42082

བཟློག་འབྲེལ་ (1)

Part of speech	མིང་ཚིག
Definition	འབྲེལ་ཡུལ་ལོག་པས་འབྲེལ་ཆོས་ཉིད། །ལྡོག་པས་བཟློག་འབྲེལ་བློ་ངོར་འགྲུབ། །ཅེས་བྱ་བ། ངོ་བོ་མི་དམིགས་པ་ནི། བསྒྲུབ་པའི་རྟགས་ཀྱིས་འབྲེལ་ཡུལ་བཀག་པས་འབྲེལ་ཆོས་ཁེགས་པ་ཉིད་ཀྱིས་བཟློག་འབྲེལ་ངེས་ཏེ། རྒྱུ་མི་དམིགས་པ་དང་འབྲས་བུ་མི་དམིགས་པ་ནི་དེ་བྱུང་གི་འབྲེལ་བ་བཟློག་པ་ཡིན་ལ། རང་བཞིན་མི་དམིགས་པ་དང་། ཁྱབ་བྱེད་མི་དམིགས་པ་ཕན་ཚུན་སྤངས་འགལ་རྣམས་ནི་བདག་གཅིག་པ་བཟློག་པ་ཡིན་ནོ། །དེས་ན་འབྲེལ་བ་བསྒྲུབ་པ་ལ། མཐུན་དཔེའི་སྟེང་དུ་རྟགས་ལ་བསྒྲུབ་བྱའི་ཆོས་ཀྱིས་ཁྱབ་པ་ཚད་མས་བསྒྲུབས་ནས་མི་མཐུན་ཕྱོགས་ལ་དཔེ་གྲུབ་བམ་མ་གྲུབ་ཀྱང་རུང་སྟེ། གནོད་པ་ཅན་གྱིས་རྒྱུ་དང་ཁྱབ་བྱེད་བཀག་པ་ན་འབྲས་བུ་དང་ཁྱབ་བྱ་ཁེགས་པས་འབྲེལ་བ་བློ་ངོར་འགྲུབ་སྟེ། དེ་ཕྱིར་ཆོས་མི་མཐུན་དཔེ་ལ། །ངེས་པར་འདི་ལ་གཞི་མི་འདོད། །ཅེས་གསུངས་པ་ལྟར་རོ། །འགལ་བ་དམིགས་པ་ནི། འགལ་ཟླ་གྲུབ་ན་ཅིག་ཤོས་ལ་གནོད་པས་ཁེགས་ཀྱི་འབྲེལ་ཟླ་འགོག་པ་ལ་མི་ལྟོས་པས་བཟློག་འབྲེལ་དཔྱད་མི་དགོས་སོ། །ཞེས་འཇམ་མགོན་ས་པཎ་གྱི་རིགས་གཏེར་རང་འགྲེལ་ལས་སོ། །འབྲེལ་ཡུལ་མ་དམིགས་པའི་གཏན་ཚིགས་ལ་དངོས་འབྲེལ་ངེས་བྱེད་ཀྱི་ཚད་མ་མེད་ཀྱང་བཟློག་པ་ལ་འབྲེལ་བ་ངེས་བྱེད་ཀྱི་ཚད་མ་ཡོད་པ་དེ་ཉིད་ཀྱིས་ཆོག་པ་ཡིན་ཏེ། འབྲེལ་ཡུལ་ལོག་པས་འབྲེལ་ཆོས་ཉིད་ལོག་པར་མཐོང་བས་ལྡོག་འབྲེལ་བློ་ངོར་འགྲུབ་པའི་ཕྱིར་རོ། །འགལ་ཟླ་དམིགས་པའི་གཏན་ཚིགས་ཀྱི་ནི། དངོས་འབྲེལ་དང་ལྡོག་འབྲེལ་གཉིས་ཀ་དཔྱད་མི་དགོས་ཏེ། འགལ་ཟླར་གྲུབ་པ་དེ་ཅིག་ཤོས་ལ་གནོད་བྱེད་དུ་མཐོང་བ་ཙམ་གྱིས་དགག་བྱ་ཁེགས་པའི་ཕྱིར། གནོད་བྱེད་དང་གནོད་བྱ་ནུས་མེད་གཉིས་རྒྱུ་འབྲས་སུ་ངེས་བྱེད་ཀྱི་ཚད་མས། ལྷན་ཅིག་མི་གནས་པའི་འགལ་དམིགས་ཀྱི་ཁྱབ་འབྲེལ་ངེས་ནུས་པར་བཤད་པས། ཞིབ་ཏུ་བརྟག་པར་བྱ་དགོས་ཏེ། ཇི་སྐད་དུ། དངོས་འབྲེལ་བཀག་ཟིན་ལྷན་ཅིག་ན། །མི་གནས་ཚོགས་པས་བསྐྱེད་པ་འཁྲུལ། །ཞེས་པའི་ཕྱོགས་སྔ་མ་དང་མ་འདྲེས་པར་འཆད་དགོས་པ་དང་། ལྡོག་འབྲེལ་ཐུར་ཁྱབ་ཏུ་མ་སོང་བའི་ཚུལ་རྣམས་ཤེས་དགོས་པའི་ཕྱིར། འགྲེལ་པར། རྒྱུ་མ་དམིགས་པ་དང་། འབྲས་བུ་མ་དམིགས་པ་གཉིས་ཀྱི་ཟློག་པ་ལ། དེ་བྱུང་འབྲེལ་བ་ཡོད་པར་བཤད་པ་ནི་ཡི་གེ་མ་དག་པ་ཡིན་ཏེ། འབྲས་བུ་མ་དམིགས་པའི་ཟློག་ཕྱོགས་ལ་དེ་འབྱུང་ས་མེད་པའི་ཕྱིར། ཡང་། འགྲེལ་པར་ཕན་ཚུན་སྤངས་འགལ་གྱི་འགལ་དམིགས། འབྲེལ་ཡུལ་མ་དམིགས་པའི་ནང་ཚན་དུ་བཤད་པ་ནི། སློབ་དཔོན་ཆོས་མཆོག་གི་བཞེད་པ་དང་མཐུན་ཞིང་། རང་ལུགས་ཀྱིི་འཇོག་མཚམས་དང་ཡང་འགྲིག་པས་མ་དག་པ་མ་ཡིན་ནོ། །ཞེས་པཎ་ཆེན་ཤཱཀ་མཆོག་གི་སྡེ་བདུན་རོལ་མཚོ་ལས་སོ། །
Domain	ཚད་མ།

{{#arraymap:བཟློག་འབྲེལ་

|; |@@@ | | }}