38759

ཕྲ་རྒྱས་ལྡན་ཚུལ་ (1)

Part of speech	མིང་ཚིག
Definition	མདོ། མངོན་པ། འདས་པ་དང་ཉེ་བར་གནས་པ་ད་ལྟར་བྱུང་བའི་འདོད་ཆགས་དང་ཁོང་ཁྲོ་དང་ང་རྒྱལ་སྐྱེས་ལ་མ་སྤངས་པ་དག་གིས་ནི་རྣམ་ཤེས་གང་གི་འཁོར་དུ་བྱུང་ཡང་རུང་སྟེ། ཡུལ་སྤང་བྱ་རིས་ལྔ་པོ་དུས་གསུམ་པའི་དངོས་པོ་གང་ལ་དམིགས་ནས་ཉོན་མོངས་པ་དེ་དག་སྐྱེས་ལ་མ་སྤངས་པའི་ཡུལ་གྱི་དངོས་པོ་དེ་དང་ཐག་པས་གླང་བུ་ཕུར་པ་ལ་བཏགས་པ་ལྟར་གང་ཟག་དེ་ལྡན་པ་ཡིན་ནོ། །དེ་ཡང་སྒོ་ལྔའི་རྣམ་ཤེས་ཀྱི་འཁོར་དུ་ནི་ཆགས་སྡང་གཉིས་འབྱུང་གི་ང་རྒྱལ་ནི་ཡིད་ཤེས་ཁོ་ནའི་འཁོར་དུ་འབྱུང་ངོ་། །སྐྱེས་ཞེས་བྱ་བ་ནི་ཉོན་མོངས་པ་དེ་དག་རང་གི་མཚན་ཉིད་པ་ཡིན་པས་འགའ་ཞིག་ལ་མི་སྐྱེ་བ་སྲིད་པའི་ཕྱིར་རོ། །མ་སྤངས་པ་ཞེས་བྱ་བ་ནི་སྐྱེས་ཀྱང་སྤངས་ན་མི་ལྡན་པའི་ཕྱིར་རོ། །དེས་ན་དེ་དག་བཅད་པའི་ཕྱིར་ཚིག་གཉིས་པོ་དེ་སྨྲོས་སོ། །ལྡན་པ་ཞེས་བྱ་བའང་ཡུལ་དེ་དག་ལ་དམིགས་པའི་ཚུལ་གྱིས་གང་ཟག་ལ་ལྡན་པ་ཡིན་གྱི་ཡུལ་གྱི་ལྡན་པ་མ་ཡིན་ཏེ་རྒྱུད་དུ་མ་གཏོགས་པ་ལ་ལྡན་པ་མེད་པའི་ཕྱིར་རོ། །དེ་ལྟར་འདས་པ་དང་ད་ལྟར་བྱུང་བའི་འདོད་ཆགས་ལ་སོགས་པ་ལ་ནི་ཁྱད་པར་མེད་པས་སྤྱིར་བཤད་ལ། མ་འོངས་པ་ལ་དབྱེ་བ་ཡོད་པས་དེ་བཤད་པའི་ཕྱིར་ཡིད་ཀྱི་རྣམ་ཤེས་ཀྱི་འཁོར་དུ་བྱུང་བའི་འདོད་ཆགས་ལ་སོགས་པ་གསུམ་པོ་དེ་དག་ནི་མ་འོངས་པས་འདས་པ་དང་མ་འོངས་པ་དང་ད་ལྟར་བྱུང་བའི་ཡུལ་ཀུན་དང་དམིགས་པའི་ཚུལ་གྱིས་ལྡན་ཏེ། ཡིད་ཀྱི་ཡུལ་དུ་དུས་གསུམ་པའི་ཆོས་འགྲོ་བའི་ཕྱིར་རོ། །དེ་ཡང་གང་ལ་མ་སྤངས་པ་དེ་དག་ཅེས་བྱ་བ་ཡིན་ནོ། །ཡིད་ལས་གཞན་པ་སྒོ་ལྔའི་རྣམ་ཤེས་ཀྱི་འཁོར་དུ་བྱུང་བའི་འདོད་ཆགས་དང་ཁོང་ཁྲོ་མ་འོངས་པ་དག་གིས་ནི་ཡུལ་རང་གི་དུས་པ་མ་འོངས་པའི་དངོས་པོ་ཁོ་ན་དང་ལྡན་ཏེ། རྣམ་ཤེས་དེ་དག་འདས་པ་ལ་མི་དམིགས་པའི་ཕྱིར་རོ། །སྐྱེ་བའི་ཆོས་ཅན་རྣམས་ཀྱི་དེ་ལྟ་བུ་ཡིན་གྱི་མི་སྐྱེ་བའི་ཆོས་ཅན་རྣམས་ཀྱིས་ནི་སྒོ་ལྔའི་རྣམ་ཤེས་ཀྱི་འཁོར་དུ་བྱུང་བའི་འདོད་ཆགས་དང་ཁོང་ཁྲོ་གཉིས་ཀྱིས་ཀྱང་དུས་གསུམ་པའི་དངོས་པོ་ཐམས་ཅད་དང་དམིགས་པའི་ཚུལ་གྱིས་ལྡན་ནོ། །རང་གི་མཚན་ཉིད་པ་དེ་དག་གི་ལྷག་མ་ལྟ་བ་དང་ཐེ་ཚོམ་དང་མ་རིག་པ་སྟེ་དེ་དག་འདས་པ་ལ་སོགས་པ་དུས་གསུམ་པོ་ཀུན་གྱིས་ཀྱང་ཡུལ་དུས་གསུམ་གྱི་དངོས་པོ་རིས་ལྔ་པོ་ཀུན་དང་ལྡན་ཏེ། དེ་དག་ནི་ཉེར་ལེན་གྱི་ཕུང་པོ་ལྔ་ཆར་ལ་དམིགས་པས་སྤྱིའི་མཚན་ཉིད་ལ་དམིགས་པའི་ཕྱིར་རོ། །དེ་ཡང་ཇི་སྲིད་དུ་མ་སྤངས་ཀྱི་བར་དུའོ། །ཞེས་མཛོད་འགྲེལ་མངོན་པའི་རྒྱན་ལས་སོ། །
Domain	ཆོས་ལུགས།