37624

ཕྱག་ཆེན་རིག་འཛིན་ (1)

Part of speech	མིང་ཚིག
Definition	སྔགས། མ་ཧཱ་ཡོ་ག རྙིང་མ། གསང་སྔགས་ཀྱི་ལམ་ལ་བརྟེན་ནས་འཐོབ་པའི་འབྲས་བུ་རིག་འཛིན་རྣམ་བཞིའི་ནང་གསེས་ལས་གསུམ་པ་གནས་སྐབས་ཀྱི་འབྲས་བུ་སྟེ། ཕྱོགས་བཅུའི་མུན་སེལ་ལས། གསུམ་པ་ནི། རང་གི་ལུས་གང་བསྒོམ་པའི་ཆ་བྱད་དུ་གནས་གྱུར་པ་སྟེ། ཞུས་ལན་ལས། རང་ལུས་རྒྱལ་བའི་ཕྱག་རྒྱ་ཆེ། །བསྒོམས་པས་མངོན་དུ་གྱུར་པའི་ལྷ། །མཚན་དང་དཔེ་བྱད་མངོན་ཤེས་ལྡན། །ཕྱག་རྒྱ་ཆེན་པོའི་རིག་འཛིན་གྲགས། །ཞེས་སོ། །འོ་ན་སངས་རྒྱས་དངོས་སུ་འགྱུར་མོད་སྙམ་ན། ད་དུང་སྒྲིབ་པ་མཐའ་དག་མ་བྲལ་བས་བསྒྲུབ་དགོས་ཏེ། འདི་ལྟར་མངོན་རྟོགས་རྒྱན་ལས། སངས་རྒྱས་ཉིད་ནི་ཐོབ་པ་དང་། །ཞེས་ས་དང་པོར་སངས་རྒྱས་ཐོབ་པར་བཤད་ཀྱང་། ས་ལྷག་མའི་དྲི་མ་སྦྱོང་དགོས་པར་གསུངས་པ་བཞིན་དུ་འདིར་ཡང་ཤེས་པར་བྱ་སྟེ། རྡོ་རྗེ་ལས། བྱང་ཆུབ་ཕྱག་རྒྱའི་ཆ་ལུགས་སྐུ། །མཚན་དང་དཔེ་བྱད་ལ་སོགས་པས། །ཆ་ལུགས་མངོན་དུ་བྱུང་ན་ཡང་། །ཞི་བ་དེ་ཉིད་མཐོང་བ་མིན། །ཞེས་སོ། །ཞེས་དང་། ཡིད་ཀྱི་མུན་སེལ་ལས། བར་ཆད་མེད་པའི་སྐབས་སུ་རྣམ་སྨིན་རིག་འཛིན་ཐོབ་པའོ། །རྟེན་དེ་ལ་ཚེ་དབང་མ་ཐོབ་པར་ཤི་ན་ལུས་རྒྱ་དང་བྲལ་མ་ཐག་སེམས་ལྷའི་སྐུ་ཕྱག་རྒྱ་ཆེན་པོའི་རིག་འཛིན་ལ་སྦྱར་ནས་ལྷུན་གྲུབ་ཐོབ་སྟེ། ཚེ་དབང་བོར་ནས་ཤི་བའོ། །རྒྱུ་མཚན་ལུས་དོར་བས་ཚེ་དབང་མ་ཐོབ་པའོ། །མ་ཤི་ན་ཆོས་མཆོག་ཆེན་པོའི་ཡེ་ཤེས་མཐར་ཐུག་ལས་མཐོང་ལམ་དངོས་སུ་སྐྱེ་བས། སྐྱེ་ཤི་མེད་པ་རྡོ་རྗེའི་སྐུར་གྱུར་པའི་ཕྱིར་ཚེ་ལ་དབང་བའི་རིག་འཛིན་ཞེས་བྱའོ། །དེ་ནས་མཐོང་ཟིན་གོམས་པར་བྱེད་པའི་ལམ་ས་བཅུ་ནི་ཕྱག་རྒྱ་ཆེན་པོའི་རིག་འཛིན་ཏེ། ཆོས་ཉིད་ཟག་པ་མེད་པའི་དོན་གོམས་ཤིང་། ས་གོང་མའི་ཡོན་ཏན་རྫོགས་པར་གོང་ནས་གོང་དུ་གྱུར་པའི་ཕྱིར་རོ། །དེ་ནས་ལྷུན་གྱིས་གྲུབ་པའི་རིག་འཛིན་སངས་རྒྱས་ཀྱི་ས་ལ་སྦྱོར་བ་ཡིན་ནོ། །ཞེས་དང་། ཕྱག་རྒྱ་ཡང་འཕགས་པའི་བདེན་མཐོང་ས་དང་པོའི་སྐད་ཅིག་ནས་བཅུ་པའི་བར་ཡིན་ཏེ། འཕགས་པའི་ཡེ་ཤེས་དེ་ཉིད་ལ་མདོ་རྒྱུད་ཐམས་ཅད་ནས་ཕྱག་རྒྱ་ཆེན་པོའི་དངོས་གྲུབ་ཏུ་གསུངས་པའི་ཕྱིར་རོ། །སེམས་མཚན་མ་མེད་པར་ཕྱག་རྒྱ་ཆེན་པོའི་རིག་འཛིན་པ་སྟེ། ས་དང་པོ་སྐད་ཅིག་གཉིས་པ་ནས། བཅུ་པའི་བར་ཏེ་སྒོམ་ལམ་ཟག་མེད་ལ་གནས་ཤིང་། ས་གཉིས་པ་ནས་བརྒྱད་པ་ལ་ཐུག་གི་བར་འཇོག་པ་དེ་ཁོ་ནར་ཡང་མི་འཐད་དོ། །ཞེས་དང་། གསུམ་པ་ཕྱག་རྒྱའི་རིག་འཛིན་ནི། ལུས་དཀྱིལ་འཁོར་གྱི་གཙོ་བོ་ཞི་ཁྲོ་ལོངས་སྤྱོད་རྫོགས་པའི་སྐུ་རིགས་ལྔའི་ཆ་ལུགས་སུ་སྣང་བྱེད་ཆུའི་ཟླ་བ་ལྟ་བུར་གནས་ཏེ་རིམ་པ་ལྟར། མཉམ་པ་ཉིད་ལས་མི་གཡོ་ཞིང་། །ཟག་པ་མེད་པ་བསྒོམ་པའི་ལམ། །ཞེས་པ་དང་། རང་སེམས་ཕྱག་རྒྱ་ཆེན་པོ་སྟེ། །བསྒོམ་པས་གང་ཡིན་མངོན་གྱུར་སྐུ། །ཐུན་མོང་མཆོག་གི་མཚན་དཔེར་ལྡན། །ལོངས་སྤྱོད་གཉིས་པ་ཕྱག་རྒྱའི་རིགས། །རྡོ་རྗེ་འཁོར་ལོ་རིན་ཆེན་དང་། །པདྨ་རལ་གྲིའི་རིག་འཛིན་འགྱུར། །ཞེས་སོ། །དེའང་གང་བསྒོམ་པའི་རིགས་སུ་སྣང་བ་དང་། ཐུན་མོང་གི་མཚན་དཔེ་དང་། མཆོག་གི་མཚན་དཔེ་འཁོར་གྱི་རྣམ་པས་བསྐོར་བར་སྣང་བ་དང་། ལོངས་སྐུ་ལ་གཉིས་ལས་ལམ་སྣང་གི་ལོངས་སྐུ་ཐོབ་པས་ཕྱག་རྒྱ་ཆེན་པོའི་རིགས་ཡིན་ནོ། །ཞེས་གསུངས།
Domain	ཆོས་ལུགས།

{{#arraymap:ཕྱག་ཆེན་རིག་འཛིན་

|; |@@@ | | }}