42224

བར་མ་རབ་བྱུང་གི་ཆོ་ག་ (1)

Part of speech	མིང་ཚིག
Definition	མདོ། འདུལ་བ། རབ་བྱུང་བར་མ་བྱ་བ་ནི། སྔོན་ཕྲུ་གུ་ཡི་གེ་སློབ་མ་ནུས་པ་བྲོས་པ་ཞིག་དགེ་ཚུལ་མེ་ཏོག་ཐུ་བས་ཁྲིད་དེ་མཁན་པོ་ཅན་སོང་སྟེ། གཞན་ལ་མ་ཞུས་པར་རབ་ཏུ་ཕྱུང་བས་ནམ་ཞིག་ན་མས་མཐོང་བས་ངའི་བུ་བརྐུས་སོ་ཟེར་བས་རབ་ཏུ་འབྱུང་བ་དགེ་འདུན་ལ་ཞུ་དགོས་བར་བཅས་སོ། །དེ་ཡང་ཇི་ལྟར་བྱ་ཞེ་ན། གྲོགས་བྱེད་པས་བསྒྲུབ་བྱ་དེ་ལ་གོས་དཀར་པོ་བསྐོན་པ་སོགས་བྱ་སྟེ། གོས་དཀར་པོ་འཛིན་བཞིན་ལ་ཚོགས་དགེ་འདུན་གྱི་ནང་དུ། དགེ་འདུན་བཙུན་པ་རྣམས་དགོངས་སུ་གསོལ་ཞེས་སོགས་ཀྱིས་མཁྱེན་པར་ལན་གསུམ་གསོལ་བར་བྱའོ། །མདོ་རྩ་བ་ལས། དགེ་འདུན་ཐམས་ཅད་འདུས་པའམ་གནས་ཁང་སོ་སོ་ན་འཁོད་པ་ལ་རུང་ཞེས་གསུངས་པས་སོ། །ཞུ་བའི་ཡུལ་དགེ་འདུན་དུ་ལོངས་པ་ཞིག་དགོས་ཞེས་འགའ་ཞིག་འཆད་དེ། མདོ་རྩ་བ་ལས་དགེ་འདུན་ལའོ་ཞེས་པ་དང་། འདིར་ཡང་ཚོགས་ཀྱི་ནང་དུ་ཞེས་གསུངས་པས་སོ་ཞེའོ། །འགྲེལ་ཆུང་ལས་ནི་གང་ཟག་ལ་ཞུ་བར་གསུངས་སོ། །དོན་འདི་ཡིན་ཏེ། ཕུན་སུམ་ཚོགས་པའི་ཡན་ལག་ཏུ་དགེ་འདུན་དགོས་པར་བཤད་ཅིང་། དགོས་པ་འདྲ་བའི་ཕྱིར་གང་ཟག་ལ་ཡང་ཞུའོ་ཞེས་པའི་དོན་ནོ། །ཞུ་བའི་ཚུལ་ནི། མདུན་དུ་འདུག་སྟེ་ལན་གསུམ་བརྗོད་དགོས་སོ། །གསོལ་བ་བྱས་པ་ན་དགེ་འདུན་རྣམས་ཐུགས་རྩེ་གཅིག་པས་གལ་ཏེ་ཡོངས་སུ་དག་ནའོ་ཞེས་རྗེས་སུ་གནང་བའི་ཚེ་བར་མ་རབ་བྱུང་གི་ཆོ་ག་བྱའོ། །གལ་ཏེ་ཀརྨ་ཤ་ཏམ་དུ། དགེ་འདུན་རྣམས་ཀྱིས་ཡོངས་སུ་དག་ནའོ་ཞེས་མ་བརྗོད་ན་འགལ་ཚབ་ཅན་དུ་འགྱུར་རོ་ཞེས་བཤད་པས་གཞན་རྣམས་ཀྱིས་མཁན་པོ་ལ་ཡོངས་སུ་དག་གམ་ཞེས་བརྗོད་དགོས་སོ། །བར་མ་ནི་གསུམ་སྟེ། སྐྱབས་སུ་འགྲོ་བ་དང་། ཁྱིམ་པའི་རྟགས་སྤོང་བ་དང་། རབ་ཏུ་བྱུང་བའི་རྟགས་ལེན་པའོ། །ཞེས་ཀུན་མཁྱེན་རོང་སྟོན་གྱི་འདུལ་ཕྲེང་རྣམ་འགྲེལ་ལས།
Domain	ཆོས་ལུགས།

{{#arraymap:བར་མ་རབ་བྱུང་གི་ཆོ་ག་

|; |@@@ | | }}