31807

དྲིའུ་ལུང་རྫོང་རྩེ་དགོན་ (1)

Part of speech

མིང་ཚིག

Definition

སྟག་ལུང་པའི་གདན་རབས་ཉེར་ལྔ་པ་ཀུན་གཟིགས་བསྟན་འཛིན་རྣམ་རྒྱལ་གྱིས་ཕྱི་ལོ་ ༡༧༢༠ ཡས་མས་སུ་ཕྱག་བཏབ་པའི་སྟག་ལུང་པའི་བུ་དགོན་ཞིག་ཡིན། སྟག་ལུང་པའི་རྩ་བའི་གདན་ས་ཡར་ཐང་རྡོ་རྗེ་གདན དགོན་པ་ནས་སྤྱི་ལི་བཅོ་ལྔ་ཙམ་གྱི་སར་ཆགས་ཡོད། རྗེ་བསྟན་འཛིན་རྣམ་རྒྱལ་གྱིས་གནས་འདིར་ལོ་བཅུ་གསུམ་ཙམ་སྒྲུབ་པ་མཛད་ཅིང་། དག་སྣང་རྩ་གསུམ་ཆོས་འཁོར་ཡང་འདི་ནས་ཕབ། སྔོན་དུས་གྲྭ་གྲངས་རྒྱའི་ཡས་མས་སུ་ཡོད་པ་དང་དྲིའུ་ལུང་སྤྲེལ་ལོ་ཚེ་བཅུ་ཞེས་པའི་ལོ་བཅུ་གཉིས་ཀྱི་མཚམས་ནས་གོས་སྐུ་གཤམ་པ་དང་། དབང་ཆོས་གནང་བ་སོགས་ཆོས་ཀྱི་བྱེད་སྒོའི་དུས་ཆེན་ཞིག་རྒྱུན་ཆགས་སུ་གནང་སྲོལ་ཡོད་འདུག ཆོས་དྲུང་སྐུ་ཕྲེང་རིམ་བྱོན་ཕལ་ཆེ་བ་གནས་འདིར་སྒྲུབ་པ་མཛད་པ་དང་བུ་སློབ་སྐྱོང་བ་སོགས་གནང་བ་དང་། སྐུ་ཕྲེང་བཞི་པ་ཆོས་དྲུང་ཤེས་རབ་སྒྲོན་མེ་ནས་བཟུང་སྐུ་ཕྲེང་རིམ་བྱོན་ལ་ཆོས་དྲུང་ཞེས་པའི་མཚན་འདི་ཐོག། །སྐུ་ཕྲེང་ལྔ་པ་བསྟན་འཛིན་ཆོས་ཀྱི་སྒྲོན་མེ་ལ། སྟག་ལུང་པའི་གདན་རབ་སུམ་ཅུ་པ་ཐེག་མཆོག་འཇིགས་མེད་དཔའ་བ་ཡིས། དྲིའུ་ལུང་དགོན་གྱི་ཆོས་སྲིད་ཀྱི་གཉེར་ཀ་གཏད་པ་ནས་བཟུང་ཆོས་དྲུང་རིམ་བྱོན་ནས་དགོན་བདག་མཛད་བཞིན་ཡོད། ཆོས་དྲུང་སྐུ་ཕྲེང་བཞི་པ་དང་ལྔ་པ་གཉིས་རྟེན་བུད་མེད་ཡིན་པས། ཆོས་ཀྱི་སྒྲོན་མེ་སྐུ་གཤེགས་སྐབས་ང་བུད་མེད་རྟེན་ཅན་ཞིག་རབ་བྱུང་དབུས་སུ་མི་མཛེས་པས་རྗེས་སུ་སྐྱེ་པ་ཕོ་ལུས་ཞིག་ཏུ་འོང་པ་ཡིན་གསུངས་པ་བཞིན་བྱུང་ཡོད་པ་རེད། རིག་གནས་གསར་རྗེའི་དུས་འགྱུར་སྐབས་དགོན་འདི་རྩ་གཏོར་ཐེབས་ཀྱང་། ཕྱི་ལོ་ ༡༩༩༠ ཙམ་ནས་དེ་སྔོན་དྲིའུ་ལུང་གྲྭ་པ་ཡིན་པའི་ཆོས་མཛད་རྫབ་རྡོ་ཞུ་བས་ངལ་བ་དང་ལྷག་བསམ་གྱིས་བསྐྱར་བཞེངས་འགོ་འཛུགས་བྱས་ཤིང་། སྟག་ལུང་གདན་རབས་སོ་གསུམ་པ་རྩེ་སྤྲུལ་བསྟན་རྒྱལ་མཚན་མཆོག་གིས་སྔོན་ནི་ཆོས་དྲུང་མཆོག་སྤྲུལ་རིན་པོ་ཆེ་བཙལ་འཚོལ་གྱིས་ངོས་འཛིན་གནང་ཁར། ཁོང་གི་ཟིམ་ཆུང་དུ་ཡོངས་འཛིན་ཆེད་བཙུགས་ཀྱིས་སློབ་གཉེར་བྱེད་བཅུག་ཅིང་། དགུང་ན་སོན་སྐབས་ཆོས་དང་ཟང་ཟིང་གིས་གནང་སྦྱིན་བཀའ་སློབ་དང་བཅས་དྲིའུ་ལུང་དུ་གདན་ས་སྐྱོང་བར་བཏང་པས་ཚུལ་བཞིན་བྱུང་སྟེ། དགོན་སྡེ་སྔར་ལས་ལེགས་པར་བསྐྲུན་ཡོད་པ་མ་ཟད། རྩེ་སྤྲུལ་རིན་པོ་ཆེ་སྐུ་གཤེགས་རྗེས་སྟག་ལུང་མ་དགོན་དང་དྲིའུ་ལུང་གཉིས་ཀར་གཟིགས་སྐྱོང་མཛད་དེ། མཛད་འཕྲིན་རྒྱས་པའི་ངང་བཞུགས་མུས་སུ་ཡོད་ཅིང་། ད་ཡོད་གྲྭ་གྲངས་ལྔ་བཅུ་ཙམ་གྱིས་དཔལ་སྟག་ལུང་པའི་མཐོང་བ་བརྒྱུད་པའི་ཕྱག་ལེན་རྒྱུན་འཛིན་དང་སྒོམ་སྒྲུབ་འཆད་ཉན་གྱིས་སྒོ་ནས་འཁོར་ལོ་གསུམ་གྱི་བྱ་བ་སྒྲུབ་པའི་གནས། ངེས་པ་དོན་གྱི་ཆོས་སྡེ་ཞིག་ཆགས་ཡོད་པ་བཅས་སོ། །

{{#arraymap:དྲིའུ་ལུང་རྫོང་རྩེ་དགོན་

|; |@@@ | | }}