ཚིག་གོ ། དམ་པ་ཞེས་པ་ནི་མཆོག་ཅེས་བྱ་བའི་ཚིག་གི་སྒྲ་ཡིན་ཏེ། དོན་དམ་པ་ཞེས་བསྡུ་བ་ནི་དེ་དོན་ཡང་ཡིན་ལ་དམ་པ་ཡང་ཡིན་པས་དོན་དམ་པའོ། །ཡང་ན་དམ་པའི་དོན་ཏེ་རྣམ་པར་མི་རྟོག་པའི་ཡེ་ཤེས་དམ་པའི་དོན་ཡིན་པས་དམ་པའི་དོན་ཏོ། །ཡང་ན་དོན་དམ་པ་དང་མཐུན་པ་སྟེ། དོན་དམ་རྟོགས་པ་དང་རྗེས་སུ་མཐུན་པའི་ཤེས་རབ་ལ་དོན་དམ་པ་དེ་ཡོད་པས་དོན་དམ་པ་དང་མཐུན་པའོ། །ཞེས་གསུངས་སོ། །ཞེས་ཀུན་མཁྱེན་གོ་རམས་པས་དབུ་མ་སྤྱི་དོན་ལས་གསུངས་སོ། །
Domain	ཆོས་ལུགས།