39798

བག་ཆགས་བསྒོ་གཞི་ (1)

Part of speech	མིང་ཚིག
Definition	སེམས་ཙམ་པ། བསྒོ་བའི་གཞི་ནི། ཐེག་བསྡུས་ལས། བརྟན་ལུང་མ་བསྟན་བསྒོ་བྱ་བ། །སྒོ་བར་བྱེད་དང་འབྲེལ་པ་ལ། །སྒོ་བྱེད་དེ་ལས་གཞན་དུ་མིན། །འདི་ནི་བག་ཆགས་མཚན་ཉིད་དོ། །ཞེས་བསྒོ་བའི་གཞི་ཁྱད་ཆོས་བཞི་ལྡན་དུ་གསུངས་ལ། དོན་གསང་ལས་དེའི་སྟེང་དུ། གཙོ་བོའམ་རྟེན་དུ་གྱུར་པ་སྟེ་ཁྱད་ཆོས་ལྔ་ལྡན་དུ་བཤད་དོ། །དེ་ལ་བག་ཆགས་བསྒོ་བར་བྱ་བའི་གཞི་ལ་བརྟན་པ་ཞིག་དགོས་སྟེ། བག་ཆགས་བསྒོས་པའི་དགོས་པ་ནི་དུས་ཕྱིས་རང་གི་འབྲས་བུ་སྐྱེད་པར་བྱེད་པ་ཡིན་ལ། གཞི་དེ་རླུང་བཞིན་དུ་གཡོ་བ་དང་། སྒྲ་བཞིན་དུ་རྒྱུན་མེད་པ་ཡིན་ན། བསྒོས་པ་ཆུད་ཟོས་པའི་ཉེས་པར་འགྱུར་བའི་ཕྱིར་རོ། །དཔེར་ན་མེ་ཏོག་དྲི་ཞིམ་པོའི་དྲི་སྒོ་བ་ན་ཏིལ་ལྟ་བུ་རྒྱུན་བརྟན་པ་ཞིག་ལ་སྒོ་ཡི། རླུང་ལ་མི་སྒོ་བ་བཞིན་ནོ། །འདིས་ཚོགས་བདུན་དང་། གཟུགས་བསྒོ་གཞི་ཡིན་པ་བསལ་ཏེ། ཚོགས་དྲུག་ནི་གནས་སྐབས་ལྔར་རྒྱུན་ཆད་པའི་ཕྱིར་དང་། ཉོན་ཡིད་ནི་འགོག་སྙོམས་དང་། འདས་ལམ་མངོན་དུ་གྱུར་པ་ན་རྒྱུན་མེད་པའི་ཕྱིར་དང་། གཟུགས་ནི་གཟུགས་མེད་ཁམས་ན་རྒྱུན་མེད་པའི་ཕྱིར། བསྒོ་བའི་གཞི་དེ་མཐའ་གཅིག་ཏུ་ལུང་དུ་མ་བསྟན་པ་དགོས་སྟེ། དཔེར་ན་མེ་ཏོག་གི་དྲི་སྒོ་བ་ན་ཏིལ་ལྟ་བུ་དྲི་མཉམ་པ་ཁོ་ན་བསྒོ་བར་བྱ་བའི་གཞིར་འཐད་ཀྱི་སྒོག་སྐྱ་དང་གླ་རྩི་ལྟ་བུ་ཤིན་ཏུ་གསལ་བ་ལ་མི་འཆགས་པ་ལྟར་འཇུག་ཤེས་དྲུག་པོ་དགེ་མི་དགེར་འགྱུར་བས་དེ་ལ་མི་བསྒོ་ཡི་ཀུན་གཞི་མཐའ་གཅིག་ཏུ་ལུང་དུ་མ་བསྟན་པ་ཡིན་པས་དེ་ལ་བསྒོའོ། །བསྒོ་བར་བྱ་བའམ། སྒོ་བར་ནུས་པ་ཞིག་དགོས་ཏེ་མཁྲེགས་པ་རྡོ་བ་ལ་སོགས་པ་ལ་དྲི་མི་བསྒོ་བ་ལྟར་མི་རྟག་པ་ལ་སྒོ་ཡི། རྟག་པ་ནམ་མཁའ་ལྟ་བུ་སོགས་ལ་མ་ཡིན་པའི་ཕྱིར་ཏེ། སྔར་བག་ཆགས་བསྒོ་བར་བྱ་བའི་གཞི་དེ་འབྲས་བུ་དེ་དང་དེ་སྐྱེད་པའི་ནུས་པ་དང་མི་ལྡན་པའམ་ནུས་པ་མཐུ་ཆུང་ངུར་འདུག་པ་ལ་ཕྱིས་ནུས་པ་དང་ལྡན་པའམ་ནུས་པ་མཐུ་ཅན་དུ་གྱུར་པ་དགོས་པའི་ཕྱིར་རོ། །ཡང་སྒོ་བྱེད་རྒྱུད་གཅིག་ལ་དུས་མཉམ་དུ་འབྲེལ་པ་དགོས་ཏེ། རྒྱུད་གཞན་ལ་སྒོ་ན་གང་ཟག་གང་ཞིག་གིས་མི་དགེ་བའི་ལས་མ་སྤྱད་ཀྱང་གཞན་གྱི་མི་དགེ་བ་བསྒོས་པས་ངན་སོང་དུ་སྐྱེ་བར་ཐལ་བའི་ཕྱིར་དང་། རྒྱུད་གཅིག་ལ་ཡང་དུས་ཐ་དད་པ་ནི་གང་རུང་གཅིག་དངོས་པོར་ཡོད་པའི་ཚེ་གཅིག་ཤོས་དངོས་པོར་མེད་པས་བསྒོ་བྱ་སྒོ་བྱེད་དུ་མི་རུང་བའི་ཕྱིར། དོན་གསང་ལས། བསྒོ་བར་བྱ་བའི་གཞི་ལ་གཙོ་བོའམ་རྟེན་དུ་རུང་བ་ཞིག་དགོས་ཀྱི། འཁོར་རམ་བརྟེན་པ་ནི་ས་བོན་བསྒོ་བར་བྱ་བའི་གཞིར་མི་འཐད་པས་ཀུན་གཞི་གཙོ་བོ་དང་རྟེན་ཡིན་པས་བསྒོ་བའི་གཞིར་འཐད་ཀྱི་དེའི་འཁོར་གྱི་རེག་པ་ལ་སོགས་པ་ནི་དེ་ལྟར་མ་ཡིན་པས་བསྒོ་གཞིར་མི་འཐད་དོ། །ཞེས་ཀྱང་བཤད་དོ་ཞེས་ཀུན་མཁྱེན་གོ་རམས་པའི་ཇི་སྙེད་ཤེས་བྱའི་སྒོ་འབྱེད་ལས་སོ། །
Domain	ཆོས་ལུགས།