43509

བསམ་གཏན་གྱི་ཉེར་བསྡོགས་ལྷག་མཐོང་ (1)

Part of speech	མིང་ཚིག
Definition	མཚན་ཉིད་ནི། བསམ་གཏན་དང་པོའི་དངོས་གཞིའི་ཆེད་དུ་དམིགས་རྣམ་ཡོངས་སུ་སྦྱོང་བར་བྱེད་པའི་ཞི་རགས་ཀྱི་རྣམ་པ་ཅན་གྱི་དགེ་རྩས་བསྡུས་པའོ། །དབྱེ་བ་ལ། བསམ་གཏན་དང་པོའི་ཉེར་བསྡོགས་མཚན་ཉིད་རབ་ཏུ་རིག་པ་ཡིད་ལ་བྱེད་པ། མོས་པ་ཡིད་ལ་བྱེད་པ། རབ་ཏུ་དབེན་པ་ཡིད་ལ་བྱེད་པ། དགའ་བ་སྡུད་པ་ཡིད་ལ་བྱེད་པ། དཔྱོད་པ་ཡིད་ལ་བྱེད་པ། སྦྱོར་བའི་མཐའ་ཡིད་ལ་བྱེད་པ། སྦྱོར་བའི་མཐའི་འབྲས་བུ་ཡིད་ལ་བྱེད་པ་དང་བདུན་ལས། ཕྱི་མ་ནི་དངོས་གཞིའི་ཁོངས་སུ་གཏོགས་པས་ཉེར་བསྡོགས་མིན་ལ། བསམ་གཏན་དང་པོའི་ཉེར་བསྡོགས་དྲུག་གི་མཚན་ཉིད་རིམ་བཞིན། མཉམ་གཞག་གི་སས་བསྡུས་ཀྱི་ཡིད་བྱེད་གང་ཞིག ཐོས་བསམ་འདྲེས་མའི་སྒོ་ནས་འདོད་པ་ལ་རགས་པ་དང་། བསམ་གཏན་དང་པོ་ལ་ཞི་བའི་རྣམ་པར་ལྟ་བ་དང་། ཐོས་བསམ་ལས་འདས་ཏེ་ཞི་རགས་ཀྱི་མཚན་མ་རྩེ་གཅིག་ཏུ་སྒོམ་པའི་ཡིད་བྱེད་གང་ཞིག འདོད་ཉོན་ཆེན་པོ་གསུམ་སྤོང་བའི་སྦྱོར་བར་གྱུར་པ་དང་། དེ་གང་ཞིག འདོད་ཉོན་ཆེན་པོ་གསུམ་དངོས་སུ་སྤོང་བ་དང་། འདོད་ཉོན་ཆེན་པོ་གསུམ་སྤངས་པའི་དགའ་བདེ་ཆུང་ངུས་རང་རྒྱུད་ལ་རེག་ཅིང་། ཉོན་མོངས་སྤོང་བ་ལ་ཡོན་ཏན་དུ་མཐོང་བ་དྭང་བར་གྱུར་པའི་ཡིད་བྱེད་གང་ཞིག འདོད་ཉོན་འབྲིང་པོ་གསུམ་དངོས་སུ་སྤོང་བ་དང་། དེ་གང་ཞིག འདོད་ཉོན་འབྲིང་པོ་སྤངས་པས་དགེ་བའི་ཆོས་ལ་སྦྱོར་བ་བརྟན་པར་བྱས་པའི་ཕྱིར་ཀུན་ནས་དཀྲིས་པ་མངོན་དུ་གྱུར་པ་མི་འབྱུང་བའི་ཚེ་འདོད་པའི་ཉོན་མོངས་སྤངས་མ་སྤངས་དཔྱོད་པར་བྱེད་པའི་ཡིད་བྱེད་དང་། འདོད་ཉོན་ལྷག་མ་མ་སྤངས་པར་ཤེས་ནས་དེ་སྤང་བའི་ཕྱིར་ཞི་རགས་ཀྱི་མཚན་མ་རྩེ་གཅིག་ཏུ་སྒོམ་པའི་ཡིད་བྱེད་གང་ཞིག འདོད་ཉོན་ཆུང་ངུ་གསུམ་དངོས་སུ་སྤོང་བར་བྱེད་པ་སྟེ། བྱེད་ལས་ནི། རྒྱས་སྲས་མ་ལས། དེ་ལ་མཚན་ཉིད་རབ་ཏུ་རིག་པས་ནི་སྤང་བར་བྱ་བ་དང་ཐོབ་པར་བྱ་བ་ལེགས་པར་ཡོངས་སུ་ཤེས་ནས་སྤང་བར་བྱ་བ་དང་ཐོབ་པར་བྱ་བའི་ཕྱིར་སེམས་ཡོངས་སུ་འཇོག་གོ ། མོས་པ་ལས་བྱུང་བས་ནི་དེའི་དོན་དུ་ཡང་དག་པར་སྦྱོར་བ་བརྩམ་མོ། །རབ་ཏུ་དབེན་པ་ལས་བྱུང་བས་ནི་ཀུན་ནས་ཉོན་མོངས་ཆེན་པོ་རྣམས་རབ་ཏུ་སྤོང་ངོ་། །དགའ་བ་སྡུད་པས་ནི་ཉོན་མོངས་པའི་རྣམ་པ་འབྲིང་རབ་ཏུ་སྤོང་ངོ་། །དཔྱོད་པས་ནི་ཐོབ་པར་མངོན་པའི་ང་རྒྱལ་མེད་པ་ལ་སེམས་འཇོག་པར་བྱེད་དོ། །སྦྱོར་བའི་མཐས་ནི་ཉོན་མོངས་པའི་རྣམ་པ་ཆུང་ངུའི་བར་དུ་སྤོང་ངོ་། །སྦྱོར་བའི་མཐའི་འབྲས་བུ་ནི་ཡིད་ལ་བྱེད་པ་ལེགས་པར་སྒོམ་པ་འདི་དག་གི་སྒོམ་པའི་འབྲས་བུ་མྱོང་བར་བྱེད་དོ་ཞེས་གསུངས་པ་ལྟར་རོ། །བསམ་གཏན་དང་པོའི་ཉེར་བསྡོགས་ཀྱི་རྣམ་གཞག་དེ་དག་གིས་བསམ་གཏན་གཉིས་པ་ནས་སྲིད་རྩེའི་བར་གྱི་ཉེར་བསྡོགས་རྣམས་ཀྱང་རིག་པར་བྱའོ། །ཞེས་ཀུན་མཁྱེན་གོ་རམས་པའི་སྙོམས་འཇུག་རབ་གསལ་ལས་སོ། །
Domain	ཆོས་ལུགས།