40710

བདག་སྐྱེ་འགོག་པའི་ཟླ་གྲགས་ཀྱི་རིགས་པ་ (1)

Part of speech	མིང་ཚིག
Definition	མདོ། དབུ་མ། ཟླ་བས་འཐད་པར་སྦྱར་བའི་ཚུལ་ལ་གཉིས་ལས། དང་པོ་སྐྱེ་བ་དོན་མེད་པར་ནི། རྒྱུའི་བདག་ཉིད་དུ་ཡོད་པའི་འབྲས་བུ་དེ་སྐྱེ་བ་དོན་མེད་པར་འགྱུར་ཏེ། རང་གི་བདག་ཉིད་དུ་ཡོད་པའི་ཕྱིར། མངོན་གསལ་གྱི་བུམ་པ་བཞིན་ནོ། །གཉིས་པ་རིགས་པ་དང་འགལ་བ་ལ་བཞི་ལས། དང་པོ་མ་གྲགས་པའི་དོན་ཐོབ་པ་ནི། འབྲས་བུ་མྱུ་གུ་སྔོན་པོར་བདག་ཉིད་ལས་བདག་ཉིད་དུ་འབྱུང་བ་ལྟར་རྒྱུ་ས་བོན་སྐྱ་བོའང་བདག་ཉིད་ལས་བདག་ཉིད་དུ་སྐྱེ་བར་འགྱུར་ཏེ། རྒྱུ་མཚན་མཚུངས་པའི་ཕྱིར་རོ། །དེ་ལྟར་ན་རྟག་ཏུ་ས་བོན་གྱི་ངོ་བོར་སྐྱེ་བར་འགྱུར་བས་མ་གྲགས་པའི་དོན་ཐོབ་པའོ། །གཉིས་པ་གྲགས་པའི་དོན་མི་རུང་བ་ནི། རྒྱུ་མཚན་དེ་ཉིད་ཀྱིས་ས་བོན་སྐྱ་བོའི་གནས་སྐབས་འགག་པར་མི་འཐད་པས་མྱུ་གུ་སྔོན་པོའི་གནས་སྐབས་འབྱུང་བར་མི་འཐད་དེ། འབྲས་བུ་འབྱུང་བ་ལ་རྒྱུ་འགགས་པ་སྔོན་དུ་འགྲོ་དགོས་པའི་ཕྱིར་རོ། །གལ་ཏེ་རྐྱེན་ཆུ་ལུད་ལ་སོགས་པས་ཕན་བཏགས་པའི་སྒོ་ནས་ས་བོན་གྱིས་མྱུ་གུ་བསྐྱེད་པར་བྱེད་ལ་མྱུ་གུས་དེ་ཉིད་ཀྱི་ཚེ་ས་བོན་འགག་པར་བྱེད་པས་སྐྱོན་གང་ཡང་མེད་དོ་ཞེ་ན་མ་ཡིན་ཏེ། དེ་གཉིས་བདག་ཉིད་གཅིག་ཡིན་པས་རང་ལ་རང་གི་བྱ་བ་འགལ་བའི་ཕྱིར་རོ། །གསུམ་པ་རྒྱུ་འབྲས་ངོ་བོ་འཆོལ་བར་འགྱུར་བ་ནི། ས་བོན་གྱི་ཆོས་ལྔ་མྱུ་གུ་ལ་དམིགས་ཤིང་མྱུ་གུའི་ཆོས་ལྔ་ས་བོན་ལ་དམིགས་པར་འགྱུར་ཏེ། དེ་གཉིས་བདག་ཉིད་གཅིག་ཡིན་པའི་ཕྱིར། འདོད་མི་ནུས་ཏེ། ས་བོན་གྱི་དབྱིབས་ཟླུམ་པོ་དང་ཁ་དོག་སྐྱ་བོ་དང་། རོ་མངར་བ་དང་། ནུས་པ་མྱུ་གུ་བསྐྱེད་པ་དང་། སྨིན་པ་ཁ་བར་འགྱུར་བར་དམིགས་ཤིང་། མྱུ་གུ་ནི་དབྱིབས་རིང་པོ་དང་། ཁ་དོག་སྔོན་པོ་དང། རོ་ཁ་བ་དང་། ནུས་པ་གྲིབ་མ་བསྐྱེད་པ་དང་། སྨིན་པ་མངར་བར་འགྱུར་བར་དམིགས་པའི་ཕྱིར་རོ། །བཞི་པ་རྒྱུ་འབྲས་རྟོགས་པ་མཚུངས་པར་འགྱུར་པ་ནི། མྱུ་གུ་དམིགས་པའི་ཚེ་མྱུ་གུ་ལྟར་དེ་དང་བདག་ཉིད་གཅིག་པའི་ས་བོན་ཡང་དམིགས་པར་འགྱུར་ཞིང་། ཡང་ན་ས་བོན་མི་དམིགས་པ་ལྟར་དེ་དང་བདག་ཉིད་གཅིག་པའི་མྱུ་གུ་ཉིད་ཀྱང་མི་དམིགས་པར་འགྱུར་རོ། །དེ་བཞིན་དུ་ས་བོན་དམིགས་པའི་ཚེ་ས་བོན་ལྟར་དེ་དང་བདག་ཉིད་གཅིག་པའི་མྱུ་གུའང་དམིགས་པར་འགྱུར་ཞིང་། ཡང་ན་མྱུ་གུ་མི་དམིགས་པ་ལྟར་དེ་དང་བདག་ཉིད་གཅིག་པའི་ས་བོན་ཉིད་ཀྱང་མི་དམིགས་པར་འགྱུར་ཏེ། དེ་དང་བདག་ཉིད་གཅིག་ཡིན་པའི་ཕྱིར་རོ། །ཞེས་ཀུན་མཁྱེན་གོ་རམས་པས་དབུ་མའི་སྤྱི་དོན་ལས་གསུངས་སོ། །
Domain	ཆོས་ལུགས།