39735

བཀྲུ་བཤལ་བ་ལ་གོས་འཁྲུར་འཛུད་པའི་ལྟུང་བྱེད་ (1)

Part of speech	མིང་ཚིག
Definition	མདོ། འདུལ་བ། གླེང་གཞི་ནི་ལུང་རྣམ་འབྱེད་ལས་སྦོམ་དགའ་མོས་མི་གཙང་བས་གོས་པར་གྱུར་པའི་གོས་རྣམས་བཙོ་བླག་མཁན་ལ་འཁྲུར་འཇུག་པ་དང་། ཁྱིམ་པ་རྣམས་བདག་ཅག་གི་གོས་ཀྱང་འདིས་མི་གཙང་བར་འགྱུར་རོ་ཞེས་ཁ་ཟེར་བར་བྱེད་པ་ལས་སོ། །ཊཱི་ཀ་ལས་ལུང་དྲངས་པ་ལས་ནི། དགེ་སློང་མ་བཅུ་གཉིས་སྡེ་དག་རྨི་ལམ་ན་གནོད་པ་མཐོང་བས་གོས་དག་ལ་གོས་པར་གྱུར་ནས་བཀྲུ་བཤལ་བ་ལ་འཁྲུར་འཇུག་པ་དང་། བཀྲུ་བཤལ་བ་དག་གིས་བླངས་ཏེ། ཁྱིམ་པའི་གོས་དག་དང་ལྷན་ཅིག་བཀྲུས་པ་ན་དེ་དག་གིས་འབགས་པས་ཁྱིམ་པའི་གོས་དཀར་པོ་དག་མི་གཙང་བས་མ་རུང་བར་གྱུར་པ་དང་། ཁྱིམ་པ་དག་འཕྱ་ཞིང་རབ་ཏུ་བྱུང་བ་དག་ནི་ཉེ་བར་མ་ཞི་བའོ་ཞེས་ཟེར་བ་ལས་སོ་ཞེས་བཅུ་གཉིས་སྡེ་ལས་བཅས་པར་གསུངས་ཏེ། དེ་དག་གི་ཁོངས་སུ་སྦོམ་དགའ་མོ་འདུས་པས་འགལ་བ་མེད་དོ། །དགག་བྱ་ནི་མ་དད་པ་སྐྱེ་བའོ། །དགེ་སློང་མས་བཀྲུ་བཤལ་བ་ལ་རང་གི་གོས་འཁྲུར་འཇུག་པ་ལ་ལྟུང་བྱེད་དུ་འགྱུར་ཏེ། ཊཱི་ཀ་ལས་བྱིན་གྱིས་བརླབས་པ་རང་གི་གོས་རྙིང་པ་འཁྲུ་བར་འོས་པ་ཆོས་གོས་དང་གདིང་བ་བཀྲུ་བཤལ་བ་ལ་འཁྲུར་འཇུག་པ་ལ་ཁ་ན་མ་ཐོ་བ་འདིར་འགྱུར་རོ། །ཞེས་ཀུན་མཁྱེན་མཚོ་སྣ་བའི་མདོ་རྩའི་རྣམ་བཤད་ཉི་མའི་འོད་ཟེར་ལས་སོ། ། རང་གི་ཆོས་གོས་དང་འདིང་བ་རྙིང་པ་བཀྲུ་བར་འོས་པ་བཀྲུ་བཤལ་པ་ལ་འཁྲུར་འཛུད་པ་ནི། བཀྲུ་བཤལ་པ་ལ་གོས་འཁྲུར་འཛུད་པའི་ལྟུང་བྱེད་དོ། །ཞེས་པཎ་ཆེན་ངག་ཆོས་ཀྱི་འདུལ་བའི་སྤྱི་དོན་ཐུབ་བསྟན་ཉིན་བྱེད་ལས་གསུངས་སོ། །
Domain	ཆོས་ལུགས།