40711

བདག་སྐྱེ་འགོག་པའི་རང་རྒྱུད་ཀྱི་རྟགས་དོན་མེད་པ་ (1)

Part of speech	མིང་ཚིག
Definition	མདོ། དབུ་མ། (རང་རྒྱུད་པ)་ཁྱོད་ཀྱིས་སངས་རྒྱས་བསྐྱངས་ཀྱི་ངག་ལ་གཏན་ཚིགས་དང་དཔེ་མ་བརྗོད་པའི་ཕྱིར་ཞེས་བརྗོད་པ་འདི་རང་རྒྱུད་ཀྱི་གཏན་ཚིགས་དང་དཔེ་མ་བརྗོད་པའི་ཕྱིར་ཞེས་པའི་དོན་ཡིན་ནམ། གཞན་ལ་གྲགས་ཀྱི་དབང་དུ་བྱས་ནས་བརྗོད། དང་པོ་ལྟར་ན་དེ་མ་བརྗོད་པའི་ཕྱིར་ན་མི་རིགས་ཞེས་པ་ནི་འགལ་ཏེ་གྲངས་ཅན་ལ་ཁྱོད་ཀྱི་དངོས་པོ་བདག་ལས་སྐྱེ་བར་འདོད་པའི་འབྲས་བུ་ཡོད་པ་ཉིད་རྒྱུ་དང་། དེ་ཉིད་སླར་ཡང་སྐྱེ་བོ་ཞེས་འདོད་པས་ཁས་བླངས་འགལ་ཏེ། རྒྱུའི་བདག་ཉིད་ཡོད་པའི་མངོན་པར་མི་གསལ་བའི་བུམ་པ་སོགས་ཀྱི་དངོས་པོ་ཆོས་ཅན། སྐྱེ་བ་དོན་མེད་པ་དང་། ཐུག་པ་མེད་པར་ཐལ། རང་གི་ངོ་བོ་ཡོད་པ་ཉིད་སྐྱེ་བའི་ཕྱིར། ཡང་དེ་ཆོས་ཅན། བདག་ལས་སྐྱེ་བ་མེད་པར་ཐལ། སྐྱེ་བ་དོན་ཡོད་པ་དང་སྐྱེ་བ་ཐུག་པ་དང་བཅས་པ་ཡིན་པའི་ཕྱིར། ཞེས་ཁས་བླངས་འགལ་བ་བརྗོད་པའི་ཐལ་འགྱུར་གྱིས་བདག་ལས་སྐྱེ་བ་འདོད་པའི་ལོག་རྟོག་ཟློག་ནུས་ཤིང་། དེ་བཟློག་པས་རང་བཞིན་གྱི་སྐྱེ་བ་ཡོད་པར་འཛིན་པའང་བཟློག་པས་སྐབས་འདིར་རང་རྒྱུད་ཀྱི་གཏན་ཚིགས་དང་དཔེ་མ་བརྗོད་པ་ཉིད་རིགས་པས་གྲུབ་པའི་ཕྱིར་རོ། །འོ་ན་སངས་རྒྱས་བསྐྱངས་ཀྱི་ངག་དེས་ཁས་བླངས་འགལ་བ་བརྗོད་མོད། གྲངས་ཅན་པས་ཅི་ལྟར་ཁས་བླངས་སྙམ་ན། འབྲས་བུ་ཡོད་པ་རྒྱུ་ཉིད་དང་། དེ་ཉིད་སྐྱེ་འོ་ཞེས་པ་ནི་བདག་སྐྱེའི་དོན་ཡིན་པས་ཐལ་བ་དང་པོའི་གཏན་ཚིགས། གཉིས་པའི་བསལ་བ་སྨྲས་པ་ཡིན་ནོ། །ཡོད་པ་སྐྱེ་ན་དོན་མེད་དང་ཐུག་མེད་དུ་མི་འགྱུར་རམ་ཞེས་པའི་ལན་དུ་མི་གསལ་བ་གསལ་བར་འབྱུང་བས་དོན་དང་བཅས་ཤིང་། གསལ་བའང་གསལ་བར་འབྱུང་བར་མི་འདོད་པས་ཐུག་པ་དང་བཅས་པ་ཡིན་ནོ། །ཞེས་སྨྲས་པས། ཐལ་བ་དང་པོའི་བསལ་བ་དང་། གཉིས་པའི་གཏན་ཚིགས་ཁས་བླངས་སོ། །གསལ་བའང་གསལ་བར་སྐྱེ་ན་སྐྱོན་ཅི་ཡོད་ཅེས་པའི་ལན་དུ་མངོན་པར་གསལ་བར་ཡོད་པའང་གསལ་བར་སྐྱེ་བ་ལ་དགོས་པ་མ་མཐོང་ཞིིང། ཐུག་པ་མེད་པར་ཡང་མཐོང་ངོ་ཞེས་སྨྲས་པས་ཐལ་བ་དང་པོའི་རྣལ་ཁྱབ་དང་། གཉིས་པའི་ལྡོག་ཁྱབ་ཁས་བླངས་པ་ཡིན་ནོ། །ཞེས་ཀུན་མཁྱེན་གོ་རམས་པས་དབུ་མའི་སྤྱི་དོན་ལས་གསུངས་སོ། །
Domain	ཆོས་ལུགས།