42291

བར་སྲིད་སྐྱེ་གནས་སུ་འཇུག་ཚུལ་ (1)

Part of speech	མིང་ཚིག
Definition	མདོ། མངོན་པ། སྐྱེ་གནས་སུ་འཇུག་པ་ནི་སེམས་ཅན་དེ་ཕོར་སྐྱེ་བར་འགྱུར་བ་ཡིན་ན་ནི་ཕ་ལ་སྡང་བ་དང་མ་ལ་འཁྲིགས་པ་བྱ་བར་ཆགས་པའི་བློ་ནི་ཕྱིན་ཅི་ལོག་ཏུ་གྱུར་པས་མ་དེ་དང་བརྩེ་བ་དང་དགའ་བར་བྱ་བར་འདོད་པས་འགྲོ་བར་བྱ་བའི་ཡུལ་དུ་མངོན་པར་འདོད་པའི་མངལ་དུ་འགྲོ་སྟེ། དེར་སོང་ནས་མའི་ལྟོ་གཡས་ཕྱོགས་སུ་ཁ་རྒྱབ་ཏུ་བསྟན་ཏེ་ཙོག་ཙོག་པོར་སྐྱེའོ། །འོན་ཏེ་མོར་སྐྱེ་བ་ཞིག་ཡིན་ན་མ་ལ་སྡང་བ་དང་། འོན་ཏེ་ཕ་ལ་ཆགས་པའི་བློ་ཕྱིན་ཅི་ལོག་ཏུ་གྱུར་པས་ཕ་དང་བརྩེ་བ་དང་དགའ་བར་བྱ་བར་འདོད་པས་འགྲོ་བའི་ཡུལ་མའི་མངལ་དུ་སོང་སྟེ་མའི་ལྟོ་གཡོན་དུ་ཁ་མདུན་ཕྱོགས་སུ་བསྟན་ཏེ་འདུག་གོ ། གལ་ཏེ་མ་ནིང་དུ་སྐྱེ་བ་ཡིན་ནའང་བར་སྲིད་ནི་ཕོ་མོ་གང་རུང་ཞིག་ཏུ་ཡོད་དེ། དབང་པོ་ཀུན་ཚང་བར་འདོད་པའི་ཕྱིར་རོ། །དེའི་ཕྱིར་མངལ་དུ་ཞུགས་པ་ན་ཕྱིས་མ་ནིང་གི་ལུས་འཛིན་ཅིང་ཕོ་མོའི་འདོད་ཆགས་གང་དང་ལྡན་པ་བཞིན་དུ་གནས་པར་འགྱུར་རོ། །དེའི་ཕྱིར་གདགས་པ་ལས། དེའི་ཚེ་དྲི་ཟ་ལ་སེམས་གཉིས་ལས་རྗེས་སུ་ཆགས་པ་དང་ལྡན་པའམ་ཁོང་ཁྲོ་བ་དང་ལྡན་པའི་སེམས་གང་ཡང་རུང་བ་ཞིག་མངོན་དུ་གྱུར་པ་ཡིན་ནོ། །ཞེས་སོ། །དེ་ལྟར་མངལ་དུ་ཞུགས་པ་ན་བར་སྲིད་ཐོགས་མེད་འགགས་ནས་རྣམ་སྨིན་ཐོགས་བཅས་འགྲུབ་པར་འགྱུར་རོ། །དེ་དག་ནི་སྐྱེ་གནས་དང་པོ་གཉིས་སུ་འཇུག་ཚུལ་ལོ། །ཆོས་མངོན་པ་བའི་སློབ་དཔོན་དག་སྐྱེ་གནས་ཕྱི་མ་གཉིས་ལ་ནི་ཅི་རིགས་པར་བརྗོད་པར་བྱའོ་ཞེས་ཟེར་བའི་རིགས་པའི་དོན་སློབ་དཔོན་གྱིས་འཆད་པ་ནི་ལས་ཇི་ལྟ་བ་བཞིན་དུ་དྲི་དང་གནས་ལ་མངོན་པར་འདོད་ཅིང་སྲེད་པས་འཇུག་པ་ནི་སྐྱེ་གནས་གཞན་དྲོད་གཤེར་སྐྱེས་དང་རྫུས་སྐྱེས་གཉིས་སུ་འཇུག་ཚུལ་ལོ། །གལ་ཏེ་དམྱལ་བར་མེ་འབར་བ་དང་གྲང་བའི་རེག་པ་ལ་མངོན་པར་འདོད་པ་ཇི་ལྟར་འབྱུང་ཞེ་ན། བློ་ཕྱིན་ཅི་ལོག་ཏུ་གྱུར་པའི་ཕྱིར་ཏེ་རླུང་དང་ཆར་པ་ལ་སོགས་པས་སྡུག་བསྔལ་བ་དག་མེ་འབར་བར་འདོད་པ་དང་། ཉི་མ་དང་མེ་ལ་སོགས་པས་གདུངས་པ་དག་བསིལ་བར་འདོད་ནས་རྒྱུག་པའི་ཕྱིར་ཚ་བ་དང་གྲང་བའི་དམྱལ་བར་སྐྱེ་བ་ལེན་ནོ། །སྔོན་གྱི་སློབ་དཔོན་ཐོགས་མེད་ལ་སོགས་པ་ཁ་ཅིག་ནི་སྔར་སྲོག་གཅོད་ལ་སོགས་པ་བྱས་པའི་སེམས་ཅན་དག་རྨི་ལམ་ལྟར་མཐོང་སྟེ། དེ་དག་ལ་ཞུགས་པ་ན་དམྱལ་བར་སྐྱེ་ཞེས་གསུངས་སོ་ཞེས་ཟེར་རོ། །སྲིད་པ་བར་མ་དེ་དག་ལས་དམྱལ་བའི་སྲིད་པ་བར་མའི་དབྱིབས་ནི་གཤིན་རྗེའི་ཞགས་པས་བཏགས་ཏེ་སྤྱིའུ་ཚུགས་ཁོ་ནར་འཁྲིད་པ་ཡིན། ཡི་དྭགས་དང་དུད་འགྲོའི་ནི་སྐས་ལ་འབབ་པ་ལྟ་བུའོ། །མིའི་ནི་ཐང་ལ་འགྲོ་བ་ལྟ་བུའོ། །ལྷ་ཡི་ནི་སྟན་ལས་ལྡང་བ་ལྟ་བུར་གྱེན་དུ་འགྲོའོ་ཞེས་མཛོད་འགྲེལ་མངོན་པའི་རྒྱན་ལས་སོ། །
Domain	ཆོས་ལུགས།

{{#arraymap:བར་སྲིད་སྐྱེ་གནས་སུ་འཇུག་ཚུལ་

|; |@@@ | | }}