43533

བསམ་གཏན་གྱི་ཡན་ལག་གི་ངོ་བོ་ (1)

Part of speech	མིང་ཚིག
Definition	བསམ་གཏན་དང་པོའི་ཡན་ལག་ཏུ་གྱུར་པའི་རྟོག་པ་ནི། འདོད་པ་ལ་རགས་པ་དང་བསམ་གཏན་དང་པོ་ལ་ཞི་བའི་རྣམ་པར་ལྟ་བའི་སེམས་བྱུང་ངོ་། །དཔྱོད་པ་ནི་དེའི་རྗེས་སུ་ཉོན་མོངས་པ་མང་ཉུང་དང་ཚེ་རིང་ཐུང་སོགས་ཞིབ་མོར་དཔྱོད་པའི་སེམས་བྱུང་ངོ་། །གཉིས་པའི་ནང་རབ་ཏུ་དང་བ་ནི་བྱེ་བྲག་ཏུ་སྨྲ་བས་བསམ་གཏན་གྱི་ས་ལས་ངེས་པར་འབྱུང་བའི་དད་པ་ལ་འདོད་དོ། །སེམས་ཙམ་པས་དྲན་ཤེས་བཞིན་བཏང་སྙོམས་གསུམ་ལ་འདོད་དེ། གཏན་ལ་དབབ་པ་བསྡུ་བ་ལས། ནང་རབ་ཏུ་དང་པའི་ངོ་བོ་ནི་དྲན་པ་དང་། ཤེས་བཞིན་དང་། བཏང་སྙོམས་དག་ཞེས་སོ། །དང་པོ་གཉིས་ཀྱི་ཡན་ལག་དགའ་བ་ནི་སེམས་ཚོར་ཡིན་ཏེ། ཡིད་ཀྱི་རྣམ་པར་ཤེས་པའི་འཁོར་དུ་བྱུང་བའི་ཚོར་བ་སིམ་པར་ཉམས་སུ་མྱོང་བ་ཡིན་པའི་ཕྱིར། བདེ་བ་ནི། བྱེ་བྲག་ཏུ་སྨྲ་བས་ཤིན་ཏུ་སྦྱངས་པ་ལ་འདོད་དེ། མཛོད་ལས། ཤིན་ཏུ་སྦྱངས་པ་བདེ་བ་ཡིན། །ཞེས་གསུངས་པའི་ཕྱིར། མདོ་སྡེ་པས་ལུས་ཚོར་ལ་འདོད་དེ། མདོ་ལས། བདེ་བ་ལུས་ཀྱིས་མྱོང་ལ་ཞེས་བཤད་པའི་ཕྱིར་ཕྱིར་རོ། །སེམས་ཙམ་པས་སེམས་བདེ་ལ་འདོད་དེ། གཏན་ལ་དབབ་པ་བསྡུ་བ་ལས། ཡིད་ཀྱི་རྣམ་པར་ཤེས་པའི་འཁོར་དུ་བྱུང་བའི་ཚོར་བ་སིམ་པར་ཉམས་སུ་མྱོང་བ་གཅིག་ཉིད་ཡིད་ཤེས་འཁོར་བཅས་ལ་ཕན་འདོགས་པའི་ཆ་ནས་དགའ་བ། དབང་ཤེས་འཁོར་བཅས་ལ་ཕན་འདོགས་པའི་ཆ་ནས་བདེ་བར་བཤད་ཅིང་། གསུམ་པའི་ཡན་ལག་ཏུ་གྱུར་པའི་དྲན་པ་ནི་དགའ་བ་མི་འབྱུང་བར་བྱ་བའི་ཕྱིར་དུ་དམིགས་རྣམ་མ་བརྗེད་པར་འཛིན་པའི་སེམས་བྱུང་ངོ་། །ཤེས་བཞིན་ནི། དགའ་བ་བྱུང་མ་བྱུང་སོ་སོར་རྟོག་པར་བྱེད་ཅིང་། བྱུང་ན་མྱུར་དུ་སྤོང་བའི་སེམས་བྱུང་ངོ་། །བཏང་སྙོམས་ནི་སེམས་རིང་དུ་གནས་པའི་འདུ་བྱེད་བཏང་སྙོམས་ཡིན་གྱི་ཚོར་བ་ནི་མ་ཡིན་ནོ། །གསུམ་པའི་ཡན་ལག་བདེ་བ་ནི། མདོ་སྡེ་པས་ལུས་ཚོར་ལ་འདོད་དེ། མདོ་ལས། བདེ་བ་ལུས་ཀྱིས་མྱོང་ལ་ཞེས་གསུངས་པའི་ཕྱིར། བྱེ་བྲག་ཏུ་སྨྲ་བ་དང་སེམས་ཙམ་པས་སེམས་ཚོར་ལ་འདོད་དེ། བྱེ་བྲག་ཏུ་སྨྲ་བས་སྔར་གྱི་དགའ་བའི་རྒྱུན་དེ་ཉིད་དགའ་བ་ལ་འདོད་ཆགས་དང་བྲལ་བ་ཙམ་ལ་འདོད་ཅིང་། སེམས་ཙམ་པས་ནི་སྔར་གྱི་བདེ་བའི་རྒྱུན་ལ་འདོད་པའི་ཕྱིར་རོ། །བཞི་པའི་ཡན་ལག་ཏུ་གྱུར་པའི་བཏང་སྙོམས་ནི། སེམས་རྒྱུན་དུ་གནས་པའི་འདུ་བྱེད་བཏང་སྙོམས་ཡིན་ལ། དྲན་པ་ནི་བདེ་བ་མི་འབྱུང་བར་བྱ་བའི་ཕྱིར་དམིགས་རྣམ་མི་བརྗེད་པར་འཛིན་པའི་སེམས་བྱུང་ངོ་། །བཞི་ཆར་གྱི་ཏིང་ངེ་འཛིན་ནི་སེམས་རྩེ་གཅིག་པའི་སེམས་བྱུང་ངོ་། །ཞེས་ཀུན་མཁྱེན་གོ་རམས་པའི་སྙོམས་འཇུག་རབ་གསལ་ལས་སོ། །
Domain	ཆོས་ལུགས།